News Continuous Bureau | Mumbai
Extortion Case માહિતી અધિકાર કાયદાનો દુરુપયોગ કરીને શૈક્ષણિક સંસ્થાઓને બ્લેકમેઇલ કરતી નકલી આરટીઆઈ એક્ટિવિસ્ટોની ગેંગનો ઠાણે ક્રાઇમ બ્રાન્ચે પર્દાફાશ કર્યો છે. ક્રાઇમ બ્રાન્ચના એન્ટીએક્સ્ટોર્શન સેલે પાંચપાખડી વિસ્તારમાં એક આયોજનબદ્ધ છટકું ગોઠવીને એક પ્રતિષ્ઠિત સ્કૂલ વિરૂદ્ધ પાલિકામાં નોંધાવેલી ફરિયાદ પાછી ખેંચવાના બદલામાં ૧૫ લાખની તોતિંગ ખંડણી સ્વીકારતા બે કથિત આરટીઆઈ કાર્યકરોને રંગેહાથ ઝડપી પાડ્યા છે. પોલીસે બંને આરોપીઓ વિરુદ્ધ ગુનો નોંધી વધુ તપાસ શરૂ કરી છે.
Extortion Case – મહાનગરપાલિકામાં સ્કૂલ ગેરકાયદેસર હોવાની ખોટી ફરિયાદ કરી આપતા હતા ધમકી
મળતી સત્તાવાર વિગતો અનુસાર, આ ચકચારી કેસની ફરિયાદ ચિતળસર-માનપાડા ખાતે આવેલી પ્રખ્યાત હાઇ સ્કૂલ એન્ડ જુનિયર કોલેજના વહીવટી અધિકારી દ્વારા નોંધાવવામાં આવી હતી. પકડાયેલા બંને આરોપીઓએ આ સ્કૂલની ઇમારત ગેરકાયદેસર હોવાની એક ખોટી ફરિયાદ ઠાણે મહાનગરપાલિકા સમક્ષ દાખલ કરી હતી. આ ફરિયાદ કર્યા બાદ આરોપીઓએ સ્કૂલ પ્રશાસનનો સંપર્ક સાધ્યો હતો અને ધમકી આપી હતી કે જો તેમને ૨૫ લાખની રોકડ આપવામાં નહીં આવે, તો તેઓ પાલિકા પર દબાણ લાવીને સ્કૂલની ઇમારતનું તોડકામ કરાવી દેશે, જેથી બાળકોનું ભવિષ્ય બગડશે.
Extortion Case – ૨૫ લાખના બદલે ૧૫ લાખમાં સોદો નક્કી થતાં જ ક્રાઇમ બ્રાન્ચે ગોઠવ્યું છટકું
સ્કૂલ પ્રશાસન અને આરોપીઓ વચ્ચે ચાલેલી લાંબી વાટાઘાટો બાદ આ સોદો ₹૧૫ લાખની રકમ આપવા પર નક્કી થયો હતો. જોકે, સંસ્થાના વહીવટી અધિકારીઓએ આ ગેરકાયદેસર વસૂલાત સામે ઝૂકવાના બદલે ઠાણે ક્રાઇમ બ્રાન્ચના એન્ટી-એક્સ્ટોર્શન સેલનો સંપર્ક સાધી સમગ્ર હકીકત જણાવી દીધી હતી. પોલીસે તાત્કાલિક એક્શનમાં આવીને આરોપીઓને પકડવા માટે પાંચપાખડીમાં આવેલા એક જાણીતા કોમ્પ્લેક્સ ખાતે ગુપ્ત જાળ બિછાવી હતી અને વહીવટી અધિકારીને કેમિકલવાળી નોટોની બેગ આપીને મોકલ્યા હતા.
Extortion Case – તોતિંગ રકમ સ્વીકારતા જ આરોપીઓ નૌપાડા પોલીસના સકંજામાં, BNS હેઠળ ગુનો દાખલ
યોજના મુજબ, જ્યારે ફરિયાદી અધિકારી ખંડણીની રકમ લઈને નિયત સ્થળે પહોંચ્યા, ત્યારે આસપાસ સાદા કપડામાં તૈનાત ક્રાઇમ બ્રાન્ચના જવાનોએ બંને આરોપીઓને ૧૫ લાખની રોકડ સ્વીકારતા જ રંગેહાથ દબોચી લીધા હતા. પકડાયેલા નકલી આરટીઆઈ એક્ટિવિસ્ટો સામે ઠાણેના નૌપાડા પોલીસ સ્ટેશનમાં ભારતીય ન્યાય સંહિતાની સંબંધિત કલમો હેઠળ વસૂલાત (ખંડણી) અને ગુનાહિત કાવતરાનો ગુનો દાખલ કરવામાં આવ્યો છે. પોલીસ હવે એ દિશામાં તપાસ કરી રહી છે કે આ ગેંગે અગાઉ અન્ય કેટલી સંસ્થાઓ કે બિલ્ડરોને આ રીતે બ્લેકમેઇલ કરીને નાણાં પડાવ્યા છે.
👉 આ સમાચાર વાચો:
Aksa Beach Incident મલાડના પ્રખ્યાત અક્સા બીચ પર ૧૭ વર્ષનો કિશોર દરિયામાં ડૂબ્યો; મોટું સર્ચ ઓપરેશન શરૂ
