News Continuous Bureau | Mumbai
Mumbai Gold Heist। મુંબઈના દાદર વિસ્તારમાં જ્વેલરી બનાવનારી ફેક્ટરી બંધ કરીને આશરે ૩ કિલો સોનું પડાવી ભાગી જવાના હાઈપ્રોફાઈલ કેસનો શિવાજી પાર્ક પોલીસે પર્દાફાશ કર્યો છે. પોલીસે ટેકનિકલ સર્વેલન્સ અને આંતરરાજ્ય તપાસના આધારે ગણતરીના દિવસોમાં આરોપીને પશ્ચિમ બંગાળના હુગલી જિલ્લામાંથી શોધી કાઢીને તેની અટકાયત કરી લીધી છે. બજારમાં આ ચોરાયેલા સોનાની કિંમત ૪.૫૧ કરોડથી વધુ આંકવામાં આવી રહી છે.
સોનું બનાવવા આપેલા દાગીના ઉપાડી ને આરોપીએ રાતોરાત યુનિટને તાળા માર્યા
શિવાજી પાર્ક પોલીસ સ્ટેશનના વરિષ્ઠ અધિકારીઓ પાસેથી મળતી વિગતો અનુસાર, આરોપી દાદરમાં એક જ્વેલરી મેન્યુફેક્ચરિંગ યુનિટ ચલાવતો હતો. સ્થાનિક વેપારીઓ ગ્રાહકોએ તેને દાગીના બનાવવા તેમજ અન્ય કામો માટે આશરે ૩ કિલોગ્રામ જેટલું શુદ્ધ સોનું સોંપ્યું હતું. જોકે, આરોપીના મનમાં લાલચ જાગતાં તેણે રાતોરાત પોતાની આખી ફેક્ટરીને તાળા મારી દીધા હતા અને સોનાનો મોટો જથ્થો લઈને મુંબઈમાંથી ગાયબ થઈ ગયો હતો. વેપારીઓએ જ્યારે ફેક્ટરી બંધ જોઈ અને આરોપીનો ફોન પણ સ્વિચ ઓફ આવ્યો, ત્યારે તેમને છેતરપિંડી થઈ હોવાનો અહેસાસ થયો હતો.
મુંબઈ પોલીસની સ્પેશિયલ ટીમ પશ્ચિમ બંગાળ રવાના, હુગલીમાંથી ઝડપાયો ઠગ
કરોડો રૂપિયાની છેતરપિંડી અને વિશ્વાસઘાતની આ ગંભીર ઘટના અંગે શિવાજી પાર્ક પોલીસ સ્ટેશનમાં સત્તાવાર ગુનો દાખલ કરવામાં આવ્યો હતો. કેસની ગંભીરતાને જોઈને વરિષ્ઠ અધિકારીઓએ તાત્કાલિક એક ખાસ તપાસ ટીમની રચના કરી હતી. પોલીસે આરોપીના મોબાઈલ લોકેશન, કોલ ડિટેઈલ્સ અને ટેકનિકલ ડેટાનું ઝીણવટભર્યું એનાલિસિસ કર્યું હતું. તપાસ દરમિયાન જાણવા મળ્યું કે આરોપી મુંબઈ છોડીને પશ્ચિમ બંગાળના હુગલી જિલ્લામાં ક્યાંક છુપાયો છે. મુંબઈ પોલીસની એક ટીમ તાત્કાલિક પશ્ચિમ બંગાળ રવાના થઈ હતી અને ત્યાંની સ્થાનિક પોલીસની મદદથી સફળતાપૂર્વક દરોડો પાડીને આરોપીને દબોચી લીધો હતો.
આરોપીને મુંબઈ લાવવાની પ્રક્રિયા શરૂ, ચોરાયેલું સોનું શોધવા પોલીસે ચક્રો ગતિમાન કર્યા
હાલમાં શિવાજી પાર્ક પોલીસ આરોપીને ટ્રાન્ઝિટ રિમાન્ડ પર મુંબઈ લાવવાની તજવીજ હાથ ધરી રહી છે. મુંબઈ લાવ્યા બાદ કોર્ટમાં રજૂ કરીને તેના પોલીસ રિમાન્ડ મેળવવામાં આવશે. પોલીસ હવે એ દિશામાં સઘન પૂછપરછ અને તપાસ કરી રહી છે કે આરોપીએ ૪.૫૧ કરોડની કિંમતનું આ ૩ કિલો સોનું ક્યાં છુપાવી રાખ્યું છે અથવા તો તેને કોઈ ત્રીજી વ્યક્તિને વેચી માર્યું છે કે કેમ. આ હાઈ-પ્રોફાઈલ કેસ ઉકેલાતા દાદર પંથકના સ્થાનિક ઝવેરીઓ અને વેપારીઓએ રાહતનો શ્વાસ લીધો છે અને મુંબઈ પોલીસની કામગીરીની પ્રશંસા કરી છે.
👉 આ સમાચાર વાચો:
Shani Chandra Shadashtak।શનિદેવની વક્રદૃષ્ટિ આજથી આ ૪ રાશિઓ દૂધ પણ ફૂંકી ફૂંકીને પીશે! શનિચંદ્રનો અશુભ ષડાષ્ટક યોગ લેશે આકરી પરીક્ષા
