ન્યુઝ કન્ટિન્યુઝ બ્યુરો
મુંબઈ, 9 ઑક્ટોબર, 2021
શનિવાર
મહારાષ્ટ્રના ચીપી ઍરપૉર્ટનું શ્રેય લેવાને મુદ્દે મહારાષ્ટ્રના મુખ્ય પ્રધાન ઉદ્ધવ ઠાકરે અને કેન્દ્રીય મંત્રી નારાયણ રાણે પહેલાંથી બાખડી રહ્યા છે. હવે કોંકણના સિંધુ દુર્ગ જિલ્લામાં બાંધવામાં આવેલા ચીપી ઍરપૉર્ટના ઉદ્ઘાટન માટે છાપવામાં આવેલી આમંત્રણપત્રિકામાં પોતાનું નામ ત્રીજા નંબરે છાપવામાં આવતાં નારાણય રાણે નારાજ થઈ ગયા છે. પોતે કેન્દ્રીય પ્રધાન હોવાથી હોદ્દાની દૃષ્ટિએ અને પ્રોટોકોલના હિસાબે ઉદ્ધવ ઠાકરેથી ઊંચું સ્થાન ધરાવે છે. એથી આમંત્રણપત્રિકામાં પોતાનું નામ ઉપર છાપવું જોઈતું હતું એને બદલે નીચે છાપ્યું એવી નારાજગી નારાયણ રાણેએ પત્રકાર પરિષદ લઈને વ્યક્ત કરી હતી. જાણીજોઈને પોતાનું નામ નીચે છાપીને અપમાન કરવામાં આવ્યું હોવાનો આરોપ પણ નારાયણ રાણેએ કર્યો હતો.
અહીં ઉલ્લેખનીય છે કે ઍરપૉર્ટના ઉદ્ઘાટનમાં વિધાનસભાના વિરોધ પક્ષના નેતા દેવેન્દ્ર ફડણવીસ અને વિધાનપરિષદના વિરોધ પક્ષ નેતા પ્રવીણ દરેકરને આમંત્રણ આપવામાં આવ્યાં નથી. એની સામે ભાજપે નારાજગી વ્યક્ત કરી છે.
