News Continuous Bureau | Mumbai
મુંબઈ મહાનગરપાલિકામાં મેયરની વરણી બાદ હવે સત્તાનું ખરું કેન્દ્ર ગણાતી સમિતિઓની પસંદગી પ્રક્રિયા પૂર્ણ થઈ છે. સોમવારે મળેલી વિશેષ સભામાં મેયર રીતુ તાવડેએ સ્થાયી સમિતિ, સુધાર સમિતિ, શિક્ષણ સમિતિ અને બેસ્ટ (BEST) સમિતિના સભ્યોની સત્તાવાર જાહેરાત કરી હતી. આ નિમણૂકોમાં પક્ષપલટો કરનારાઓ અને દિગ્ગજ નેતાઓના સંબંધીઓને પ્રાધાન્ય આપવામાં આવ્યું હોવાનું સ્પષ્ટ દેખાઈ રહ્યું છે.પાલિકાની સૌથી મહત્વની ‘સ્થાયી સમિતિ’માં ભાજપે વિધાનસભા અધ્યક્ષ રાહુલ નાર્વેકરના ભાઈ મકરંદ નાર્વેકર અને પૂર્વ વિરોધ પક્ષના નેતા પ્રવીણ દરેકરના ભાઈ પ્રકાશ દરેકરને સ્થાન આપ્યું છે. જ્યારે NCP માંથી ભાજપમાં આવેલા રાખી જાધવને પણ આ સમિતિમાં સભ્યપદ આપીને રાજકીય સંતુલન સાધવાનો પ્રયાસ કરાયો છે.
શિક્ષણ અને સુધાર સમિતિમાં નવા ચહેરાઓ
શિક્ષણ સમિતિમાં શિવસેના (ઠાકરે જૂથ) ના ધારાસભ્ય સુનીલ પ્રભુના પુત્ર અંકિત પ્રભુની પસંદગી કરવામાં આવી છે. આ ઉપરાંત, સાંસદ સંજય રાઉતના ભત્રીજા પ્રિયંક સંદીપ રાઉતને પણ તક મળી છે. સુધાર સમિતિમાં ચૂંટણી પહેલા ભાજપમાં જોડાયેલા તેજસ્વી ઘોસાળકર અને NCP માંથી આવેલા ચંદન શર્માને સ્થાન આપીને પક્ષે વફાદારીનું ‘બક્ષિસ’ આપ્યું છે. શરદ પવાર જૂથના અજીત રાવરાણેને પણ સુધાર સમિતિમાં સ્થાન મળ્યું છે.
આ સમાચાર પણ વાંચો : Surya Grahan 2026 Rashifal: વર્ષનું પ્રથમ સૂર્યગ્રહણ આજે: જાણો મેષથી મીન સુધી તમામ રાશિઓ પર કેવી થશે અસર; કોના માટે ખુલશે પ્રગતિના દ્વાર?
બેસ્ટ સમિતિમાં કોણ છે પાવરફુલ?
બેસ્ટ સમિતિમાં શિવસેના ઠાકરે જૂથે ધારાસભ્ય સચિન અહીરના ભાઈ સુનીલ અહીરને તક આપી છે. મહારાષ્ટ્ર નવનિર્માણ સેના (MNS) માંથી ઠાકરે જૂથમાં આવેલા નીતિન નાંદગાવકરને પણ બેસ્ટ સમિતિમાં સ્થાન અપાયું છે. સત્તાધારી પક્ષોમાં અજીત પવાર જૂથના ડો. સઈદા ખાનને સ્થાયી સમિતિમાં મોકલીને ભાજપે મિત્ર પક્ષને પણ મહત્વનો હિસ્સો આપ્યો છે.
કઈ સમિતિનું શું છે મહત્વ?
સ્થાયી સમિતિ: પાલિકાના તમામ આર્થિક વ્યવહારો અને ટેન્ડરોને મંજૂરી આપતી સૌથી શક્તિશાળી સમિતિ.
શિક્ષણ સમિતિ: પાલિકાની શાળાઓ અને શિક્ષણલક્ષી નીતિઓનું સંચાલન કરે છે.
સુધાર સમિતિ: મુંબઈના જમીન સુધારણા, વિકાસ પ્લાન (DP) અને એસ્ટેટ સંબંધી નિર્ણયો લે છે.
બેસ્ટ સમિતિ: મુંબઈની પરિવહન સેવા અને વીજળી પુરવઠા પર દેખરેખ રાખે છે.
