News Continuous Bureau | Mumbai
Gold Price India Exchange દેશમાં સોનાની કિંમતોમાં સતત થઈ રહેલા અસાધારણ વધારાને કારણે ગ્રાહકોની ખરીદી કરવાની પદ્ધતિમાં મોટો બદલાવ આવ્યો છે. હવે લોકો રોકડા રૂપિયા ખર્ચીને તદ્દન નવું સોનું ખરીદવાને બદલે ઘરમાં રાખેલા જૂના દાગીના આપીને નવી જ્વેલરી ખરીદવાનું વધુ પસંદ કરી રહ્યા છે. જ્વેલરી બજારના અગ્રણી વેપારીઓના જણાવ્યા અનુસાર, જૂના સોનાના બદલામાં નવી જ્વેલરી ખરીદવાના વ્યવહારોમાં વાર્ષિક ધોરણે આશરે 60 ટકાનો મોટો ઉછાળો નોંધાયો છે. સોનાના ઊંચા ભાવો, આયાત ડ્યુટી અને બજારની આર્થિક અનિશ્ચિતતા આ નવા ટ્રેન્ડને ખૂબ જ ઝડપથી વેગ આપી રહી છે.
Gold Price India Exchange : દેશની મોટી જ્વેલરી બ્રાન્ડ્સના વેચાણમાં એક્સચેન્જનો દબદબો
એક અહેવાલ મુજબ, દેશની પ્રતિષ્ઠિત જ્વેલરી રીટેલ ચેઈન જોયાલુક્કાસના ચેરમેને જણાવ્યું છે કે કંપનીના કુલ વેચાણમાં ગોલ્ડ એક્સચેન્જ પ્રોગ્રામનો હિસ્સો હવે વધીને 65 ટકા સુધી પહોંચી ગયો છે, જે અગાઉ માત્ર 40 થી 45 ટકાની આસપાસ રહેતો હતો. કેટલીકવાર તો કંપનીના રોજના કુલ બિઝનેસના 70 ટકા જેટલો સ્ત્રોત જૂના સોનાનું એક્સચેન્જ જ બની જાય છે. આ જ રીતે કલ્યાણ જ્વેલર્સના એક્ઝિક્યુટિવ ડિરેક્ટરે પણ માહિતી આપી છે કે તેમની કંપનીમાં એક્સચેન્જ આધારિત વેચાણનો હિસ્સો 30 ટકાથી વધીને 45 ટકા સુધી પહોંચી ગયો છે. કંપનીએ વડાપ્રધાનની અપીલને ધ્યાનમાં રાખીને ખાસ ગોલ્ડ એક્સચેન્જ કેમ્પેઈન પણ ચલાવ્યા છે.
Gold Price India Exchange : ઈમ્પોર્ટ ડ્યુટી અને મોંઘા સોનાની ગ્રાહકોના ખિસ્સા પર અસર
આ ક્ષેત્ર સાથે સંકળાયેલા નિષ્ણાતોનું કહેવું છે કે સરકાર દ્વારા સોના પર અસરકારક ઈમ્પોર્ટ ડ્યુટીમાં કરવામાં આવેલો વધારો અને સોનાના આંતરરાષ્ટ્રીય ભાવોમાં આવેલો તેજીનો કરંટ આ ટ્રેન્ડ મજબૂત થવા પાછળનું મુખ્ય કારણ છે. બજારમાં 24 કેરેટ સોનાની કિંમત પ્રતિ 10 ગ્રામ આશરે 1.56 લાખ રૂપિયાની ઐતિહાસિક સપાટી પર પહોંચી ગઈ છે, જે ગત વર્ષે આ સમયે માત્ર 1 લાખ રૂપિયા પ્રતિ 10 ગ્રામની આસપાસ હતી. આવા મોંઘવારીના માહોલમાં જૂના દાગીનાની વર્તમાન ઉચ્ચ બજાર કિંમતનો લાભ લઈને નવી જ્વેલરી ખરીદવી ગ્રાહકો માટે સૌથી અનુકૂળ અને ઓછી ખર્ચાળ સાબિત થઈ રહી છે.
Gold Price India Exchange : ઘરોમાં રાખેલું સોનું બનશે દેશના અર્થતંત્રની નવી તાકાત
ભારત વિશ્વભરમાં સોનાનો સૌથી મોટો વપરાશકાર દેશ છે અને એક અંદાજ મુજબ ભારતીય પરિવારો પાસે આશરે 25,000 ટન સોનું સંગ્રહાયેલું પડ્યું છે. ઈન્ડિયા બુલિયન એન્ડ જ્વેલર્સ એસોસિએશનના નેશનલ સેક્રેટરીના જણાવ્યા મુજબ, ગોલ્ડ એક્સચેન્જ યોજનાઓ ઘરોમાં બિનઉપયોગી પડેલા સોનાને ફરીથી બજારમાં લાવવામાં ખૂબ જ મદદરૂપ સાબિત થઈ રહી છે. આનાથી વિદેશથી થતી સોનાની આયાત પરની નિર્ભરતા ઘટાડી શકાશે. ભારત દર વર્ષે લગભગ 900 થી 1,000 ટન સોનાની આયાત કરે છે, તેથી જૂના સોનાનું આ રિસાયકલિંગ દેશના અર્થતંત્ર માટે પણ વરદાન સાબિત થઈ શકે છે. ટાટા જૂથની તનિષ્ક બ્રાન્ડના સીઈઓના જણાવ્યા અનુસાર, છેલ્લા આઠ મહિનામાં જ 4.4 લાખથી વધુ ગ્રાહકોએ 10 ટન જેટલું સોનું એક્સચેન્જ કર્યું છે.
👉 આ સમાચાર વાચો:
Post Office Schemes vs Bank FD સુરક્ષિત રોકાણ અને સારા રિટર્ન માટે કયો વિકલ્પ બેસ્ટ? બેંક એફડી કે પોસ્ટ ઓફિસની બચત યોજનાઓ; જાણો
