News Continuous Bureau | Mumbai
છેલ્લા કેટલાક દિવસોથી સોના અને ચાંદીના ભાવમાં જે વેચવાલી જોવા મળી રહી હતી, તેને બુધવારે વિરામ લાગ્યો છે. ૧૮ ફેબ્રુઆરી ૨૦૨૬ના રોજ મલ્ટી કોમોડિટી એક્સચેન્જ (MCX) પર સોના અને ચાંદીના ભાવ ફરી તેજીના માર્ગે પરત ફર્યા છે. ખાસ કરીને ચાંદીના ભાવમાં થયેલા મોટા ઉછાળાએ રોકાણકારોનું ધ્યાન ખેંચ્યું છે. વિશ્લેષકોના મતે, આંતરરાષ્ટ્રીય બજારમાં ડોલરની કિંમતમાં ઘટાડો અને જિનેવા ખાતે અમેરિકા-ઈરાન વચ્ચેની પરમાણુ વાટાઘાટોમાં થયેલી પ્રગતિને કારણે બજારમાં આ સકારાત્મક અસર જોવા મળી રહી છે.
સોના અને ચાંદીના આજના ભાવ
સોનું (Gold): MCX પર એપ્રિલ ફ્યુચર્સ સોનાનો ભાવ આશરે ₹૨,૦૦૦ અથવા ૧.૨% વધીને ₹૧,૫૩,૩૦૩ પ્રતિ ૧૦ ગ્રામ પર પહોંચ્યો છે.ચાંદી (Silver): માર્ચ ફ્યુચર્સ ચાંદીનો ભાવ ₹૪,૧૦૦ અથવા આશરે ૨% ના ઉછાળા સાથે ₹૨,૩૨,૯૩૦ પ્રતિ કિલોગ્રામ પર ટ્રેડ કરી રહ્યો છે.
આ સમાચાર પણ વાંચો : Ashwini Vaishnaw: માતા-પિતા માટે મોટા સમાચાર! ભારત સરકાર સોશિયલ મીડિયાના નિયમોમાં કરી શકે છે ધરખમ ફેરફાર; જાણો અશ્વિની વૈષ્ણવે શું કહ્યું
તેજી પર અંકુશ લાવતા પરિબળો
જોકે, આ તેજી અમુક અંશે મર્યાદિત રહી છે. ચીન, કોરિયા અને અન્ય એશિયાઈ દેશોમાં લુનર ન્યૂ યરની રજાઓને કારણે બજારમાં વ્યવહારો ઓછા રહ્યા છે. ઉપરાંત, ફેડ રિઝર્વના ગવર્નર માઈકલ બારના સંકેતો મુજબ, જ્યાં સુધી મોંઘવારી દર ૨% ના લક્ષ્યાંક સુધી નીચે નહીં આવે ત્યાં સુધી વ્યાજદરમાં ઘટાડો થવાની શક્યતા ઓછી છે, જેની અસર કિંમતી ધાતુઓની તેજી પર પડી રહી છે.
શું છે રોકાણકારોની રણનીતિ?
રોકાણકારો અત્યારે અમેરિકાના આગામી આર્થિક ડેટા જેવા કે ઔદ્યોગિક ઉત્પાદનના આંકડા અને PCE પ્રાઇસ ઇન્ડેક્સની રાહ જોઈ રહ્યા છે. આ આંકડાઓ ભવિષ્યમાં સોના-ચાંદીના વલણને સ્પષ્ટ કરશે. ભૂ-રાજકીય મોરચે અસ્થિરતા થોડી ઓછી થતા સોનામાં તેજી ધીમી પડી છે, પરંતુ માંગ અને પુરવઠાના તફાવતને કારણે ચાંદીના ભાવમાં હજુ પણ ઉછાળો જોવા મળી રહ્યો છે. જે રોકાણકારોએ ગયા વર્ષે ચાંદીમાં રોકાણ કર્યું હતું, તેઓ અત્યારે નફો બુક કરી રહ્યા છે.
