News Continuous Bureau | Mumbai
Mumbai Crime News। મુંબઈના ગોરેગાંવ (પૂર્વ) વિસ્તારમાં આવેલી હરિયાળી આરે કોલોનીમાંથી એક હૃદયકંપાવનારો કિસ્સો પ્રકાશમાં આવ્યો છે. અહીં એક પતિએ તેની પત્નીના કથિત પ્રેમીની, પત્નીની નજર સામે જ તીક્ષ્ણ છરી વડે ગળું કાપીને નિર્મમ હત્યા કરી નાખી છે. આ ભયાનક ઘટના બાદ ભાગી રહેલા આરોપીને આરે પોલીસે ગાઢ જંગલમાં સઘન કોમ્બિંગ ઓપરેશન હાથ ધરીને ગણતરીના ૩ કલાકમાં જ દબોચી લીધો છે.
ઘરમાં જ બોલાવી, સાથે દારૂ પીધો અને પછી…
આરે પોલીસ સ્ટેશનના વરિષ્ઠ અધિકારીના જણાવ્યા અનુસાર, આરોપી પતિને લાંબા સમયથી શંકા હતી કે તેની પત્ની અને મૃતક યુવક વચ્ચે પ્રેમ સંબંધ ચાલી રહ્યો છે. આ વિવાદનો કાયમી અંત લાવવા માટે પતિએ એક ખતરનાક પ્લાન બનાવ્યો. તેણે તેની પત્ની અને તે યુવક બંનેને આરે કોલોનીના યુનિટ નંબર ૫ સ્થિત પોતાના ઘરે બોલાવ્યા હતા. મોડી રાત્રે ત્રણેય જણાએ સાથે બેસીને દારૂની મહેફિલ માણી હતી.
બોલાચાલી ઉગ્ર થતાં પત્નીની સામે જ છરીના ઘા ઝીંક્યા
દારૂ પીતી વખતે પતિએ શરૂઆતમાં તે યુવકને કડક શબ્દોમાં ચેતવણી આપી હતી કે તે ભવિષ્યમાં તેની પત્નીને ન મળે અને તેના ઘરે ન આવે. જો કે, થોડી જ વારમાં આ બાબતે બંને વચ્ચે ઉગ્ર બોલાચાલી શરૂ થઈ ગઈ હતી. ગુસ્સામાં ભાન ભૂલેલા પતિએ ઘરમાં રાખેલી તીક્ષ્ણ છરી ઉઠાવી લીધી અને પત્નીની નજર સામે જ યુવક પર તૂટી પડ્યો. તેણે યુવકના ગળા પર છરીના એક પછી એક અનેક ઘા ઝીંકી દીધા, જેથી લોહીલુહાણ હાલતમાં યુવકનું ઘટનાસ્થળે જ કમકમાટીભર્યું મોત નીપજ્યું હતું.
મૃતક યુવક વિરૂદ્ધ અગાઉ છેડતીની ફરિયાદ હતી નોંધાયેલી
પોલીસની પ્રાથમિક તપાસમાં બહાર આવ્યું છે કે, આરોપી પતિએ આ બાબતે અગાઉ પણ તેની પત્ની સાથે મારપીટ કરી હતી. ચોંકાવનારી વાત એ છે કે, મૃતક યુવક વિરૂદ્ધ અગાઉ કાયદાકીય સ્તરે છેડતીની ફરિયાદ પણ નોંધાઈ ચૂકી હતી, તેમ છતાં તે સતત આ મહિલાના સંપર્કમાં રહ્યો હતો. આ જ વાત પતિના મનમાં લાંબા સમયથી ખટકી રહી હતી, જેનો અંજામ આ લોહિયાળ હત્યાકાંડમાં આવ્યો છે.
આરેના જંગલમાંથી ૩ કલાકમાં હત્યારો ઝડપાયો
હત્યાકાંડને અંજામ આપ્યા બાદ આરોપી પતિ મુંબઈ અને રાજ્ય છોડીને ભાગી જવાના ઈરાદે આરેના ગાઢ જંગલ તરફ નાસી છૂટ્યો હતો. ઘટનાની જાણ થતાં જ આરે પોલીસની ત્રણ અલગ-અલગ ટીમો તાત્કાલિક હરકતમાં આવી હતી અને આખું જંગલ ઘેરી લીધું હતું. ભારે જહેમત અને ફિલ્મી ઢબે પીછો કર્યા બાદ પોલીસે ગણતરીના ૩ કલાકની અંદર જ આરોપીને જંગલના અંધારામાંથી ઝડપી પાડ્યો હતો.
👉 આ સમાચાર વાચો:
MSRTC Action। કલ્યાણની બસ વિશે પૂછતા જ મુસાફર યુવકને બેરહેમીથી ઝૂડનાર ST કર્મચારી આખરે સસ્પેન્ડ
