News Continuous Bureau | Mumbai
Kandivali Crime News। મુંબઈના કાંદિવલી (પશ્ચિમ) વિસ્તારમાં એક ચોંકાવનારી ઘટના સામે આવી છે, જ્યાં માત્ર એક બેગ હટાવવા જેવી નજીવી બાબતે પતિએ પોતાની પત્ની પર મિક્સરના સ્ટીલના જાર વડે જીવલેણ હુમલો કર્યો હતો. ચારકોપ પોલીસે આ મામલે ૫૨ વર્ષીય પતિ વિરુદ્ધ હત્યાના પ્રયાસનો ગુનો નોંધી તેની ધરપકડ કરી છે. ગંભીર રીતે ઈજાગ્રસ્ત પત્નીને સારવાર માટે તાત્કાલિક હોસ્પિટલમાં દાખલ કરવામાં આવી હતી.
સામાન્ય વિનંતી પર પતિનો આક્રોશ
ઘટનાની વિગત મુજબ, ચારકોપ સેક્ટર-૯ માં રહેતી ૪૦ વર્ષીય મહિલા અંધેરીની એક ખાનગી કંપનીમાં કામ કરે છે. રસોડા પાસે પડેલી એક બેગ હટાવવા માટે જ્યારે તેણે તેના પતિને વિનંતી કરી, ત્યારે પતિ એકાએક ઉશ્કેરાઈ ગયો હતો. તેણે પત્ની સાથે અશોભનીય વર્તન કરી ગાળો આપવાનું શરૂ કર્યું હતું અને વાત શારીરિક હિંસા સુધી પહોંચી ગઈ હતી.
મિક્સરના જારથી માથામાં કર્યો હુમલો
ગુસ્સામાં ભાન ભૂલેલા પતિએ પત્નીને લાત-મૂક્કાથી માર માર્યા બાદ રસોડામાં પડેલું મિક્સરનું સ્ટીલનું જાર ઉઠાવી પત્નીના માથામાં જોરથી ઝીંકી દીધું હતું. આ હુમલાને કારણે મહિલા લોહીલુહાણ થઈ ગઈ હતી. ઘરમાં હાજર સાસુ-સસરાએ વહુને બચાવવાનો પ્રયાસ કર્યો હોવા છતાં પતિ હુમલો કરતો રહ્યો હતો. આખરે ગભરાયેલી મહિલાએ પોતાને એક રૂમમાં પૂરી દઈ જીવ બચાવ્યો હતો, જે બાદ આરોપી ઘરેથી ભાગી ગયો હતો.
પોલીસે આરોપીને ઝડપી પાડ્યો
ઈજાગ્રસ્ત મહિલાને તાત્કાલિક શતાબ્દી હોસ્પિટલ લઈ જવામાં આવી હતી, જ્યાં તેના માથાના ભાગે ગંભીર ઈજા હોવાથી ૮ ટાંકા લેવા પડ્યા હતા. સારવાર બાદ મહિલાએ ચારકોપ પોલીસ સ્ટેશનમાં ફરિયાદ નોંધાવી હતી. પોલીસે આ મામલે હત્યાના પ્રયાસની કલમ હેઠળ ગુનો નોંધી તપાસ શરૂ કરી હતી અને ફરાર થયેલા આરોપીને કાંદિવલી વિસ્તારમાંથી ઝડપી પાડ્યો હતો. આ ઘટનાએ વિસ્તારમાં ઘરેલું હિંસાના વધતા કિસ્સાઓ સામે ચિંતા જગાવી છે.
👉 આ સમાચાર વાચો:
Mumbai Missing Youth Case। શિવાજીનગરમાંથી 27 વર્ષીય યુવાન ગુમ, પ્રેમ પ્રકરણમાં હત્યાની આશંકા; પરિવારે લગાવ્યા ગંભીર આક્ષેપ
