News Continuous Bureau | Mumbai
Dog punishment ઉત્તર પ્રદેશ સરકારે કૂતરાના હુમલાથી પરેશાન લોકોને રાહત આપવા માટે એક અનોખો નિર્ણય લીધો છે. હવે માણસની જેમ કૂતરાને પણ આજીવન કેદની સજા થઈ શકે છે. આ નિર્ણય મુજબ, જો કોઈ કૂતરો બે વાર કોઈ વ્યક્તિને કરડે, તો તેને આજીવન કારાવાસની સજા થઈ શકે છે. આ નવો કાયદો રાજ્યના તમામ નગર નિગમો માટે લાગુ કરવામાં આવ્યો છે અને પ્રયાગરાજમાં આવેલા એનિમલ બર્થ કંટ્રોલ (એબીસી) સેન્ટરમાં તેનો અમલ શરૂ થઈ ગયો છે.
પ્રથમવાર કરડવા પર 10 દિવસની સજા
જો કોઈ કૂતરો પ્રથમવાર કોઈ વ્યક્તિને કરડે, તો તેને 10 દિવસ માટે એબીસી સેન્ટરમાં રાખવામાં આવશે. આ માટે પીડિત વ્યક્તિએ સરકારી હોસ્પિટલમાંથી સારવારનું પ્રમાણપત્ર રજૂ કરવું પડશે. ત્યારબાદ નગર નિગમની ટીમ કૂતરાને પકડીને સેન્ટર લઈ જશે, જ્યાં તેની દેખરેખ રાખવામાં આવશે. તેને છોડતા પહેલા કૂતરામાં એક માઇક્રોચિપ (microchip) લગાવવામાં આવશે જેથી તેના વર્તન અને હલચલ પર નજર રાખી શકાય.
બીજીવાર હુમલો કરવા પર આજીવન કેદ
જો 10-15 દિવસની સજા પછી પણ કૂતરાના વર્તનમાં સુધારો ન થાય અને તે ફરીથી કોઈ બીજા વ્યક્તિને કારણ વિના કરડે, તો તેને ‘આદતવાળો હુમલાખોર’ ગણવામાં આવશે અને તેને આજીવન કેદની સજા થશે. આ મામલાની તપાસ માટે ત્રણ સભ્યોની એક ટીમ બનાવવામાં આવશે, જેમાં પશુધન અધિકારી, સ્થાનિક પ્રતિનિધિ અને એસપીસીએના સભ્યનો સમાવેશ થશે. આ ટીમ એ તપાસ કરશે કે શું કૂતરાએ ખરેખર બે વાર હુમલો કર્યો છે અને તેને હુમલો કરવા માટે ઉશ્કેરવામાં તો નથી આવ્યો ને.
આ સમાચાર પણ વાંચો : Waqf Act: વક્ફ કાયદો: સવારે મુસ્લિમ પક્ષ જીતનો દાવો કરતો હતો, પરંતુ વાર્તા તો કઈ અલગ જ નીકળી, જાણો સમગ્ર મામલો
કૂતરા માટે જેલ અને મુક્તિની શરતો
પ્રયાગરાજના કરેલી સ્થિત એબીસી સેન્ટરમાં કૂતરાઓ માટે માણસોની જેલની જેમ બેરક અને આઈસોલેશન વોર્ડ બનાવવામાં આવ્યા છે. અહીં હાલમાં 190 કૂતરા રાખવામાં આવ્યા છે, જેમની સંભાળ માટે કર્મચારીઓ છે. આજીવન કેદની સજા પામેલા કૂતરાને ત્યારે જ મુક્ત કરી શકાય છે, જ્યારે કોઈ વ્યક્તિ તેને સત્તાવાર રીતે દત્તક લઈ તેની સંપૂર્ણ જવાબદારી ઉઠાવે. આ આદેશ 10 સપ્ટેમ્બરના રોજ જારી કરવામાં આવ્યો હતો અને પ્રયાગરાજમાં તરત જ લાગુ થઈ ગયો છે.
