News Continuous Bureau | Mumbai
Gold Silver Price Hike May 2026| કેન્દ્ર સરકાર દ્વારા સોના અને ચાંદીની આયાત પર ઈમ્પોર્ટ ડ્યુટીમાં કરાયેલા તોતિંગ વધારાની સીધી અસર હવે કિંમતી ધાતુઓના ભાવ પર દેખાઈ રહી છે. ૧૩ મે ૨૦૨૬ થી લાગુ થયેલી નવી ડ્યુટીના કારણે ચાંદીના ભાવમાં એક ઝાટકે ૨૭,૭૦૦ રૂપિયા અને સોનાના ભાવમાં ૧૫,૬૮૦ રૂપિયાનો વધારો થયો છે. સરકારના આ નિર્ણયથી લગ્નની સીઝનમાં ખરીદી કરનારા સામાન્ય ગ્રાહકોના ખિસ્સા પર મોટો બોજ પડશે.
કસ્ટમ ડ્યુટી અને સેસમાં ૧૦ ટકા સુધીનો વધારો
સરકારે જારી કરેલા નોટિફિકેશન મુજબ, સોના અને ચાંદી પર હવે ૧૦% બેઝિક કસ્ટમ ડ્યુટી અને ૫% એગ્રીકલ્ચર ઈન્ફ્રાસ્ટ્રક્ચર એન્ડ ડેવલપમેન્ટ સેસ (AIDC) લાગુ કરવામાં આવ્યો છે. આ સાથે જ કુલ ઈમ્પોર્ટ ડ્યુટી ૬% થી વધીને ૧૫% પર પહોંચી ગઈ છે. આ વધારાની અસર માત્ર સોના-ચાંદી પર જ નહીં, પરંતુ પ્લેટિનમ અને જ્વેલરીના સ્પેરપાર્ટ્સ (Findings) પર પણ પડશે. સરકારે સોનાની આયાત ઘટાડવા માટે આ કડક વલણ અપનાવ્યું છે.
દિલ્હીના બજારમાં ભાવ આસમાને
અખિલ ભારતીય સર્રાફા સંઘના જણાવ્યા અનુસાર, ૧૨ મેના રોજ દિલ્હીના બજારમાં સોનું ૧,૫૬,૮૦૦ રૂપિયા પ્રતિ ૧૦ ગ્રામ અને ચાંદી ૨,૭૭,૦૦૦ રૂપિયા પ્રતિ કિલોગ્રામ પર બંધ થયા હતા. જો આ ભાવમાં ૧૦% વધારાની ઈમ્પોર્ટ ડ્યુટી ઉમેરવામાં આવે તો સોનાનો ભાવ અંદાજે ૧,૭૨,૪૮૦ રૂપિયા અને ચાંદીનો ભાવ ૩,૦૪,૭૦૦ રૂપિયા પ્રતિ કિલો સુધી પહોંચી શકે છે. આજે બજાર ખુલ્યા બાદ નવી દરો સાથેની સત્તાવાર કિંમતો સામે આવશે.
છૂટક ગ્રાહકો પર પડશે સીધો બોજ
ઈમ્પોર્ટ ડ્યુટીમાં થયેલો આ વધારો જ્વેલર્સ અને ટ્રેડિંગ કંપનીઓ સીધો ગ્રાહકો પાસેથી જ વસૂલશે. આ કારણે રિટેલ માર્કેટમાં દાગીના બનાવડાવવા હવે પહેલા કરતા ઘણા મોંઘા સાબિત થશે. સરકારના આ નિર્ણય પાછળ વિદેશી મુદ્રા ભંડાર પરનું દબાણ ઘટાડવું અને પડતા રૂપિયાને ટેકો આપવાનો મુખ્ય હેતુ છે. જોકે, ઝવેરી બજારના વેપારીઓ આ ભાવ વધારાને કારણે માંગમાં ઘટાડો થવાની આશંકા વ્યક્ત કરી રહ્યા છે.
👉 આ સમાચાર વાચો:
Apara Ekadashi 2026। અપરા એકાદશી પર ભગવાન વિષ્ણુની કૃપા મેળવવાનો ખાસ અવસર! જાણો આજે પૂજાનો સાચો સમય અને પારણાના મુહૂર્ત, પાપ મુક્તિ માટે કરો આ ઉપાય
