News Continuous Bureau | Mumbai
મુંબઈ-ગોવા હાઈવે પર શુક્રવારે વહેલી સવારે એક કમકમાટીભરી ઘટના સામે આવી છે. નાગોઠણે પાસે આવેલી સુકળી ખીણમાં એક ખાનગી લક્ઝરી બસ ભયાનક રીતે પલટી ખાઈ ગઈ હતી. આ અકસ્માતમાં ૨ મુસાફરોનું ઘટનાસ્થળે જ મોત નીપજ્યું છે, જ્યારે ૩૮ જેટલા પ્રવાસીઓ ઘાયલ થયા છે. ઘાયલો પૈકી ૧૦ મુસાફરોની હાલત અત્યંત ગંભીર હોવાનું જણાવાયું છે. મુસાફરોનો આક્ષેપ છે કે આ અકસ્માત કોઈ ટેકનિકલ ખામીને લીધે નહીં, પરંતુ ડ્રાઈવરની ગંભીર બેદરકારીને કારણે થયો છે.
વળાંક પર સ્પીડ પર કાબૂ ગુમાવતા બસ ખીણમાં પલટી
મળતી માહિતી મુજબ, આ ખાનગી બસ મુંબઈથી ગોવા તરફ જઈ રહી હતી. જ્યારે બસ સુકળી ખીણના તીવ્ર વળાંક પર પહોંચી, ત્યારે ડ્રાઈવરે ઝડપ પરનો કાબૂ ગુમાવી દીધો અને બસ રોડ પર જ ઉંધી વળી ગઈ હતી. અકસ્માતનો અવાજ એટલો જોરદાર હતો કે સ્થાનિક ગ્રામજનો તાત્કાલિક મદદ માટે દોડી આવ્યા હતા. બસ પલટી જતાં મુસાફરોમાં ચીસાચીસ અને નાસભાગ મચી ગઈ હતી. પોલીસ અને રેસ્ક્યુ ટીમની મદદથી કાચ તોડીને મુસાફરોને બહાર કાઢવામાં આવ્યા હતા.
આ સમાચાર પણ વાંચો : West Asia Crisis: પશ્ચિમ એશિયામાં યુદ્ધનો ભડકો: તેહરાનના સૌથી ઊંચા પુલ પર અમેરિકા-ઈઝરાયેલનો પ્રચંડ બોમ્બમારો, ૮ નાગરિકોના મોત
મુસાફરોએ RedBus પોર્ટલ પર ઓનલાઈન ફરિયાદ પણ કરી હતી
અકસ્માતમાંથી બચી ગયેલા મુસાફરોએ ડ્રાઈવર વિરુદ્ધ ચોંકાવનારા ખુલાસા કર્યા છે. પ્રવાસીઓના જણાવ્યા મુજબ, મુસાફરી શરૂ થઈ ત્યારથી જ ડ્રાઈવર ખૂબ જ સ્પીડમાં અને જોખમી રીતે બસ ચલાવી રહ્યો હતો. અનેક લોકોએ તેને ટોક્યો હોવા છતાં તેણે ધ્યાન આપ્યું નહોતું. ચોંકાવનારી વાત એ છે કે, કેટલાક જાગૃત મુસાફરોએ ચાલુ બસે જ ‘RedBus’ પોર્ટલ પર ડ્રાઈવરની બેદરકારી અંગે ઓનલાઈન ફરિયાદ પણ નોંધાવી હતી. પરંતુ આ ફરિયાદ પર કોઈ કાર્યવાહી થાય તે પહેલા જ આ કરુણ અકસ્માત સર્જાઈ ગયો.
ગંભીર ઈજાગ્રસ્તોને કામોઠેની MGM હોસ્પિટલમાં ખસેડાયા
અકસ્માત બાદ ઈજાગ્રસ્તોને પ્રાથમિક સારવાર માટે સ્થાનિક હોસ્પિટલમાં લઈ જવામાં આવ્યા હતા. જોકે, ૯ થી ૧૦ મુસાફરોની હાલત ચિંતાજનક હોવાથી તેમને વધુ સારી સારવાર માટે નવી મુંબઈના કામોઠે સ્થિત MGM હોસ્પિટલમાં રિફર કરવામાં આવ્યા છે. નાગોઠણે પોલીસ આ મામલે ડ્રાઈવર વિરુદ્ધ ગુનો દાખલ કરવાની તજવીજ હાથ ધરી રહી છે. મૃતકોની ઓળખ કરવાની પ્રક્રિયા પણ ચાલુ છે. સુકળી ખીણ વિસ્તાર અકસ્માતો માટે પહેલેથી જ સંવેદનશીલ માનવામાં આવે છે, ત્યારે આવી બેદરકારીએ ફરી એકવાર સુરક્ષા સામે સવાલો ઉભા કર્યા છે.
