News Continuous Bureau | Mumbai
Mumbai AutoRickshaw Crime મુંબઈના કુરાર વિસ્તારમાં એક રિક્ષાચાલકની અત્યંત શરમજનક અને ચોંકાવનારી હરકત સામે આવી છે. એક રિક્ષાચાલકે મહિલા પેસેન્જરનો તેમની જાણ બહાર ગુપ્ત વીડિયો ઉતાર્યો હતો અને ત્યારબાદ તે વીડિયો વાયરલ કરવાની ધમકી આપીને મહિલા પાસે શારીરિક સંબંધ બાંધવાની માંગણી કરી હતી. જોકે, ઘટનાસ્થળે હાજર સમતા નગર ટ્રાફિક પોલીસની સતર્કતાને કારણે આરોપીને સમયસર ઝડપી લેવામાં આવ્યો છે.
કેવી રીતે ઘટનાને અંજામ આપ્યો?
ફરિયાદી મહિલા કુરારથી મલાડ જવા માટે રિક્ષામાં બેઠા હતા. મુસાફરી દરમિયાન રિક્ષાચાલકે અનેકવાર પાછળ ફરીને મહિલાને જોતા શંકા ઉપજી હતી. જ્યારે તેઓ મલાડ સ્થિત KFC આઉટલેટ પાસે પહોંચ્યા અને મહિલા ભાડું ચૂકવી રહ્યા હતા, ત્યારે રિક્ષાચાલક મોબાઈલથી વીડિયો બનાવી રહ્યો હોવાનું ધ્યાનમાં આવ્યું હતું. મહિલાએ વાંધો ઉઠાવતા રિક્ષાચાલકે ધમકી આપી હતી કે જો તે તેની સાથે શારીરિક સંબંધ નહીં બાંધે તો તે આ વીડિયોને સોશિયલ મીડિયા પર વાયરલ કરી દેશે.
પોલીસની ત્વરિત કાર્યવાહી
મહિલાએ ડર્યા વગર મદદ માટે બૂમો પાડતા આસપાસના લોકો એકઠા થઈ ગયા હતા. સદનસીબે, ત્યાં જ ફરજ પર હાજર સમતા નગર ટ્રાફિક પોલીસના જવાનોએ મહિલાનો હોબાળો સાંભળી તાત્કાલિક ઘટનાસ્થળે દોડી જઈ આરોપીને ઘેરી લીધો હતો. પોલીસે આરોપીની અટકાયત કરી તેને કુરાર પોલીસ સ્ટેશનના હવાલે કર્યો હતો. પોલીસે આરોપીનો મોબાઈલ ફોન પણ જપ્ત કરી લીધો છે.
ગંભીર કલમો હેઠળ ગુનો દાખલ
કુરાર પોલીસ સ્ટેશનના અધિકારીઓના જણાવ્યા અનુસાર, મહિલાની ફરિયાદને આધારે આરોપી વિરુદ્ધ છેડતી, સંમતિ વગર વીડિયો બનાવવો, ગુનાહિત ધાકધમકી અને શારીરિક સંબંધ બાંધવા માટે દબાણ કરવું જેવી ગંભીર કલમો હેઠળ ગુનો નોંધવામાં આવ્યો છે. પોલીસ હવે તેના ફોનમાંથી અન્ય કોઈ મહિલાઓના વીડિયો છે કે કેમ તેની તપાસ કરી રહી છે. આ ઘટનાને પગલે હવે રિક્ષાચાલકોના દસ્તાવેજો અને તેમની ભૂતકાળની કામગીરીની પણ સઘન તપાસ કરવામાં આવશે.
👉 આ સમાચાર વાચો:
Domestic Gas Cylinder Commercial Use ચેમ્બુરમાં રેસ્ટોરન્ટમાં દરોડો સબસિડીવાળા ઘરેલુ ગેસ સિલિન્ડરનો કોમર્શિયલ ઉપયોગ પકડાયો
