News Continuous Bureau | Mumbai
મુંબઈના ઈસ્ટર્ન ફ્રી-વે પર ફરજ બજાવતા એક ટ્રાફિક કોન્સ્ટેબલનું ગમખ્વાર અકસ્માત બાદ સારવાર દરમિયાન મોત નીપજ્યું છે. ૨૮ જાન્યુઆરીના રોજ બનેલી આ ઘટનામાં ગંભીર રીતે ઘાયલ થયેલા કોન્સ્ટેબલે ૫ દિવસ સુધી સાયન હોસ્પિટલના આઈસીયુ (ICU) માં જીવન-મરણ વચ્ચે ઝોલા ખાધા બાદ અંતિમ શ્વાસ લીધા હતા. આ ઘટનાને પગલે મુંબઈ પોલીસ વિભાગમાં શોકનું મોજું ફરી વળ્યું છે.
પૂરપાટ ઝડપે આવતી કારે મારી હતી ટક્કર
મૃતક કોન્સ્ટેબલ ૨૮ જાન્યુઆરીની સાંજે ઈસ્ટર્ન ફ્રી-વે પર ‘રે રોડ રેમ્પ’ પાસે ટ્રાફિક રાઈડર તરીકે રસ્તા પરના વાહનવ્યવહારનું સંચાલન કરી રહ્યા હતા. આ દરમિયાન એક પૂરપાટ ઝડપે આવતી કારે તેમને જોરદાર ટક્કર મારી હતી. ટક્કર એટલી પ્રચંડ હતી કે કોન્સ્ટેબલ કારની નીચે આવી ગયા હતા અને તેમના ચહેરા તેમજ શરીરના અન્ય ભાગોમાં ગંભીર ઈજાઓ પહોંચી હતી.
આ સમાચાર પણ વાંચો : India-US Trade Deal: “પોતાના પર વિશ્વાસ હોય તો બધું જ શક્ય છે…”: અમેરિકા સાથેની ટ્રેડ ડીલ બાદ PM મોદીએ આપ્યો આત્મવિશ્વાસનો મંત્ર
MbPT અધિકારી વિરુદ્ધ FIR માં કલમોનો ઉમેરો
પોલીસ તપાસમાં બહાર આવ્યું છે કે અકસ્માત સર્જનાર કારનો ચાલક ૫૭ વર્ષીય વ્યક્તિ છે, જે મુંબઈ પોર્ટ ટ્રસ્ટ (MbPT) માં અધિકારી તરીકે ફરજ બજાવે છે. જોકે, મેડિકલ તપાસમાં આરોપી દારૂના નશામાં હોવાનું જણાયું નથી, પરંતુ તેની બેદરકારી અને અતિશય ઝડપ એક જવાનના મોતનું કારણ બની છે. શિવરી પોલીસે હવે FIR માં ભારતીય ન્યાય સંહિતા (BNS) ની કલમ ૧૦૫ (સાપરાધ મનુષ્યવધ) નો ઉમેરો કરીને તપાસ તેજ કરી છે.
પોલીસ વિભાગ દ્વારા શ્રદ્ધાંજલિ
મુંબઈ પોલીસ વિભાગે પોતાના બહાદુર જવાનના નિધન પર ઊંડી સંવેદના વ્યક્ત કરી છે. ઉચ્ચ અધિકારીઓએ શહીદ કોન્સ્ટેબલના પરિવારની મુલાકાત લીધી હતી અને તેમને તમામ શક્ય સરકારી મદદ તેમજ વળતર પૂરી પાડવાની ખાતરી આપી છે. રસ્તાઓ પર નાગરિકોની સુરક્ષા માટે તૈનાત રહેતા પોલીસકર્મીઓ સામેની આવી બેદરકારી સામે કડક દાખલો બેસાડવા વિભાગ મક્કમ છે.
