News Continuous Bureau | Mumbai
Worli BEST Bus Accident Pedestrian Dead મુંબઈના વરલી વિસ્તારમાં પૂરપાટ ઝડપે આવી રહેલી બેસ્ટ (BEST) બસની જોરદાર અડફેટે આવી જતાં માર્ગ ઓળંગી રહેલા અંદાજે ૨૫ થી ૩૦ વર્ષીય અજાણ્યા યુવકનું ઘટનાસ્થળે જ કરુણ મોત નીપજ્યું છે; ગમખ્વાર અકસ્માત બાદ સ્થાનિક વિસ્તારમાં ભારે ચકચાર મચી જવા પામી છે; ઘટનાની ગંભીરતાને ધ્યાને રાખી વરલી પોલીસે તાત્કાલિક કાર્યવાહી હાથ ધરીને બેદરકારીપૂર્વક વાહન ચલાવવા તેમજ અકસ્માત સર્જવા બદલ બેસ્ટ બસના ડ્રાઈવર વિરુદ્ધ ગુનો નોંધી તેની અટકાયત કરી લીધી છે; અકસ્માતમાં ગંભીર રીતે ઘવાયેલા યુવકને તાત્કાલિક હોસ્પિટલ ખસેડાયો હતો, પરંતુ તબીબોએ તેને મૃત જાહેર કર્યો હતો.
Worli BEST Bus Accident – ડૉ. એની બેસન્ટ રોડ પર કાળમુખો અકસ્માત: યુવકને માથાના ભાગે જીવલેણ ઈજાઓ
વરલી પોલીસના જણાવ્યા અનુસાર, આ દુર્ઘટના ડૉ. એની બેસન્ટ રોડ પર આવેલા મેટ્રો સ્ટેશનની નજીક બની હતી. અજાણ્યો યુવક રસ્તો ક્રોસ કરી રહ્યો હતો તે દરમિયાન પૂરઝડપે આવી રહેલી બેસ્ટ બસે તેને અડફેટે લીધો હતો. ટક્કર એટલી જોરદાર હતી કે યુવક રસ્તા પર પટકાતાં તેના માથાના ભાગે ગંભીર ઈજાઓ થઈ હતી અને તે લોહીલુહાણ હાલતમાં બેભાન થઈ ગયો હતો. કંટ્રોલ રૂમ દ્વારા બનાવ અંગે જાણ થતાં જ પોલીસ વાન તાબડતોબ ઘટનાસ્થળે દોડી ગઈ હતી.
Worli BEST Bus Accident – નાયર હોસ્પિટલમાં મૃત જાહેર: મૃતક પાસેથી કોઈ દસ્તાવેજ ન મળતાં ઓળખ વણઉકેલાયેલી
પોલીસે સ્થાનિક લોકોની મદદથી ગંભીર હાલતમાં પડેલા યુવકને તાત્કાલિક સારવાર માટે નજીકની નાયર હોસ્પિટલ પહોંચાડ્યો હતો. જોકે, હોસ્પિટલ પહોંચે તે પહેલાં જ તેનું પ્રાણપંખેરું ઊડી ગયું હતું અને ફરજ પરના તબીબોએ તપાસ બાદ તેને મૃત જાહેર કર્યો હતો. મૃતકના ખિસ્સામાંથી કોઈ મોબાઈલ ફોન, ઓળખકાર્ડ કે અન્ય અંગત દસ્તાવેજ મળી આવ્યા ન હોવાથી તેની સાચી ઓળખ મેળવવામાં મુશ્કેલી ઊભી થઈ છે.
Worli BEST Bus Accident – ગુમ થયેલા વ્યક્તિઓની યાદી સાથે તપાસ: ડ્રાઈવર સામે કડક કાનૂની કાર્યવાહી
વરલી પોલીસે આ મામલે ભારતીય ન્યાય સંહિતાની સંબંધિત કલમો હેઠળ ગુનો દાખલ કરીને ઝડપાયેલા ડ્રાઈવરની સઘન પૂછપરછ શરૂ કરી છે. અકસ્માત સમયે બસની સ્પીડ કેટલી હતી અને સિગ્નલનું ઉલ્લંઘન થયું હતું કે કેમ તે ચકાસવા માટે ઘટનાસ્થળની આસપાસના સીસીટીવી ફૂટેજ કબજે કરવામાં આવ્યા છે. સાથે જ, મુંબઈ અને ઉપનગરોના તમામ પોલીસ સ્ટેશનોમાં ગુમ થયેલા યુવકોની યાદી મંગાવીને મૃતકની ઓળખ કરી તેના પરિવારનો સંપર્ક સાધવાની કવાયત તેજ કરવામાં આવી છે.
👉 આ સમાચાર વાચો:
Borivali Senior Citizen Share Investment Fraud શેરબજારમાં રોકાણના નામે વૃદ્ધા સાથે ₹76.5 લાખની છેતરપિંડી છ મહિનાથી ફરાર બેન્ક મેનેજર ઝડપાયો
