News Continuous Bureau | Mumbai
Mumbai Police Drug Disposal Taloja મુંબઈને નશામુક્ત બનાવવા અને ડ્રગ્સના ગેરકાયદેસર વેપારને નેસ્તનાબૂદ કરવાના અભિયાન હેઠળ મુંબઈ પોલીસની ગુન્હા શાખાના ‘એન્ટી નાર્કોટિક્સ સેલ’ (ANC અંમલી પદાર્થ વિરોધી કક્ષ) દ્વારા એક બહુ મોટી કાયદાકીય કાર્યવાહી કરવામાં આવી છે. મુંબઈ પોલીસે વિવિધ દરોડા અને ગુનાઓમાં જપ્ત કરેલો આશરે ૬૬૫ કરોડની આંતરરાષ્ટ્રીય કિંમતનો ૧,૨૭૫ કિલોગ્રામથી વધુનો કેફી પદાર્થોનો જથ્થો અને કોડીનયુક્ત કફ સિરપની ૫,૬૦૬ બોટલોને સત્તાવાર રીતે સળગાવીને સંપૂર્ણ નાશ કરી દીધો છે.
Mumbai Police Drug Disposal Taloja – નવી મુંબઈના તળોજા એમઆઈડીસી પ્લાન્ટમાં ઓપરેશન પાર પડાયું
મુંબઈ પોલીસના વરિષ્ઠ પ્રવક્તા પાસેથી મળતી સત્તાવાર વિગતો અનુસાર, કોર્ટ અને અન્ય તમામ કાયદાકીય પ્રક્રિયાઓ પૂર્ણ થયા બાદ આ મોટું ડ્રગ ડિસ્પોઝલ ઓપરેશન નવી મુંબઈ નજીક આવેલા તળોજા એમઆઈડીસી (Taloja MIDC) પરિસરમાં હાથ ધરાયું હતું. ત્યાં આવેલા સરકાર માન્ય પ્લાન્ટમાં પર્યાવરણના તમામ નિયમોનું ચુસ્ત પાલન કરીને, એક હાઈ-ટેક બંધ ભઠ્ઠીમાં (Incinerator) આ તમામ કેફી પદાર્થોને ભસ્મીભૂત કરવામાં આવ્યા હતા. નાશ કરાયેલા કરોડોના ડ્રગ્સના જથ્થામાં હાઈ-પ્રોફાઈલ કોકેઈન, મેફેડ્રોન (MD – એમડી), ચરસ, હેરોઈન, ગાંજો, ઇફેડ્રિન પાવડર અને વિદેશી હાઇડ્રો ગાંજો સામેલ હતો.
Mumbai Police Drug Disposal Taloja – વરિષ્ઠ આઈપીએસ અધિકારીઓ અને કમિટીની હાજરીમાં વેરિફિકેશન
આ આખી સંવેદનશીલ પ્રક્રિયા મુંબઈ પોલીસના વરિષ્ઠ આઈપીએસ અધિકારીઓ અને જોઈન્ટ સીપી (ક્રાઈમ) ના સીધા માર્ગદર્શન હેઠળ કરવામાં આવી હતી. આ પ્રસંગે ખાસ ગઠિત ‘ડ્રગ ડિસ્પોઝલ કમિટી’ ના અધ્યક્ષ, એડિશનલ સીપી (ક્રાઈમ), ડીસીપી (એએનસી) તેમજ કલીના સ્થિત ફોરેન્સિક સાયન્સ લેબોરેટરીના (FSL) ઉચ્ચ અધિકારીઓ સ્થળ પર હાજર રહ્યા હતા. એન્ટી નાર્કોટિક્સ સેલના ઈન્ચાર્જ પોલીસ ઈન્સ્પેક્ટર (વેરહાઉસ) અને તેમની ખાસ ટીમે કલાકો સુધી પરિસરમાં કડક સુરક્ષા વચ્ચે જપ્ત કરાયેલા મુદ્દામાલના રજીસ્ટર અને ડ્રગ્સના વજનની ચોકસાઈપૂર્વક ચકાસણી કરી હતી.
Mumbai Police Drug Disposal Taloja – નશાના કારોબારને જડમૂળથી ઉખાડવાની પોલીસની કટિબદ્ધતા
મુંબઈ પોલીસે સ્પષ્ટ કર્યું છે કે શહેરમાંથી નશાના કારોબારને જડમૂળથી ઉખાડી ફેંકવા માટે કાયદાકીય માળખાને વધુ મજબૂત કરવામાં આવી રહ્યું છે. જપ્ત કરાયેલા ડ્રગ્સનો આટલી મોટી માત્રામાં નાશ કરવો એ ડ્રગ સિન્ડિકેટની કમર તોડવા સમાન છે. આગામી દિવસોમાં પણ મુંબઈના યુવાધનને નશાના રવાડે ચડાવતા પેડલર્સ અને આંતરરાષ્ટ્રીય માફિયાઓ સામે ઠેકઠેકાણે આવી જ કડક કાયદાકીય કાર્યવાહીઓ, દરોડા અને વિશેષ ઓપરેશનો અવિરતપણે ચાલુ રાખવામાં આવશે.
