News Continuous Bureau | Mumbai
Govandi Crime: મુંબઈના ગોવંડી વિસ્તારમાં રમતગમતની સામાન્ય હરીફાઈએ હિંસક સ્વરૂપ ધારણ કરતા ચકચાર મચી ગઈ છે. ક્રિકેટની મેચ અધવચ્ચે છોડીને ઘરે જવા જેવી સાધારણ બાબતે ઉશ્કેરાઈ ગયેલા બે સગીર મિત્રોએ તેમના જ 14 વર્ષીય સાથીદાર પર છરી વડે હુમલો કર્યો હોવાની ચોંકાવનારી ઘટના સામે આવી છે. આ હુમલામાં ઘાયલ થયેલ સગીર હાલ હોસ્પિટલમાં સારવાર હેઠળ છે અને તેની હાલત સ્થિર હોવાનું જણાવાયું છે.
મેચ છોડીને ઘરે જવા જેવી સામાન્ય બાબતે વિવાદ વકર્યો
પ્રાપ્ત વિગતો મુજબ, આ ઘટના બૈંગણવાડી વિસ્તારના એક મેદાન પાસે બની હતી. ભોગ બનનાર સગીર, જેણે તાજેતરમાં જ ધોરણ 10 ની પરીક્ષા આપી હતી, તે તેના બે સગીર મિત્રો સાથે ક્રિકેટ રમવા અને જોવા ગયો હતો. રમત દરમિયાન તેના પરિવારે તેને કામ અર્થે ઘરે બોલાવતા તે મેચ અધવચ્ચે છોડીને જતો રહ્યો હતો. આ બાબતથી બંને સગીર આરોપીઓ ભારે રોષે ભરાયા હતા અને બદલો લેવાનું નક્કી કર્યું હતું.
આ સમાચાર પણ વાંચો : Dadar Murder Mystery: દાદરમાં મિત્રએ જ મિત્રની પત્નીની નજર સામે કરી હત્યા: બેન્જો વગાડવાની જૂની અદાવતમાં લોહી વહ્યું, 6 શખ્સો ઝડપાયા
રાત્રિના સમયે છરીના ઘા ઝીંકી આરોપીઓ થયા ફરાર
રાત્રિના સમયે જ્યારે ભોગ બનનાર સગીર એક દુકાન પાસે ઉભો હતો, ત્યારે બંને આરોપીઓ ત્યાં પહોંચ્યા હતા. “મેચ છોડીને જવાની હિંમત કેવી રીતે થઈ?” તેમ કહીને તેમણે ઉગ્ર બોલાચાલી શરૂ કરી હતી. વિવાદ એટલો વકર્યો કે એક આરોપીએ પોતાની પાસે રહેલી છરી કાઢી સગીરના પેટમાં ઘા ઝીંકી દીધા હતા. હુમલો કર્યા બાદ બંને આરોપીઓ ઘટનાસ્થળેથી ફરાર થઈ ગયા હતા. લોહીલુહાણ હાલતમાં સગીરને તાત્કાલિક હોસ્પિટલમાં ખસેડવામાં આવ્યો હતો.
શિવાજીનગર પોલીસની ત્વરિત કાર્યવાહી: આરોપીઓ જેલના સળિયા પાછળ
આ ઘટનાની જાણ થતા જ શિવાજીનગર પોલીસે હત્યાના પ્રયાસ હેઠળ ગુનો નોંધી તપાસના ચક્રો ગતિમાન કર્યા હતા. પોલીસે ગણતરીના કલાકોમાં જ ટેકનિકલ તપાસ અને બાતમીદારોની મદદથી બંને સગીર આરોપીઓની અટકાયત કરી લીધી હતી. આરોપીઓની ઉંમર 18 વર્ષથી ઓછી હોવાથી કાયદાકીય પ્રક્રિયા પૂર્ણ કરી તેમને રિમાન્ડ હોમમાં મોકલી દેવામાં આવ્યા છે. આ ઘટનાએ વાલીઓમાં સગીરોમાં વધતી જતી હિંસક વૃત્તિ અંગે ચિંતા જન્માવી છે.
