News Continuous Bureau | Mumbai
Bhandup Fire News| મુંબઈના પૂર્વી ઉપનગર ભાંડુપમાં આજે એક ભીષણ આગની દુર્ઘટના સર્જાઈ હતી. ભાંડુપ પૂર્વના ભાંડુપ વિલેજ રોડ નજીક એકાએક આગ ફાટી નીકળતા સમગ્ર વિસ્તારમાં દહેશતનો માહોલ જોવા મળ્યો હતો. ગીચ રહેણાંક વિસ્તાર હોવાને કારણે આગ ઝડપથી ફેલાવવાની આશંકા હતી, પરંતુ ફાયર બ્રિગેડની સતર્કતાને કારણે મોટી હોનારત ટળી છે.
કાળા ધુમાડાના ગોટેગોટાથી ગભરાટ
પ્રાપ્ત માહિતી અનુસાર, બપોરના સમયે ભાંડુપ વિલેજ રોડ પર અચાનક આગની જ્વાળાઓ દેખાવા લાગી હતી. જોતજોતામાં આકાશમાં કાળા ધુમાડાના ગોટેગોટા ઉડવા લાગ્યા હતા, જે દૂરથી પણ જોઈ શકાતા હતા. આગના વિકરાળ સ્વરૂપને જોઈને સ્થાનિક રહીશો જીવ બચાવવા ઘરની બહાર દોડી આવ્યા હતા. આસપાસના ગીચ મકાનો અને દુકાનોને કારણે આગ વધુ પ્રસરવાનો ભય હતો, જેથી સ્થાનિક પોલીસે તાત્કાલિક વિસ્તારને ખાલી કરાવવાનું શરૂ કર્યું હતું.
યુદ્ધના ધોરણે બચાવ કામગીરી
મુંબઈ ફાયર બ્રિગેડની અનેક ગાડીઓ અને પાણીના ટેન્કરો ઘટનાસ્થળે પહોંચી ગયા હતા. ફાયર ફાઈટરોએ ચારેબાજુથી પાણીનો મારો ચલાવીને આગને અન્ય ઈમારતો સુધી પહોંચતા અટકાવી હતી. બચાવ કામગીરીમાં કોઈ અડચણ ન આવે તે માટે પોલીસે ભાંડુપ વિલેજ રોડ તરફ જતા રસ્તાઓ બંધ કરી ટ્રાફિકને ડાયવર્ટ કર્યો હતો. ફાયર વિભાગની ભારે જહેમત બાદ આગ પર કાબૂ મેળવવામાં સફળતા મળી હતી.
સદનસીબે જાનહાનિ ટળી
આ ભીષણ આગમાં મિલકતને નુકસાન થયું હોવાની આશંકા છે, પરંતુ સૌથી રાહતની વાત એ છે કે આ દુર્ઘટનામાં કોઈ વ્યક્તિને ગંભીર ઈજા થઈ નથી કે કોઈ જાનહાનિના અહેવાલ મળ્યા નથી. આગ કયા કારણોસર લાગી તે હજુ સુધી જાણી શકાયું નથી, પરંતુ શોર્ટ સર્કિટ હોવાની પ્રાથમિક શંકા સેવાઈ રહી છે. ફાયર વિભાગ અને મ્યુનિસિપલ કોર્પોરેશન દ્વારા હવે પંચનામું કરી આગના ચોક્કસ કારણની તપાસ કરવામાં આવશે.
👉 આ સમાચાર વાચો:
Tardeo Accident| તાડદેવમાં કાળ બનીને આવી ક્રેન રસ્તા કિનારે આરામ કરી રહેલા 55 વર્ષીય મહિલા સફાઈ કર્મચારીને કચડી નાખ્યા
