News Continuous Bureau | Mumbai
Malad Hit and Run મુંબઈના માલાડ વિસ્તારમાં એક અત્યંત દુખદ હિટ એન્ડ રનની ઘટના સામે આવી છે. સિંગ પરિવારમાં લગ્નનો પ્રસંગ હતો અને ખુશીઓનો માહોલ હતો, પરંતુ વિધિની વક્રતા તો જુઓ કે જે બાળકની પ્રાપ્તિ માટે માતા-પિતાએ ૨૦ વર્ષ સુધી રાહ જોઈ હતી, તે ૪ વર્ષના માસૂમ લક્ષ્યનું એક કાર અકસ્માતમાં કરુણ મોત નીપજ્યું છે. આ ઘટનાએ સમગ્ર વિસ્તારમાં અરેરાટી ફેલાવી દીધી છે.
સીસીટીવી (CCTV) માં કેદ થઈ રુંવાડા ઉભા કરી દે તેવી ઘટના
આ ઘટના માલાડ પૂર્વની નીલયોગ વિરાટ બિલ્ડિંગમાં બની હતી. ૪ વર્ષનો લક્ષ્ય બિલ્ડિંગના કમ્પાઉન્ડમાં રમી રહ્યો હતો, ત્યારે એક પૂરપાટ ઝડપે આવતી ઈનોવા ક્રિસ્ટા કારે તેને જોરદાર ટક્કર મારી હતી. સીસીટીવી ફૂટેજમાં દેખાય છે કે કાર ચાલકે બાળકને ટક્કર માર્યા બાદ થોડે દૂર ગાડી થોભાવી હતી, પરંતુ તે મદદ કરવાને બદલે સિક્યુરિટી ગાર્ડને જાણ કરી ત્યાંથી ફરાર થઈ ગયો હતો. લક્ષ્યના પિતા જયપ્રકાશ સિંહનો આરોપ છે કે ડ્રાઈવરે તેમના પુત્રને ગાડી સાથે ઢસડ્યો હતો.
૨૦ વર્ષની પ્રતીક્ષા બાદ મળ્યું હતું સંતાન સુખ
મૃતક લક્ષ્યના પિતાએ અત્યંત ભારે હૈયે જણાવ્યું કે, તેમના લગ્નના ૨૦ વર્ષ બાદ લક્ષ્યનો જન્મ થયો હતો. આટલા વર્ષોની માનતા અને પ્રતીક્ષા બાદ આવેલા સંતાનને આ રીતે લોહીલુહાણ હાલતમાં જોવો એ માતા-પિતા માટે જીવતે જીવ મૃત્યુ સમાન છે. પિતાએ એમ પણ કહ્યું કે જો કાર ચાલક તેને તાત્કાલિક હોસ્પિટલ લઈ ગયો હોત, તો કદાચ લક્ષ્યનો જીવ બચી શક્યો હોત.
આ સમાચાર પણ વાંચો : Maharashtra ZP Election Results: શરદ પવાર અને કોંગ્રેસના ગઢમાં ગાબડું! મહાયુતિએ ગ્રામીણ બેલ્ટમાં મચાવ્યો ખળભળાટ, ૮૦% ની જીત સાથે ભાજપ બન્યો મહારાષ્ટ્રનો અજેય કિલ્લો
પોલીસની કાર્યવાહી અને આરોપીની ધરપકડ
આ મામલે પિતાએ ગંભીર આરોપ લગાવ્યો કે પોલીસે પહેલા ગુનો નોંધીને આરોપીને જામીન આપવાની તૈયારી કરી લીધી હતી. જોકે, પરિવારના વિરોધ બાદ પોલીસે કડક વલણ અપનાવ્યું. દિંડોશી પોલીસે આ મામલે FIR નોંધી છે અને ઈનોવા કારના ચાલક ની ધરપકડ કરી છે. આરોપી નું તે જ બિલ્ડિંગમાં પાર્કિંગ છે પરંતુ તે અન્યત્ર રહે છે. પરિવારે આરોપી વિરુદ્ધ સખત સજાની માંગ કરી છે.
