News Continuous Bureau | Mumbai
Mumbai Metro 1 Delay। મુંબઈની લાઈફલાઈન ગણાતી મેટ્રો ટ્રેન સેવામાં આજે સવારે ટેકનિકલ ખામી અને મેન્ટેનન્સના કાર્યને કારણે મુસાફરોને ભારે હાલાકીનો સામનો કરવો પડ્યો હતો. મુંબઈ મેટ્રો વન (ઘાટકોપરવર્સોવા) લાઈન પર ટ્રેનો નિર્ધારિત સમય કરતા 20 મિનિટ મોડી દોડતા સ્ટેશનો પર પગ મૂકવાની પણ જગ્યા નહોતી રહી. ખાસ કરીને સવારના વ્યસ્ત સમયે ઓફિસ જનારા મુસાફરો માટે સ્થિતિ અત્યંત કફોડી બની હતી.
પ્લેટફોર્મ પર ઉમટી ભીડ, નાસભાગ જેવી સ્થિતિ
મેટ્રો ટ્રેનો મોડી પડવાને કારણે ઘાટકોપર અને અંધેરી જેવા મુખ્ય સ્ટેશનો પર મુસાફરોની લાંબી કતારો જોવા મળી હતી. પ્લેટફોર્મ પર ભીડ એટલી વધી ગઈ હતી કે ટ્રેન આવતા જ તેમાં ચઢવા માટે મુસાફરો વચ્ચે ખેંચતાણ અને નાસભાગ જેવી સ્થિતિ સર્જાઈ હતી. મુસાફરોએ ફરિયાદ કરી હતી કે ટ્રેનો મોડી હોવા છતાં પ્રશાસન તરફથી અગાઉ કોઈ સૂચના આપવામાં આવી નહોતી, જેના કારણે અંધાધૂંધી વધી હતી.
રેલ ગ્રાઇન્ડિંગ કાર્યને કારણે વિલંબ
મુંબઈ મેટ્રો વન દ્વારા આપવામાં આવેલી માહિતી મુજબ, ટ્રેકની કાર્યક્ષમતા વધારવા માટે બેંગલુરુ મેટ્રોના સહયોગથી રાતોરાત ‘રેલ ગ્રાઇન્ડિંગ’ નું કામ કરવામાં આવ્યું હતું. આ કામગીરીને કારણે સુરક્ષા પ્રોટોકોલ હેઠળ ટ્રેનોની ગતિ પર હંગામી મર્યાદા (Speed Restriction) લાદવામાં આવી હતી. આ જ કારણસર ટ્રેનોની ફ્રીક્વન્સી ખોરવાઈ હતી અને સેવામાં વિલંબ થયો હતો. અગાઉ માર્ચ 2026 માં પણ આરે અને BKC વચ્ચે આવી જ ટેકનિકલ ખામીને કારણે મુસાફરો અટવાયા હતા.
મુસાફરોમાં રોષ અને મેગાબ્લોક એલર્ટની માંગ
મેટ્રોમાં મુસાફરી કરતા એક મુસાફરે જણાવ્યું કે, અંધેરી-ઘાટકોપર લાઈન પ્રભાવિત થવાથી તેઓ સમયસર ઓફિસ પહોંચી શક્યા નહોતા. અન્ય મુસાફરોએ સવાલ ઉઠાવ્યો હતો કે આવું મેન્ટેનન્સ કાર્ય વીકએન્ડમાં કેમ કરવામાં આવતું નથી? મુસાફરોએ સૂચન કર્યું છે કે સેન્ટ્રલ અને વેસ્ટર્ન રેલવેની જેમ મેટ્રોએ પણ મેન્ટેનન્સ કાર્ય માટે અગાઉથી ‘મેગાબ્લોક એલર્ટ’ જાહેર કરવું જોઈએ જેથી લોકો પોતાનો પ્રવાસ પ્લાન કરી શકે.
👉 આ સમાચાર વાચો:
Mumbai Watermelon Tragedy। મુંબઈમાં ‘ઝેરી’ તરબૂચનો ફફડાટ એક જ પરિવારના 4ના મોત બાદ બજારોમાંથી તરબૂચ ગાયબ, તપાસમાં FDA ખાલી હાથે પરત ફરી
