News Continuous Bureau | Mumbai
મુંબઈ-પુણે એક્સપ્રેસવે પર મુસાફરો માટે એક મુશ્કેલી પૂરી થાય ત્યાં બીજી ઊભી થઈ રહી છે. ગેસ ગળતરની ઘટના બાદ 32 કલાકે રસ્તો ખોલવામાં આવ્યો હતો, પરંતુ આજે સવારે લોનાવલા પાસે એક સિમેન્ટ ભરેલું કન્ટેનર ટેકનિકલ ખામીને કારણે રસ્તાની વચ્ચે જ બંધ પડી ગયું. આને કારણે મુંબઈ તરફ જતી લેન પર અંદાજે 20 થી 22 કિલોમીટર લાંબી વાહનોની લાઈનો લાગી ગઈ છે.આ અકસ્માતને કારણે ટ્રાફિક એટલો ધીમો છે કે છેલ્લા બે કલાકમાં વાહનો માંડ 2 કિલોમીટર આગળ વધી શક્યા છે. હાઈવે પોલીસ અને આઈઆરબી (IRB) ની ટીમ ક્રેન દ્વારા કન્ટેનર હટાવવાની કામગીરી કરી રહી છે, પરંતુ વાહનોનો પ્રવાહ વધુ હોવાથી સ્થિતિ કાબૂ બહાર જઈ રહી છે.
પોલીસ માટે નવો પડકાર: સૂતેલા ચાલકોને જગાડવા પડ્યા
32 કલાક સુધી રસ્તો બંધ હોવાને કારણે અનેક ટ્રક અને કાર ચાલકો કંટાળીને પોતાના વાહનોમાં જ સૂઈ ગયા હતા. જ્યારે રાત્રે રસ્તો ખોલવામાં આવ્યો ત્યારે અનેક ડ્રાઈવરોને રસ્તો ખુલ્યાની જાણ જ નહોતી. આજે સવારે જ્યારે ટ્રાફિક શરૂ થયો ત્યારે પોલીસે ગાડીએ-ગાડીએ જઈને સૂતેલા ચાલકોને જગાડીને વાહનો આગળ વધારવા માટે કહેવું પડ્યું હતું. આ અજીબ પરિસ્થિતિને કારણે ટ્રાફિક ક્લિયરન્સમાં વધુ સમય લાગી રહ્યો છે.
આ સમાચાર પણ વાંચો : Gold Silver Rates Today: સોના-ચાંદીના ભાવમાં મોટો ઘટાડો: રોકાણકારોમાં ફફડાટ, ચાંદીના ભાવમાં ગાબડું; જાણો આજના લેટેસ્ટ ભાવ
લોનાવલા અને માવળ વિસ્તારમાં ભીષણ જામ
હાલની સ્થિતિ મુજબ, લોનાવલાથી પાછળ માવળ વિસ્તાર સુધી વાહનોની કતારો જોવા મળી રહી છે. ખંડાલા ઘાટમાં ફસાયેલા મુસાફરો પાણી અને ખોરાક માટે વલખાં મારી રહ્યા છે. જો તમે અત્યારે પુણેથી મુંબઈ તરફ જવાનું વિચારી રહ્યા હોવ, તો એક્સપ્રેસવેનો ઉપયોગ ટાળવો હિતાવહ છે.
વૈકલ્પિક માર્ગોનો ઉપયોગ કરવાની સલાહ
ટ્રાફિક પોલીસ દ્વારા મુસાફરોને જૂના મુંબઈ-પુણે હાઈવે (NH-48) અથવા તામિની ઘાટ (Tamhini Ghat) જેવા વૈકલ્પિક માર્ગોનો ઉપયોગ કરવા વિનંતી કરવામાં આવી છે. એક્સપ્રેસવે પર સ્થિતિ સામાન્ય થતા હજુ 3 થી 4 કલાકનો સમય લાગી શકે છે.
