News Continuous Bureau | Mumbai
Mumbai Water cut : માયાનગરી તરીકે ઓળખાતું મુંબઈ શહેર આ દિવસોમાં જળસંકટનો સામનો કરી રહ્યું છે. મુંબઈ મહાનગર પાલિકા (BMC)ની તાજેતરની જાહેરાત મુજબ, મુંબઈ અને આસપાસના વિસ્તારોમાં 5 માર્ચ સુધી પાણી પુરવઠામાં કાપ મુકવામાં આવશે. BMCએ કહ્યું છે કે આ વિસ્તારોમાં પાણી પુરવઠામાં 15% ઘટાડો થશે.
આ કારણે મુકાયો પાણીકાપ
મહત્વનું છે કે બીએમસીની આ જાહેરાત સોમવારે તેના પીસે વોટર પમ્પિંગ સ્ટેશનમાં લાગેલી આગ બાદ કરવામાં આવી છે. આગ પછી, BMCએ મુંબઈ અને પૂર્વ ઉપનગરોના ઘણા ભાગોમાં પાણીના પુરવઠામાં 30 થી 100% ઘટાડો કર્યો. જો કે, બીએમસીએ કહ્યું કે પીસે વોટર પમ્પિંગ સ્ટેશન પર હવે બે ટ્રાન્સફોર્મર અને 15 પંપ કાર્યરત થઈ ગયા છે.
જણાવી દઈએ કે મંગળવારે સવારે 4 વાગ્યા સુધીમાં 20 માંથી આઠ પંપ ચાલુ થઈ ગયા હતા. ગોલંજી, રાવલી, ફોસબેરી અને ભંડારવાડા જળાશયોમાંથી ઓછા દબાણે પુરવઠો ફરી શરૂ થયો. તે જ દિવસે સવારે 11 વાગ્યા સુધીમાં વધુ છ પંપ શરૂ કરવામાં આવ્યા હતા.
પાણી પુરવઠામાં 15% ઘટાડો
BMCએ જણાવ્યું હતું કે ત્રીજું ટ્રાન્સફોર્મર 5 માર્ચ, 2024 સુધીમાં કાર્યરત થવાની અપેક્ષા છે. તેથી, 27 ફેબ્રુઆરીની મધ્યરાત્રિથી 5 માર્ચ 2024 સુધી, સમગ્ર મુંબઈ શહેર, પશ્ચિમ ઉપનગરો અને પૂર્વ ઉપનગરોમાં પાણી પુરવઠામાં 15% ઘટાડો થશે. BMCએ સોશિયલ મીડિયા પ્લેટફોર્મ X દ્વારા આ માહિતી આપી છે.
આ સમાચાર પણ વાંચો : બીએમસીએ ગોરેગાવ – મુલુંડ રોડ રોડ પ્રોજેક્ટમાં વચ્ચે આવતા આટલા બાંધકામોનું કર્યું ડિમોલીશન, હવે ટ્રાફિક બનશે સરળ..
થાણે શહેર, ભિવંડી અને બહારના વિભાગોમાં મુંબઈ 2 અને 3 પાણીની લાઈનોમાંથી પાણી પુરવઠામાં 15% ઘટાડો થયો છે. BMCએ મુંબઈના નાગરિકોને આ સમયગાળા દરમિયાન પાણીનો સમજદારીપૂર્વક ઉપયોગ કરવા વિનંતી કરી છે.
થાણે વિસ્તારમાં 50% પાણી કાપ
તમને એ પણ જણાવી દઈએ કે આગની ઘટનાને કારણે થાણે મ્યુનિસિપલ કોર્પોરેશન (TMC) એ થાણે વિસ્તારમાં 50% પાણી કાપની જાહેરાત કરી છે. એક અધિકારીના જણાવ્યા અનુસાર, આ ઘટનાથી ઉપનગરોના પૂર્વ ભાગમાં પાણી પુરવઠાને અસર થઈ હતી. આ ઉપરાંત શહેરના ગોલંજી, ફોસબેરી, રાવલી અને ભંડારવાડા જળાશયોના પાણી પુરવઠાને પણ અસર થઈ છે.
ઉલ્લેખનીય છે કે મુંબઈને મોડક સાગર, તુલસી, તાનસા, વિહાર, મધ્ય વૈતરણા, ભાતસા તળાવ અને અપર વૈતરણા તળાવમાંથી દરરોજ 3850 MLD પાણી પૂરું પાડવામાં આવે છે. જોકે હવે તળાવોમાં પાણી ઓછું થવા લાગ્યું છે.
