News Continuous Bureau | Mumbai
Mumbai Heavy Rainfall મુંબઈમાં છેલ્લા બે દિવસથી વરસી રહેલા મુશળધાર વરસાદને કારણે જનજીવન અસ્તવ્યસ્ત થઈ ગયું છે. ચોંકાવનારી બાબત એ છે કે, શહેરમાં માત્ર બે દિવસમાં જ જુલાઈ મહિનાની સરેરાશના ૩૩ ટકા જેટલો વરસાદ વરસી ગયો છે. ભારે વરસાદના પગલે શહેરના અનેક નીચાણવાળા વિસ્તારોમાં પાણી ભરાઈ ગયા હતા, જેના કારણે વાહનવ્યવહાર (Traffic) પર ગંભીર અસર જોવા મળી હતી. હવામાન વિભાગે રવિવાર સુધી મુંબઈ માટે ‘ઓરેન્જ એલર્ટ’ (Orange Alert) જાહેર કર્યું છે.
Mumbai Heavy Rainfall – ચોમાસાના આંકડા અને વરસાદની તીવ્રતા
હવામાન વિભાગ (IMD) ના સાન્તાક્રુઝ અને કુલાબા કેન્દ્રના આંકડા મુજબ, છેલ્લા ૨૪ કલાકમાં સાન્તાક્રૂઝમાં ૨૦૪.૬ મીમી અને કુલાબામાં ૧૫૮.૨ મીમી વરસાદની નોંધણી થઈ છે. સામાન્ય રીતે જુલાઈ મહિનામાં કુલાબામાં ૭૩૪.૧ મીમી અને સાન્તાક્રૂઝમાં ૮૫૫.૭ મીમી સરેરાશ વરસાદ પડે છે, જેની સરખામણીએ હાલના બે દિવસનો વરસાદ ઘણો વધારે છે. જૂન મહિનામાં વરસાદની ઘટ બાદ, જુલાઈના પ્રારંભમાં જ મેઘરાજાએ જોરદાર હેટ્રિક મારી હોય તેમ ચોમાસુ સક્રિય થયું છે.
Mumbai Heavy Rainfall – જનજીવન પર અસર અને માર્ગોની સ્થિતિ
બુધવાર રાત્રિથી શરૂ થયેલા અવિરત વરસાદને કારણે ગુરુવારે સવારથી જ મુંબઈના ઘણા ભાગોમાં પાણી ભરાવાની (Waterlogging) સમસ્યા સર્જાઈ હતી. પરેલ, વરલી, પ્રભાદેવી, વીરા દેસાઈ રોડ, હિંદમાતા, અંધેરી સબ-વે (Andheri Subway) અને કિંગ્સ સર્કલ જેવા વિસ્તારોમાં પાણી ભરાતા વાહનોની ગતિ ધીમી પડી ગઈ હતી. સવારના સમયે ઓફિસે જતા નાગરિકોને ભારે હાલાકીનો સામનો કરવો પડ્યો હતો. પરિસ્થિતિની ગંભીરતાને જોતા હવામાન વિભાગે થોડા સમય માટે ‘રેડ એલર્ટ’ (Red Alert) પણ આપ્યો હતો.
Mumbai Heavy Rainfall – હવામાન વિભાગની આગાહી અને ચેતવણી
હવામાન વિભાગની આગાહી મુજબ, આગામી રવિવાર સુધી મુંબઈમાં મુસળધારથી અતિ મુસળધાર વરસાદ ચાલુ રહેશે. સાન્તાક્રૂઝમાં પવનની ગતિ ૫૨ કિમી પ્રતિ કલાક અને કુલાબામાં ૫૬ કિમી પ્રતિ કલાક હોવાનું નોંધાયું છે. તંત્ર દ્વારા નાગરિકોને સાવચેત રહેવાની સલાહ આપવામાં આવી છે, ખાસ કરીને સખલ વિસ્તારોમાં રહેતા લોકોએ એલર્ટ રહેવું જરૂરી છે. ભારે પવન અને વરસાદને પગલે મુંબઈના વિવિધ વિસ્તારોમાં સાવચેતીના ભાગરૂપે પાલિકા દ્વારા પણ તમામ તંત્રને સજ્જ રહેવા સૂચના આપવામાં આવી છે.
👉 આ સમાચાર વાચો:
Ram Mandir Andolan Announcement ‘હવે હિન્દુ માફ નહીં કરે’ રામ મંદિરના કથિત કૌભાંડ સામે ઉદ્ધવ ઠાકરેનું રાજ્યવ્યાપી આંદોલન
