News Continuous Bureau | Mumbai
Fuel Price Hike: મોંઘવારીનો સામનો કરી રહેલી જનતા માટે વધુ એક માઠા સમાચાર સામે આવ્યા છે. દેશભરમાં પ્રીમિયમ પેટ્રોલની કિંમતોમાં ધરખમ વધારો થયા બાદ હવે તેલ કંપનીઓએ પ્રીમિયમ ડીઝલના ભાવમાં પણ વધારો ઝીંક્યો છે. સોમવાર મધ્યરાત્રિથી અમલી બનેલા આ નવા દરોને કારણે ટ્રાન્સપોર્ટ અને લોજિસ્ટિક્સ ક્ષેત્ર પર આર્થિક ભારણ વધવાની શક્યતા છે. વૈશ્વિક પરિસ્થિતિઓ અને ક્રૂડ ઓઈલના વધતા ભાવને આ વધારા પાછળનું મુખ્ય કારણ ગણાવવામાં આવી રહ્યું છે.
કયા ઈંધણમાં કેટલો થયો વધારો?
ઈન્ડિયન ઓઈલ કોર્પોરેશન લિમિટેડ (IOCL) દ્વારા જારી કરાયેલ નવી દરો મુજબ, XP100 (100 ઓક્ટેન) પ્રીમિયમ પેટ્રોલ ની કિંમત ₹149 થી વધારીને ₹160 પ્રતિ લિટર કરી દેવામાં આવી છે, એટલે કે સીધો ₹11 નો વધારો થયો છે. બીજી તરફ, એક્સ્ટ્રા ગ્રીન પ્રીમિયમ ડીઝલ ના ભાવમાં લિટર દીઠ આશરે ₹1.50 નો વધારો કરવામાં આવ્યો છે, જેનાથી તેની કિંમત હવે ₹92.99 પ્રતિ લિટર સુધી પહોંચી ગઈ છે.
સામાન્ય પેટ્રોલ-ડીઝલના ભાવ પર અસર
રાહતની વાત એ છે કે હાલમાં માત્ર પ્રીમિયમ ઈંધણના ભાવમાં જ ફેરફાર કરવામાં આવ્યો છે. સામાન્ય પેટ્રોલ અને ડીઝલની કિંમતોમાં કોઈ વધારો થયો નથી. જોકે, નિષ્ણાતોનું માનવું છે કે જો આંતરરાષ્ટ્રીય બજારમાં કાચા તેલના ભાવમાં સતત ઉછાળો ચાલુ રહેશે, તો આગામી દિવસોમાં સામાન્ય ઈંધણ પણ મોંઘું થઈ શકે છે. દિલ્હીમાં પ્રીમિયમ ડીઝલની કિંમત હવે ₹95 થી ₹96 ની આસપાસ પહોંચી ગઈ છે.
આ સમાચાર પણ વાંચો : Alka Yagnik Health Update: અલકા યાજ્ઞિકના અવાજને કોની લાગી નજર? 2 વર્ષથી સંગીત દુનિયાથી દૂર, ગંભીર બીમારીનો થયો ખુલાસો
ટ્રાન્સપોર્ટ અને ખેતી પર વધશે આર્થિક ભારણ
પ્રીમિયમ ડીઝલનો ઉપયોગ ખાસ કરીને હાઈ-પરફોર્મન્સ એન્જિન ધરાવતી ગાડીઓ અને આધુનિક કૃષિ સાધનોમાં વધુ થાય છે. આ ભાવ વધારાથી ટ્રાન્સપોર્ટ અને કૃષિ ક્ષેત્ર સાથે જોડાયેલા લોકો પર સીધી અસર પડશે. અગાઉ 20 માર્ચે પણ પ્રીમિયમ પેટ્રોલના ભાવમાં ₹2 થી ₹2.35 સુધીનો વધારો કરવામાં આવ્યો હતો. સતત વધી રહેલા ઈંધણના ભાવને કારણે મોંઘવારી વધવાનો ભય સતાવી રહ્યો છે.
