News Continuous Bureau | Mumbai
BMC Eid Permission| મહારાષ્ટ્રમાં બકરી ઈદના તહેવાર વચ્ચે અનેક વિસ્તારોમાં વિવાદની સ્થિતિ જોવા મળી રહી છે. આ કડીમાં નવો મામલો મુંબઈના ગોરેગાંવ વિસ્તારમાંથી સામે આવ્યો છે. ગોરેગાંવ પૂર્વમાં આવેલી એક રહેણાંક સોસાયટીના કમ્પાઉન્ડમાં કુરબાની માટે ખાસ શેડ બનાવવામાં આવ્યો હતો અને ત્યાં બકરા પણ લાવવામાં આવ્યા હતા. જોકે, બૃહન્મુંબઈ મ્યુનિસિપલ કોર્પોરેશન (BMC) એ તહેવારની બરાબર એક રાત પહેલા સોસાયટી પરિસરમાં કુરબાની આપવાની આપેલી સત્તાવાર પરવાનગી અચાનક રદ્દ કરી દેતા હોબાળો મચી ગયો છે.
ભાજપના સ્થાનિક કોર્પોરેટર પ્રીતિ સાટમે પત્ર લખીને નોંધાવ્યો હતો વિરોધ
આ સમગ્ર મામલે ભારતીય જનતા પક્ષ (BJP) ના સ્થાનિક મહિલા કોર્પોરેટર પ્રીતિ સાટમે પાલિકાના વોર્ડ ઓફિસરને એક સખત પત્ર લખીને આ પરવાનગીનો વિરોધ કર્યો હતો. તેમણે નિયમોનો હવાલો આપતા પત્રમાં લખ્યું હતું કે, સંબંધિત સોસાયટીની બિલકુલ નજીકમાં જ એક સ્કૂલ અને હિન્દુ ધાર્મિક સ્થળ આવેલા છે. આ સંજોગોમાં સોસાયટીની અંદર કુરબાની આપવાની મંજૂરી આપવી યોગ્ય નથી. તેનાથી હિન્દુ સમુદાયની ધાર્મિક લાગણીઓ દુભાઈ શકે છે અને વિસ્તારમાં કાયદો તેમજ વ્યવસ્થાની સ્થિતિ બગડવાનો મોટો પ્રશ્ન ઊભો થઈ શકે છે. કોર્પોરેટરના આ પત્ર બાદ પાલિકાએ તાત્કાલિક એક્શન લીધા હતા.
મુસ્લિમ સમાજનો આક્રોશ: ‘રાજકારણના કારણે છેલ્લી ઘડીએ પરમિશન રદ્દ કરાઈ’
બીજી તરફ, પાલિકાના આ આકસ્મિક નિર્ણયથી મુસ્લિમ સમાજમાં ભારે આક્રોશ અને નારાજગી જોવા મળી રહી છે. સ્થાનિક મુસ્લિમ નાગરિકોનું કહેવું છે કે, ભાજપના રાજકીય દબાણના કારણે જ બીએમસીએ છેલ્લી ઘડીએ સોસાયટીમાં કુરબાની આપવાની પરમિશન કેન્સલ કરી દીધી છે. તેમણે આક્ષેપ કર્યો કે લોકપ્રતિનિધિઓએ તમામ ધર્મના લોકોને સાથે લઈને ચાલવું જોઈએ, પરંતુ છેલ્લા બે વર્ષથી જાણીજોઈને તહેવારના સમયે જ અમારી સાથે આવું કરવામાં આવી રહ્યું છે જે સંપૂર્ણપણે અન્યાયી છે. પરવાનગી રદ્દ થઈ હોવા છતાં સોસાયટી પરિસરમાં હજુ પણ બકરા રાખવામાં આવ્યા હોવાની માહિતી મળી છે.
મહારાષ્ટ્રની અનેક સોસાયટીઓમાં બકરી ઈદ પર કુરબાની મુદ્દે વકરી રહ્યો છે વિવાદ
મુંબઈ અને તેની આસપાસના સેટેલાઈટ શહેરોની રહેણાંક સોસાયટીઓમાં બકરી ઈદ નિમિત્તે બકરા લાવવા અને પરિસરમાં કુરબાની આપવાને લઈને સોસાયટી મેનેજમેન્ટ અને અન્ય સભ્યો વચ્ચે વિવાદો સતત વધી રહ્યા છે. આ અગાઉ ઘાટકોપરની એક સોસાયટીમાં પણ કુરબાની રોકવા માટે હિન્દુ સંગઠનો રસ્તા પર ઉતરી આવ્યા હતા. પ્રશાસન અને પોલીસ દ્વારા આવી સંવેદનશીલ પરિસ્થિતિઓમાં શાંતિ જાળવી રાખવા માટે અગાઉથી જ કડક માર્ગદર્શિકા જાહેર કરવામાં આવી છે, જે મુજબ જાહેર સ્થળો કે બિન-અધિકૃત રહેણાંક વિસ્તારોમાં ખુલ્લામાં કુરબાની આપવા પર કાયદાકીય પ્રતિબંધ છે.
👉 આ સમાચાર વાચો:
Iran Retaliates US। બંદર અબ્બાસ પર હુમલા બાદ ઈરાનનો પલટવાર, અમેરિકી એરબેઝ પર મિસાઈલ એટેક
