News Continuous Bureau | Mumbai
Mahim Knife Attack Case મુંબઈના માહિમ રેલવે સ્ટેશનની બહાર ફૂટપાથ પર પગપાળા ચાલીને ઘરે પરત ફરી રહેલા ૩૫ વર્ષીય ઓફિસ કર્મચારી પર જીવલેણ હુમલો થવાની ચોંકાવનારી ઘટના સામે આવી છે. માત્ર એક નાનો ધક્કો વાગવાના કારણે મોબાઈલ ફોન પડી જવાની નજીવી બાબતમાં ૧૯ વર્ષના આરોપીએ પીડિતના પેટમાં ચપ્પુના ઉપરાછાપરી ઘા ઝીંકી દીધા હતા. માહિમ પોલીસે ગણતરીના કલાકોમાં સીસીટીવી ફૂટેજના આધારે આરોપીની ધરપકડ કરી લીધી છે.
Mahim Knife Attack Case – મોબાઈલ તૂટવાનો દાવો કરી પૈસા માંગ્યા, ઇનકાર કરતા જ કર્યો હુમલો
પોલીસ સૂત્રો અને એફઆઈઆર અનુસાર, પીડિત યુવક લોઅર પરેલ ખાતે એક ખાનગી કંપનીમાં ઓફિસ બોય તરીકે કામ કરે છે. રાત્રે ડ્યુટી પૂરી કરીને માહિમ સ્ટેશનની બહાર ફૂટપાથ પર ચાલતી વખતે ભૂલથી તેનો ધક્કો આરોપીને વાગી ગયો હતો. આરોપીએ ધક્કાને કારણે પોતાનો મોબાઈલ ફોન તૂટી ગયો હોવાનો દાવો કરીને તાત્કાલિક વળતરના પૈસાની માંગણી કરી હતી. પીડિતે પૈસા આપવાનો ઇનકાર કરતાં ઉશ્કેરાયેલા આરોપીએ ખિસ્સામાંથી ચપ્પુ કાઢીને તેના પેટમાં ઘા ઝીંકી દીધા હતા અને ત્યાંથી ફરાર થઈ ગયો હતો.
Mahim Knife Attack Case – સાયન હોસ્પિટલમાં ઓપરેશન બાદ પીડિતને આવ્યા ૧૬ ટાંકા
આ જીવલેણ હુમલા બાદ લોહીલુહાણ હાલતમાં પીડિતને તાત્કાલિક સારવાર માટે સાયન હોસ્પિટલમાં દાખલ કરવામાં આવ્યો હતો. ચપ્પુના ઘા એટલા ગંભીર હતા કે ડૉક્ટરોએ પીડિતના પેટનું ઓપરેશન કરવું પડ્યું હતું અને તેને ૧૬ ટાંકા આવ્યા છે. સદનસીબે યોગ્ય સમયે સારવાર મળવાને કારણે પીડિતની હાલત હાલ સ્થિર હોવાનું જાણવા મળ્યું છે. મુંબઈ લોકલ ટ્રેનમાં બનેલી હત્યાની ઘટનાની શાહી હજુ સુકાઈ નથી ત્યાં બનેલી આ ઘટનાથી સ્થાનિક લોકોમાં રોષ જોવા મળી રહ્યો છે.
Mahim Knife Attack Case – માહિમ પોલીસે હત્યાના પ્રયાસનો ગુનો નોંધી આરોપીને દબોચ્યો
માહિમ પોલીસે આ ગંભીર મામલે તાત્કાલિક એક્શન મોડમાં આવીને ભારતીય ન્યાય સંહિતાની કલમ ૧૦૯(૧) હેઠળ હત્યાના પ્રયાસનો ગુનો નોંધ્યો છે. પોલીસે ઘટનાસ્થળની આસપાસના સીસીટીવી ફૂટેજ તપાસીને આરોપીને શોધી કાઢ્યો છે અને તેની ધરપકડ કરી લીધી છે. ગુનામાં વપરાયેલું હથિયાર રિકવર કરવા અને આરોપીના ગુનાહિત ઇતિહાસની તપાસ કરવા માટે પોલીસ હાલ રિમાન્ડ મેળવીને વધુ તપાસ ચલાવી રહી છે.
👉 આ સમાચાર વાચો:
Bribery Case Thane શાળામાં એડમિશનના નામે ૭૭ હજારની લાંચ લેતા બે વચેટિયાને એન્ટીકરપ્શન બ્યુરોએ ઝડપ્યા
