News Continuous Bureau | Mumbai
Mumbai Local Train Scam: મુંબઈની લોકલ ટ્રેનમાં મફત મુસાફરી કરવા માટે નકલી પાસ બનાવનારાઓ વિરુદ્ધ રેલવે પ્રશાસને લાલ આંખ કરી છે. તાજેતરમાં વિક્રોલી રેલવે સ્ટેશન પર ટિકિટ ચેકર (TC) ની હોશિયારીને કારણે એક ૨૨ વર્ષીય યુવક પકડાયો છે, જે ૩ મહિનાનો બોગસ પાસ વાપરીને રેલવે સાથે છેતરપિંડી કરી રહ્યો હતો. રેલવે પોલીસે આરોપી વિરુદ્ધ આઈટી એક્ટ અને છેતરપિંડીની વિવિધ કલમો હેઠળ ગુનો દાખલ કર્યો છે.
૮ ને બદલે ૯ આંકડાના નંબરને કારણે ચોરી પકડાઈ
વિક્રોલી સ્ટેશન પર ટિકિટ એક્ઝામિનર મુસાફરોની ટિકિટ ચેક કરી રહ્યા હતા ત્યારે તેમણે ૨૨ વર્ષીય યુવક પાસે પાસ માંગ્યો હતો. યુવકે જે પાસ બતાવ્યો તેમાં એક ટેકનિકલ ખામી સતર્ક ટિકિટ ચેકરના ધ્યાન પર આવી હતી. અસલી રેલવે પાસમાં UFV (Unique Form Value) નંબર ૮ આંકડાનો હોય છે, જ્યારે આ યુવકના પાસમાં તે ૯ આંકડાનો હતો. આ નાનકડી ભૂલને કારણે આખો ભાંડો ફૂટી ગયો હતો અને યુવકની પોલ ખુલી ગઈ હતી.
આ સમાચાર પણ વાંચો: Mulund Police Station: મુલુંડમાં રિક્ષા ચાલકનો આતંક: પોલીસ સ્ટેશનમાં જ કોન્સ્ટેબલના હાથ પર જોરથી બટકું ભરી લીધું
૨૨ માર્ચે પાસ પૂરો થયો અને ૨૩ માર્ચે જાતે જ એડિટિંગ કર્યું
રેલવેના વોટ્સએપ ગ્રુપમાં પાસનો ફોટો મોકલી ખરાઈ કર્યા બાદ જાણવા મળ્યું કે પાસ સંપૂર્ણપણે નકલી છે. કુર્લા રેલવે પોલીસની પૂછપરછમાં ખુલાસો થયો કે યુવકનો અસલી પાસ ૨૨ માર્ચના રોજ પૂરો થઈ ગયો હતો. નવા પાસના પૈસા બચાવવા માટે તેણે ૨૩ માર્ચના રોજ જાતે જ મોબાઈલમાં એડિટિંગ કરીને આ બોગસ પાસ તૈયાર કર્યો હતો. શરૂઆતમાં તેણે પોતાના મિત્રનું નામ આપીને બચવાનો નિષ્ફળ પ્રયાસ પણ કર્યો હતો.
રેલવે પોલીસ દ્વારા કડક કાર્યવાહીની ચેતવણી
કુર્લા રેલવે પોલીસ સ્ટેશનના સિનિયર ઇન્સ્પેક્ટરના જણાવ્યા મુજબ, આરોપી વિરુદ્ધ છેતરપિંડી અને આઈટી એક્ટ હેઠળ ગુનો નોંધવામાં આવ્યો છે. રેલવે પ્રશાસને મુસાફરોને ચેતવણી આપી છે કે ડિજિટલ યુગમાં ટિકિટ અને પાસની ચકાસણી માટે અત્યાધુનિક સિસ્ટમ ઉપલબ્ધ છે, તેથી આવી છેતરપિંડી કરનારાઓ બચી શકશે નહીં. નકલી પાસ સાથે પકડાવું એ ગંભીર ગુનો છે જે જેલની સજા અને ભારે દંડ નોંતરી શકે છે.
