News Continuous Bureau | Mumbai
ATM Fraud Alert જો તમે પણ તમારી જરૂરિયાત મુજબ એટીએમ મશીનમાંથી રોકડા પૈસા ઉપાડવા માટે જતા હોવ, તો આ સમાચાર તમારા માટે ખૂબ જ મહત્વના છે. આજકાલ ડિજિટલ યુગમાં ઓનલાઈન ફ્રોડની સાથે સાથે એટીએમ સેન્ટર પર જઈને ગ્રાહકો સાથે છેતરપિંડી કરવાની ઘટનાઓ પણ ઝડપથી વધી રહી છે. તાજેતરમાં સોશિયલ મીડિયા પર એક ચોંકાવનારો વીડિયો વાયરલ થયો છે, જેમાં સીસીટીવી કેમેરાની અંદર ફ્રોડ કરવાની એક નવી અને અનોખી પદ્ધતિ કેદ થઈ છે. આ વીડિયોમાં જોઈ શકાય છે કે કઈ રીતે બદમાશો એટીએમ મશીન સાથે છેડછાડ કરીને ગ્રાહકોની મહેનતની કમાણી સેકન્ડોમાં ગાયબ કરી દે છે. આ જોયા બાદ બેંકિંગ ક્ષેત્રના નિષ્ણાતોએ ગ્રાહકોને સાવધ રહેવાની કડક ચેતવણી આપી છે.
ATM Fraud Alert: કેશ ડિસ્પેન્સર સ્લોટ પર ગુંદર અને નકલી પટ્ટી લગાવવાની નવી તરકીબ
વાયરલ થઈ રહેલા વીડિયો અનુસાર, ફ્રોડ કરનારી આ ગેંગ એટીએમ મશીનમાંથી જ્યાંથી કેશ બહાર નીકળે છે તે ‘કેશ ડિસ્પેન્સર સ્લોટ’ પર બરાબર મેચ થઈ જાય તેવી આબેહૂબ નકલી પ્લાસ્ટિકની પટ્ટી લગાવી દે છે. આ પટ્ટીની અંદરની બાજુએ શક્તિશાળી ગુંદર અથવા ડબલ સાઇડેડ ટેપ લગાવેલી હોય છે. જ્યારે કોઈ ગ્રાહક પોતાના કાર્ડ વડે પૈસા ઉપાડે છે, ત્યારે મશીનમાંથી પ્રોસેસ પૂરી થઈ જાય છે અને ખાતામાંથી પૈસા પણ કપાઈ જાય છે, પરંતુ તે નોટો બહાર આવવાને બદલે આ નકલી પટ્ટીના ગુંદરમાં ચોંટીને અંદર જ ફસાઈ જાય છે. ગ્રાહકને લાગે છે કે મશીનમાં કોઈ ટેકનિકલ ખામી છે અને તે ત્યાંથી ચાલ્યો જાય છે.
ATM Fraud Alert: ગ્રાહક બહાર નીકળતા જ બદમાશો આવીને પૈસા કાઢી લે છે
આ વીડિયોમાં આગળ દેખાય છે કે જેવો ગ્રાહક મશીન ખરાબ હોવાનું સમજીને એટીએમ કેબિનની બહાર નીકળે છે, કે તરત જ નજીકમાં ટાંપીને ઉભેલો ઠગ અંદર આવી જાય છે. તે ખૂબ જ આસાનીથી પેલી નકલી પટ્ટીને મશીન પરથી ઉખાડી લે છે અને તેની અંદર ચોંટેલી તમામ ચલણી નોટો લઈને ગણતરીની સેકન્ડોમાં ફરાર થઈ જાય છે. આ પ્રકારની છેતરપિંડીને બેંકિંગ ભાષામાં ‘કેશ ટ્રેપિંગ’ કહેવામાં આવે છે. મોટેભાગે આવી ગેંગ મોડી રાત્રે અથવા બપોરના સમયે જ્યારે એટીએમ પર કોઈ સિક્યોરિટી ગાર્ડ હાજર ન હોય ત્યારે સક્રિય બને છે અને સીધા સાદા લોકોને શિકાર બનાવે છે.
ATM Fraud Alert: એટીએમ ફ્રોડથી બચવા માટે આ મહત્વની બાબતોનું રાખો ધ્યાન
આવા ખતરનાક ફ્રોડથી બચવા માટે બેંકો દ્વારા કેટલીક મહત્વની ગાઈડલાઈન્સ જાહેર કરવામાં આવી છે. જ્યારે પણ તમે એટીએમ મશીનમાં કાર્ડ દાખલ કરો, ત્યારે સૌથી પહેલા કેશ નીકળવાના સ્લોટ અને પિન એન્ટર કરવાના કીપેડને બરાબર ચેક કરી લો. જો તમને સ્લોટ પર કોઈ પટ્ટી ઢીલી લાગે અથવા ગુંદર જેવું દેખાય તો તરત જ સાવધ થઈ જાવ. જો મશીનમાંથી ટ્રાન્ઝેક્શન સક્સેસફુલ થયા બાદ પણ પૈસા બહાર ન આવે, તો એટીએમ કેબિન છોડીને ક્યાંય જશો નહીં. ત્યાં જ ઉભા રહીને તાત્કાલિક બેંકના હેલ્પલાઈન નંબર પર કોલ કરીને ટ્રાન્ઝેક્શન બ્લોક કરાવો અથવા નજીકના પોલીસ સ્ટેશનમાં જાણ કરો.
