News Continuous Bureau | Mumbai
GMLR Phase One Flyover મુંબઈ સબર્બન વિસ્તારમાં રોજબરોજ કલાકો સુધી ટ્રાફિક જામની (Mumbai Traffic Jam) સમસ્યાનો સામનો કરતા લાખો વાહનચાલકો માટે એક ખુશીના અને મહત્વના સમાચાર સામે આવ્યા છે. મુંબઈ મહાનગરપાલિકા (BMC) ના મહત્વાકાંક્ષી ‘ગોરેગાંવમુલુંડ લિંક રોડ’ (GMLR Project) પ્રોજેક્ટ હેઠળ બની રહેલા પ્રથમ તબક્કાના રોડનું કામ હવે તેના અંતિમ ચરણમાં પહોંચી ગયું છે. સત્તાવાર મ્યુનિસિપલ કોર્પોરેશનના અહેવાલો અનુસાર, વેસ્ટર્ન એક્સપ્રેસ હાઈવેને કનેક્ટ કરતો દિંડોશી કોર્ટથી ગોરેગાંવ ફિલ્મસિટી વચ્ચેનો ૧.૨ કિલોમીટર લાંબો ઉડાનપૂલ (Elevated Flyover) આગામી સપ્ટેમ્બર ૨૦૨૬ સુધીમાં સંપૂર્ણપણે વાહનવ્યવહાર માટે ખુલ્લો મુકવામાં આવશે.
GMLR Phase One Flyover – ક્યાંથી ક્યાં સુધી લંબાશે આ બ્રિજ અને કેવી રીતે ટ્રાફિકની ગૂંચ ઉકેલાશે?
૧.૨ કિલોમીટર લંબાઈ ધરાવતો આ અદ્યતન સિક્સ-લેન ફ્લાયઓવર પશ્ચિમ દ્રુતગતિ મહામાર્ગ (WEH) ની બાજુમાં આવેલા દિંડોશી કોર્ટથી શરૂ થાય છે અને સીધો સંજય ગાંધી રાષ્ટ્રીય ઉદ્યાન (SGNP) તેમજ દાદાસાહેબ ફાળકે ચિત્રનગરી (Film City) ના પ્રવેશદ્વાર પાસે જઈને સમાપ્ત થાય છે. હાલમાં પીક અવર્સ દરમિયાન ગોરેગાંવ અને ડીંડોશીના વિસ્તારો વાહનોથી સંપૂર્ણપણે ચોકઅપ થઈ જાય છે. આ બ્રિજ કાર્યરત થતાં જ પૂર્વ ઉપનગરો (Eastern Suburbs) તરફ જતા વાહનોને એક નવો અને અવરોધ વિનાનો એલિવેટેડ કોરિડોર મળશે, જેનાથી મુખ્ય હાઈવે પર ટ્રાફિકનો ભાર નોંધપાત્ર રીતે ઓછો થશે.
GMLR Phase One Flyover – મે મહિનાની સમયમર્યાદા કેમ લંબાવી પડી? હાલમાં કઈ કામગીરી ચાલુ છે
બીએમસીના એડિશનલ મ્યુનિસિપલ કમિશનર (પ્રોજેક્ટ્સ) અભિજીત બાંગરના જણાવ્યા મુજબ, અગાઉ આ ઉડાનપૂલને ચોમાસા પહેલા એટલે કે મે ૨૦૨૬ ના અંત સુધીમાં ખોલવાનું આયોજન હતું. જો કે, કનેક્ટિવિટીના અંતિમ તબક્કાના સ્ટ્રક્ચરલ ફેરફારો અને ટ્રાફિક ડાયવર્ઝનની મંજૂરીઓમાં વિલંબ થવાને કારણે આ ડેડલાઈન સપ્ટેમ્બર સુધી લંબાવવામાં આવી છે. હાલમાં બ્રિજના તમામ ૩૧ પિલરોનું સિવિલ કન્સ્ટ્રક્શન પૂરું થઈ ગયું છે અને રસ્તા પર ડામર નાખવા (Asphalt Laying), આધુનિક સિગ્નલ સિસ્ટમ ઇન્સ્ટોલ કરવા, વોક-વે અને દિશાપ્રદર્શક સાઇનબોર્ડ લગાવવા જેવી અંતિમ તબક્કાની ફિનિશિંગ કામગીરી યુદ્ધના ધોરણે ચાલી રહી છે.
GMLR Phase One Flyover – ૧૪,૦૦૦ કરોડના મેગા પ્રોજેક્ટનો પ્રથમ ભાગ, જુડવા ટનલનું કામ પણ વેગમાં
આશરે ૩૦0 કરોડ રૂપિયાના ખર્ચે બનેલો આ ફ્લાયઓવર વાસ્તવમાં સમગ્ર ૧૪,૦૦૦ કરોડના GMLR પ્રોજેક્ટનો એક નાનો હિસ્સો છે. આ પ્રોજેક્ટના આગામી તબક્કામાં સંજય ગાંધી નેશનલ પાર્કની નીચેથી પસાર થતી ૪.૭ કિલોમીટર લાંબી અદભુત જુડવા અંડરગ્રાઉન્ડ ટનલ (Twin Tunnels) બનાવવામાં આવી રહી છે, જેનું ટનલ બોરિંગ મશીન (TBM) દ્વારા ખોદકામ શરૂ થઈ ચૂક્યું છે. આ અંડરગ્રાઉન્ડ ટનલનું કામ વર્ષ ૨૦૨૭-૨૦૨૮ સુધીમાં પૂર્ણ કરવાનું લક્ષ્ય છે. એકવાર આખો પ્રોજેક્ટ તૈયાર થઈ ગયા પછી, ગોરેગાંવથી મુલુંડ વચ્ચે મુસાફરી કરવાનો સમય ૮૫ મિનિટથી ઘટીને માત્ર ૧૫ તે ૨૦ મિનિટ થઈ જશે જે મુંબઈના પૂર્વ-પશ્ચિમ જોડાણ માટે ગેમ-ચેન્જર સાબિત થશે.
👉 આ સમાચાર વાચો:
Mumbai Monsoon Illness Guide ચોમાસુ ગયું, રોગચાળો લાવ્યું! મુંબઈમાં દર્દીઓમાં ૨૦ ટકા ઉછાળો, એક ક્લિકમાં વાંચો બચવાના અસરકારક ઉપાયો.
