News Continuous Bureau | Mumbai
BMC: મુંબઈ મહાનગરપાલિકા ક્ષેત્રમાં ખુલ્લામાં કચરો સળગાવનારને હવે 100 રૂપિયાની બદલે 1000 રૂપિયા દંડ કરવામાં આવશે. ખુલ્લામાં કચરો સળગાવવાથી વાયુ પ્રદૂષણ સાથે પર્યાવરણ અને આરોગ્યના ગંભીર જોખમો ઊભા થાય છે. તેથી નાગરિકોને આની જાણકારી આપવા માટે મહાનગરપાલિકાએ દંડની રકમમાં દસ ગણો વધારો કર્યો છે. આની અમલબજવણી 1 એપ્રિલ 2025થી કરવામાં આવશે. તેમજ ખુલ્લામાં કચરો સળગાવવાના કિસ્સાઓ રોકવા માટે વિભાગીય કચેરી (વોર્ડ) સ્તરે ટીમ બનાવવામાં આવી છે. આ ટીમમાં ઘન કચરા વ્યવસ્થાપન વિભાગના કનિષ્ઠ પર્યવક્ષક, ઉપદ્રવ શોધક (ND સ્ટાફ) અને મુકાદમનો સમાવેશ થશે.
ઘન કચરા વ્યવસ્થાપન નિયમો
ઘન કચરાના સંકલન, વહન અને નિકાલ વગેરે બાબતો સાથે સંકળાયેલા સુધારેલા મુંબઈ મહાનગરપાલિકા અધિનિયમ 1888ના કલમ 462 (EE) હેઠળ બૃહન્મુંબઈ સ્વચ્છતા અને આરોગ્ય ઉપનિયમ 2006 તૈયાર કરવામાં આવ્યા છે. આ મુજબ મહાનગરપાલિકા કમિશનર તથા પ્રશાસક ભૂષણ ગગરાણી, અતિરીક્ત મહાનગરપાલિકા કમિશનર (શહેર) ડૉ. અશ્વિની જોશીના માર્ગદર્શન હેઠળ ઘન કચરા વ્યવસ્થાપન નિયમોનું જાહેર પાલન કરવા પર ભાર મૂકવામાં આવી રહ્યો છે. મુંબઈ મહાનગરમાં અનેક જગ્યાએ ખુલ્લામાં કચરો સળગાવવાના કિસ્સાઓ સામે આવે છે.
આ સમાચાર પણ વાંચો: Mumbai AC Local Cancel : આજે પણ લોકલ યાત્રીઓને થશે હેરાનગતિ… આ રેલ્વે પર 17 AC લોકલ ટ્રેનો રહેશે રદ, જાણો શું છે કારણ..
ખુલ્લામાં કચરો સળગાવવાથી નુકસાન
ખુલ્લામાં કચરો સળગાવવાથી તેમાંથી ઝેરી વાયુ, કણયુક્ત પદાર્થ વગેરે ઘટકો બહાર આવે છે. જેના કારણે હવામાં ગુણવત્તા ખરાબ થાય છે અને શ્વાસના રોગો વધે છે. અત્યાર સુધી ખુલ્લામાં કચરો સળગાવતી વખતે કોઈ પકડાય તો સ્વચ્છતા ઉપનિયમની જોગવાઈ મુજબ 100 રૂપિયા દંડ કરવામાં આવતો હતો. દંડની રકમ તુલનામાં ઓછી હોવાથી નાગરિકોને આ બાબતે ગંભીરતા ન હોવાનું જણાયું. તેથી હવે જો કોઈ ખુલ્લામાં કચરો સળગાવતી વખતે પકડાય તો તેને સ્થળ પર જ 1000 રૂપિયા દંડ કરવામાં આવશે, એવો નિર્ણય પ્રશાસનએ લીધો છે, એમ ઉપ કમિશનર (ઘન કચરા વ્યવસ્થાપન) કિરણ દિઘાવકરે જણાવ્યું.
