News Continuous Bureau | Mumbai
Indian Bank Cyber Security Threat| ભારતની સરકારી બેંકો પર અત્યારે સાયબર હુમલાનું મોટું જોખમ મંડરાઈ રહ્યું છે. આ ખતરાને ધ્યાનમાં રાખીને પબ્લિક સેક્ટરની બેંકો પોતાની સિસ્ટમને વધુ સુરક્ષિત કરવા, ગ્રાહકોના ડેટાની રક્ષા કરવા અને નાણાકીય સંસાધનોને બચાવવા માટે આઈટી (IT) પાછળનો ખર્ચ વધારવાની તૈયારી કરી રહી છે. ખાસ કરીને એન્થ્રોપિકના ‘ક્લાઉડ માઈથોસ’ (Cloud Mythos) નામના એઆઈ ટૂલની એડવાન્સ કોડિંગ ક્ષમતાઓએ બેન્કિંગ ક્ષેત્રે નવી ચિંતા જન્માવી છે, કારણ કે તે સુરક્ષામાં રહેલી નબળાઈઓનો ફાયદો ઉઠાવી સિસ્ટમને ખોરવી શકે છે.
‘માઈથોસ’ AI ટૂલ બેન્કિંગ સિસ્ટમ માટે કેવી રીતે જોખમી?
એઆઈ (AI) ટેકનોલોજી જેટલી સુવિધાજનક છે, તેટલી જ તે અપરાધીઓ માટે પણ શક્તિશાળી સાધન બની રહી છે. ‘માઈથોસ’ એઆઈ ટૂલ તેની અભૂતપૂર્વ કોડિંગ ક્ષમતાને કારણે સાયબર સુરક્ષામાં રહેલી નાની નબળાઈઓને પણ શોધી કાઢવા અને તેનો લાભ લેવા માટે સક્ષમ છે. નિષ્ણાતોની ચિંતા છે કે આ ટેકનોલોજીનો ઉપયોગ બેન્કિંગ સિસ્ટમને ખોરવવા અથવા મોટા નાણાકીય ફ્રોડ કરવા માટે કરવામાં આવી શકે છે. આ પડકારનો સામનો કરવા માટે બેંકોએ પોતાની ટેકનિકલ ઈન્ફ્રાસ્ટ્રક્ચરને વધુ મજબૂત બનાવવું અનિવાર્ય બન્યું છે.
બેંકોના MD અને CEO એ જાહેર કરી નવી રણનીતિ
પંજાબ એન્ડ સિંધ બેંકના મેનેજિંગ ડિરેક્ટર અને CEO સ્વરૂપ કુમાર સાહાએ જણાવ્યું હતું કે, આ નવી સુરક્ષા પડકારોને પહોંચી વળવા બેંકોએ સાયબર સુરક્ષામાં રોકાણ વધારવું જ પડશે. ચાલુ નાણાકીય વર્ષમાં બેંક આઈટી ખર્ચમાં મોટો વધારો કરશે. તેવી જ રીતે, યૂકો બેંકના મેનેજિંગ ડિરેક્ટર અશ્વિની કુમારે પણ પુષ્ટિ કરી છે કે આ વર્ષે આઈટી ખર્ચનો મોટો હિસ્સો ખાસ કરીને સાયબર સુરક્ષાના લેયરને વધુ મજબૂત કરવા પાછળ વાપરવામાં આવશે.
કેન્દ્રીય નાણામંત્રીની બેંકોને કડક ચેતવણી
તાજેતરમાં કેન્દ્રીય નાણામંત્રી નિર્મલા સીતારમણે પણ દેશની તમામ બેંકોને આદેશ આપ્યો છે કે તેઓ તેમની આઈટી સિસ્ટમને સુરક્ષિત કરવા માટે તમામ જરૂરી પગલાં લે. એઆઈના વધતા વ્યાપ વચ્ચે સાયબર ફ્રોડના નવા રસ્તાઓ ખુલી રહ્યા છે, ત્યારે બેંકોએ માત્ર ટેકનોલોજી જ નહીં પણ રિયલ ટાઈમ મોનિટરિંગ અને સાયબર ડિફેન્સ સિસ્ટમમાં પણ સુધારો કરવો પડશે. ગ્રાહકોના વિશ્વાસ અને દેશની અર્થવ્યવસ્થાની સુરક્ષા માટે આઈટી બજેટમાં વધારો કરવો એ હવે સમયની માંગ છે.
👉 આ સમાચાર વાચો:
IPL 2026। ઓરેન્જ કેપની રેસમાં સાઈ સુદર્શનની એન્ટ્રી, વિરાટ કોહલી ટોપ5 માંથી બહાર; જાણો કોની પાસે છે પર્પલ કેપ
