News Continuous Bureau | Mumbai
Mira Bhayandar: મીરા-ભાઈંદર મહાનગરપાલિકા (MBMC) ની ટ્રાન્સપોર્ટ બસના ડ્રાઈવર પર જાહેરમાં હિંસક હુમલો થવાની આઘાતજનક ઘટના સામે આવી છે. માત્ર બાઈક કટ મારવા જેવી સામાન્ય બાબતે ૫ થી ૬ શખ્સોના ટોળાએ બસમાં ઘૂસીને ડ્રાઈવરને નિર્દયતાથી માર માર્યો હતો. આ સમગ્ર ઘટના બસમાં લાગેલા સીસીટીવી કેમેરામાં કેદ થઈ છે, જેના ફૂટેજ વાયરલ થતા પાલિકાના કર્મચારીઓ અને નાગરિકોમાં ભારે રોષ છે.આ હિંસક ઘટના ગાયમુખ ઘાટ પાસેના મુખ્ય માર્ગ પર બની હતી. એક મોટરસાઈકલ સવારે બસની આગળ જોખમી રીતે કટ માર્યો હતો. અકસ્માત ટાળવા માટે ડ્રાઈવરે સમયસૂચકતા વાપરી બ્રેક મારી હતી અને બાઈક સવારને ટોક્યો હતો. આ વાતથી ઉશ્કેરાઈને બાઈક સવારે ફોન કરીને તેના સાથીદારોને બોલાવ્યા હતા.
બસમાં ઘૂસીને મુસાફરોની હાજરીમાં માર્યો માર
સીસીટીવી ફૂટેજમાં જોઈ શકાય છે કે હુમલાખોરોનું ટોળું જબરદસ્તીથી બસની અંદર ઘૂસી ગયું હતું. હુમલાખોરોએ ડ્રાઈવરનો કોલર પકડીને તેને સીટ પરથી ખેંચ્યો હતો અને લાતો-મુક્કાઓનો વરસાદ કર્યો હતો. આ હુમલા સમયે બસમાં મુસાફરો પણ હાજર હતા, જેઓ આ દ્રશ્ય જોઈને સ્તબ્ધ થઈ ગયા હતા. હુમલા બાદ તમામ હુમલાખોરો ઘટનાસ્થળેથી ફરાર થઈ ગયા હતા.
આ સમાચાર પણ વાંચો : Mumbai Metro 5 Update: ભિવંડી મેટ્રોનું સપનું થશે સાકાર: ઠાણેથી ભિવંડી સુધી મેટ્રો લાઇન 5 માં ઝડપભેર કામ, આ તારીખથી દોડશે ટ્રેન!
લોહીલુહાણ હાલતમાં ડ્રાઈવર હોસ્પિટલમાં દાખલ
હુમલામાં ગંભીર રીતે ઈજાગ્રસ્ત થયેલા બસ ડ્રાઈવરને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો છે. ડ્રાઈવરના માથા અને શરીરના અન્ય ભાગોમાં ઈજાઓ થઈ છે. કર્મચારી યુનિયનોએ આ ઘટનાની નિંદા કરી છે અને હુમલાખોરો સામે કડક કાર્યવાહીની માંગ કરી છે.
સીસીટીવી ફૂટેજ દ્વારા પોલીસ તપાસ તેજ
પોલીસે બસના સીસીટીવી ફૂટેજ કબજે કર્યા છે જેમાં હુમલાખોરોના ચહેરા સ્પષ્ટપણે દેખાઈ રહ્યા છે. પોલીસે આ ફૂટેજના આધારે હુમલાખોરોની ઓળખ કરવાની અને તેમને ઝડપી પાડવાની તજવીજ હાથ ધરી છે. જાહેર સેવક પર ફરજ દરમિયાન હુમલો કરવા બદલ પોલીસે ગુનો નોંધવાની પ્રક્રિયા શરૂ કરી છે.
