News Continuous Bureau | Mumbai
પશ્ચિમ એશિયામાં ચાલી રહેલા તણાવ અને હોર્મુઝની સામુદ્રધૂનીમાં સર્જાયેલી અસ્થિરતાને કારણે ભારતમાં એલપીજી (LPG) પુરવઠા પર દબાણ વધ્યું છે. આ સ્થિતિમાં ગેસનો દુરુપયોગ અને સંગ્રહખોરી રોકવા માટે પેટ્રોલિયમ અને પ્રાકૃતિક ગેસ મંત્રાલયે બુકિંગના નિયમોમાં મોટા ફેરફારો કર્યા છે. સરકારે ગ્રાહકોને ગભરાઈને ખરીદી (Panic Buying) ન કરવા અને ફરજિયાતપણે ઈ-કેવાયસી પૂર્ણ કરવા જણાવ્યું છે.મંત્રાલયના જણાવ્યા મુજબ, હવે ગેસ વિતરણ વ્યવસ્થામાં પારદર્શકતા લાવવા માટે ડિલિવરી ઓથેન્ટિકેશન કોડ (DAC) અનિવાર્ય કરવામાં આવ્યો છે. હાલમાં દેશમાં 95 ટકા બુકિંગ ઓનલાઇન માધ્યમોથી થઈ રહ્યું છે, જે સિસ્ટમને વધુ સુવ્યવસ્થિત બનાવવામાં મદદ કરી રહ્યું છે.
બુકિંગ માટેનો નવો વેઇટિંગ પિરિયડ
સરકારે સંગ્રહખોરી રોકવા માટે રિફિલ બુકિંગ વચ્ચે ચોક્કસ સમયગાળો નક્કી કર્યો છે:
શહેરી વિસ્તારો: ગ્રાહકો એક સિલિન્ડર લીધા બાદ 25 દિવસ પછી જ બીજો સિલિન્ડર બુક કરાવી શકશે.
ગ્રામીણ વિસ્તારો: ગ્રામીણ ગ્રાહકો માટે આ પ્રતીક્ષા અવધિ 45 દિવસ નક્કી કરવામાં આવી છે.
આ નિયમ માર્ચ/એપ્રિલ 2026 થી અમલી બનાવવામાં આવ્યો છે જેથી પુરવઠો દરેક ઘર સુધી પહોંચી શકે.
ડિજિટલ બુકિંગ અને DAC સિસ્ટમ
ગ્રાહકોને વિતરકોની ઓફિસે લાઈનમાં ઉભા રહેવાને બદલે મોબાઈલ એપ, વોટ્સએપ, એસએમએસ કે મિસ્ડ કોલ દ્વારા બુકિંગ કરવા અપીલ કરવામાં આવી છે. ઈન્ડિયન ઓઈલ, ભારત ગેસ અને એચપી ગેસના એપ ઉપરાંત પેટીએમ (Paytm) અને ફોનપે (PhonePe) પર પણ સુવિધા ઉપલબ્ધ છે. ડિલિવરી સમયે તમારા રજિસ્ટર્ડ મોબાઈલ પર આવતો DAC કોડ આપવો હવે ફરજિયાત છે, જેના વગર સિલિન્ડર મળશે નહીં.
આ સમાચાર પણ વાંચો: LPG થી PNG: ગેસ સિલિન્ડર પર તમારા ખિસ્સામાંથી કેટલો ટેક્સ જાય છે? જાણો સરકારની કમાણીનું આખું ગણિત
5 કિલોના સિલિન્ડરની વધતી માંગ
મુખ્ય સિલિન્ડરની અછત વચ્ચે 5 કિલોના FTL (Free Trade LPG) સિલિન્ડરની માંગમાં મોટો ઉછાળો આવ્યો છે. દૈનિક 90 હજારથી વધુ આવા નાના સિલિન્ડર વેચાઈ રહ્યા છે. આ સિલિન્ડર મેળવવા માટે કોઈ એડ્રેસ પ્રૂફની જરૂર નથી, માત્ર ઓળખપત્ર બતાવીને કોઈપણ ગેસ એજન્સી પરથી તે ખરીદી શકાય છે.
