News Continuous Bureau | Mumbai
Kandivali Police મુંબઈના કાંદિવલી વિસ્તારમાં ટ્રાફિકના નિયમોનું ઉલ્લંઘન કરનારા યુવકોએ પોલીસ સાથે ગેરવર્તણૂક કરી હોવાની ચોંકાવનારી ઘટના સામે આવી છે. કાંદિવલી સ્ટેશન રોડ પર એક જ મોટરસાઇકલ પર ચાર સવારી જઈ રહેલા યુવકોને જ્યારે પોલીસ કોન્સ્ટેબલે અટકાવ્યા, ત્યારે દંડ ભરવાને બદલે તેમણે પોલીસ સાથે ગેરવર્તણૂક કરી ધમકી આપી હતી. આ મામલે સમતાનગર પોલીસે ચારેય આરોપીઓ વિરુદ્ધ ગુનો નોંધી તેમની ધરપકડ કરી છે.ઘટના કાંદિવલી સ્ટેશન રોડ પર આદર્શ જ્યુસ સેન્ટર પાસે બની હતી. સમતાનગર પોલીસ સ્ટેશનના કોન્સ્ટેબલ નાઈટ પેટ્રોલિંગ પર હતા ત્યારે તેમણે એક બાઇક પર ચાર યુવકોને જોખમી રીતે સવારી કરતા જોયા હતા. કોન્સ્ટેબલે બાઇક રોકીને ચાલક પાસે લાયસન્સની માંગણી કરી નિયમભંગ બદલ પોલીસ સ્ટેશન આવવા જણાવ્યું હતું, જે વાત પર યુવકો ઉશ્કેરાઈ ગયા હતા.
પોલીસ સ્ટેશન આવવાના બદલે દલીલબાજી અને હોબાળો
પોલીસ સ્ટેશન જવાના બદલે ચારેય યુવકોએ કોન્સ્ટેબલ સાથે દલીલબાજી શરૂ કરી હતી અને અપશબ્દો બોલી ધમકી આપી હતી. પોતાની ભૂલ સ્વીકારવાને બદલે યુવકોએ ત્યાં લોકોની ભીડ જમા કરી હોબાળો મચાવ્યો હતો અને ઉલટાનું પોલીસનું જ વીડિયો રેકોર્ડિંગ શરૂ કરીને દબાણ લાવવાનો પ્રયાસ કર્યો હતો. આરોપીઓએ પોલીસને પડકાર ફેંક્યો હતો કે, “જોઈએ છીએ તું અમને પોલીસ સ્ટેશન કેવી રીતે લઈ જાય છે.”
પોલીસ કાફલો પહોંચતા જ યુવકોની શાન ઠેકાણે આવી
પરિસ્થિતિ વધુ વણસતા કોન્સ્ટેબલે તુરંત કંટ્રોલ રૂમને જાણ કરી પોલીસ વેન બોલાવી હતી. વધારાનો પોલીસ કાફલો ઘટનાસ્થળે પહોંચતા જ હોબાળો મચાવતા ચારેય યુવકો નરમ પડી ગયા હતા. પોલીસે ત્વરિત કાર્યવાહી કરીને ચારેયને તાબામાં લીધા હતા. ટ્રાફિક નિયમોનું પાલન કરાવવા ગયેલા પોલીસકર્મી પર રોફ ઝાડવો આ યુવકોને ભારે પડ્યો છે.
આ સમાચાર પણ વાંચો : PM Modi Israel Visit 2026: ‘પ્રિય મિત્ર મોદી…’ નેતન્યાહુના એક મેસેજે દુનિયાભરનું ધ્યાન ખેંચ્યું; ભારત-ઇઝરાયેલ સંબંધો નવી ઊંચાઈએ.
BNS હેઠળ ગુનો નોંધી જેલ ભેગા કરાયા
પોલીસે આ મામલે ચાર યુવકોની ધરપકડ કરી છે. તેમની વિરુદ્ધ ભારતીય ન્યાય સંહિતા (BNS) ની વિવિધ કલમો હેઠળ સરકારી કર્મચારીની ફરજમાં અવરોધ ઊભો કરવા, અપશબ્દો બોલવા અને ગેરવર્તણૂક કરવા બદલ ગુનો નોંધવામાં આવ્યો છે. હાલ ચારેય આરોપીઓ જેલની હવા ખાઈ રહ્યા છે. પોલીસે સ્પષ્ટ કર્યું છે કે કાયદો હાથમાં લેનારા કે ફરજ પરના કર્મચારીઓ સાથે અભદ્ર વર્તન કરનારાઓને છોડવામાં આવશે નહીં.
