News Continuous Bureau | Mumbai
મુંબઈમાં સરકારી નોકરીની લાલચ આપી નિર્દોષ લોકોને છેતરતી ટોળકીઓ ફરી બેફામ બની છે. તાજેતરમાં ઘાટકોપર વિસ્તારમાં રહેતી અને બેસ્ટ (BEST) માં મહિલા કંડક્ટર તરીકે ફરજ બજાવતી એક મહિલા સાથે ભારતીય નૌકાદળમાં નોકરી અપાવવાના બહાને ₹2.01 લાખની છેતરપિંડી થઈ હોવાની ઘટના સામે આવી છે. આરોપીએ પોતાને નૌકાદળના ઉચ્ચ અધિકારી તરીકે ઓળખાવી આ ગુનો આચર્યો હતો.
બસ સ્ટોપ પર થઈ હતી ઓળખાણ
આ ઘટનાની શરૂઆત ત્યારે થઈ જ્યારે ફરિયાદી મહિલા જે.જે. હોસ્પિટલ બસ સ્ટોપ પર પોતાની ફરજ પર હતી. તે સમયે આરોપી ત્યાં આવ્યો અને પોતાની ઓળખ નેવી ઓફિસર તરીકે આપી હતી. તેણે મહિલાને વિશ્વાસમાં લીધી કે તેનો નૌકાદળમાં મોટો પ્રભાવ છે અને તે મહિલાની બે દીકરીઓને ક્લાર્કની કાયમી સરકારી નોકરી અપાવી શકે છે.
આ સમાચાર પણ વાંચો : Job Fraud in Mumbai: મોરેશિયસમાં નોકરીની લાલચ આપી એરપોર્ટ પર કામદારોને નોંધારા મૂકી એજન્ટ ₹4.42 લાખ લઈ ફરાર
નકલી દસ્તાવેજો બતાવી ખંખેર્યા લાખો રૂપિયા
મહિલાનો વિશ્વાસ જીતવા માટે ઠગ દ્વારા નકલી આઈડી કાર્ડ અને એપોઈન્ટમેન્ટ લેટર પણ બતાવવામાં આવ્યા હતા. ત્યારબાદ મેડિકલ સર્ટિફિકેટ, યુનિફોર્મની સિલાઈ, હોસ્ટેલ ફી અને સિક્યોરિટી ડિપોઝિટ જેવા વિવિધ બહાના હેઠળ આરોપીએ કટકે-કટકે કુલ ₹2,01,000 ઓનલાઈન ટ્રાન્સફર કરાવ્યા હતા.
INS શિકરા ઓફિસે ફૂટ્યો ભાંડો
જ્યારે ટ્રેનિંગ અને જોઈનિંગની તારીખો વારંવાર લંબાતી ગઈ, ત્યારે મહિલાને શંકા ગઈ હતી. સત્ય જાણવા માટે તે કુલાબા સ્થિત INS શિકરા (INS Shikra) ઓફિસે પહોંચી હતી. ત્યાં તપાસ કરતા જાણવા મળ્યું કે આ નામનો કોઈ વ્યક્તિ ત્યાં ફરજ બજાવતો નથી અને તેની પાસે રહેલા તમામ દસ્તાવેજો નકલી છે. છેતરપિંડીનો અહેસાસ થતા મહિલાએ ઘાટકોપર પોલીસનો સંપર્ક કર્યો હતો. પોલીસે હાલ ગુનો નોંધી આરોપીની શોધખોળ શરૂ કરી છે.
