News Continuous Bureau | Mumbai

Join Our WhatsApp Channel

India Weather Updates। દેશભરમાં પડી રહેલી અસહ્ય અને કાળઝાળ ગરમીની વચ્ચે હવામાન વિભાગ (IMD) તરફથી એક બહુ મોટા અને રાહતના સમાચાર સામે આવ્યા છે. આ વર્ષે દેશમાં ચોમાસું તેના નિયત સમય કરતાં ૬ દિવસ વહેલું દસ્તક દેશે. હવામાન વિભાગના પૂર્વાનુમાન મુજબ, આ વર્ષે કેરળમાં દક્ષિણપશ્ચિમ ચોમાસાનું આગમન ૨૬ મે ૨૦૨૬ ના રોજ થવાની પ્રબળ સંભાવના છે. સામાન્ય રીતે દેશમાં ચોમાસું ૧ જૂને બેસતું હોય છે.

વહેલું ચોમાસું છતાં આ વર્ષે સામાન્ય કરતાં ઓછો વરસાદ પડશે

હવામાન વિભાગે શુક્રવારે જણાવ્યું હતું કે ૨૬ મેની આસપાસ કેરળમાં વરસાદી ઋતુની શરૂઆત થઈ શકે છે (જેમાં ૪ દિવસની વધઘટની ભૂલ હોઈ શકે છે). જોકે, ચિંતાની વાત એ છે કે જૂનથી સપ્ટેમ્બરના ચાર મહિના દરમિયાન આ વર્ષે ભારતમાં સામાન્ય કરતાં ઓછો વરસાદ થવાની સંભાવના છે. દેશમાં ચોમાસા દરમિયાન સરેરાશ ૮૦ સેમી વરસાદ થઈ શકે છે, જ્યારે લાંબાગાળાની સરેરાશ (૧૯૭૧-૨૦૨૦) ૮૭ સેમીની છે. આ વર્ષે ઓછો વરસાદ પડવાનું મુખ્ય કારણ ‘અલ નીનો’ (El Nino) ની અસરો હોઈ શકે છે, જે માનસૂની પવનોને નબળા પાડે છે.

મહારાષ્ટ્રમાં પારો ૪૫ ડિગ્રીને પાર, અકોલા સૌથી ગરમ

બીજી તરફ, ચોમાસા પહેલાં દેશના મોટાભાગના રાજ્યો ભયંકર ગરમીની લપેટમાં છે. મહારાષ્ટ્ર, રાજસ્થાન, મધ્યપ્રદેશ અને ઉત્તર પ્રદેશના અનેક શહેરોમાં તાપમાન ૪૦°C ને વટાવી ગયું છે. મહારાષ્ટ્રનું અકોલા ૪૫.૯°C સાથે દેશનું સૌથી ગરમ શહેર નોંધાયું છે, જ્યારે જલગાંવ, વર્ધા અને અમરાવતીમાં પણ પારો ૪૫°C થી ઉપર રહ્યો છે. દેશની રાજધાની દિલ્હી અને યુપીમાં આજે તીવ્ર હીટવેવ (લૂ) લોકોને પરેશાન કરશે, જ્યાં દિલ્હીમાં મહત્તમ તાપમાન ૪૧°C રહેવાનું અનુમાન છે.

ઉત્તર પ્રદેશમાં વાવાઝોડા અને વીજળી પડવાથી ૧૧૩ ના મોત

હવામાનના આ બદલાવ વચ્ચે ઉત્તર પ્રદેશમાં બુધવારે આવેલી ભયંકર આંધી-તોફાન અને વરસાદે ભારે તબાહી મચાવી છે. રાજ્યના ૨૬ જિલ્લાઓમાં આંધી અને વીજળી પડવાની ઘટનાઓમાં અત્યાર સુધીમાં કુલ ૧૧૩ લોકોના મોત નીપજ્યા છે અને ૭૨ લોકો ઘાયલ થયા છે. આ કુદરતી આપત્તિમાં ૧૭૦ પશુઓ પણ કાળનો કોળિયો બન્યા છે અને ૨૨૭ મકાનો ધરાશાયી થયા છે. મુખ્યમંત્રી યોગી આદિત્યનાથે તમામ જિલ્લા મેજિસ્ટ્રેટને દર ૩ કલાકે નુકસાનીનો રિપોર્ટ આપવા અને પીડિતોને તાત્કાલિક સહાય પહોંચાડવા કડક આદેશ આપ્યા છે.

આગામી ૨૪ કલાકમાં અંદમાનમાં ચોમાસું આગળ વધશે

હવામાન વિભાગના જણાવ્યા અનુસાર, આગામી ૨૪ કલાક દરમિયાન દક્ષિણ બંગાળની ખાડી, અંદમાન સમુદ્ર અને અંદમાન-નિકોબાર ટાપુઓના કેટલાક ભાગોમાં ચોમાસું આગળ વધવા માટે પવન અને વાતાવરણ સંપૂર્ણપણે સાનુકૂળ છે-

👉 આ સમાચાર વાચો:
NEET Paper Leak Case।પ્રોફેસર જ નીકળ્યો પેપર લીકનો અસલી સુત્રધાર! NEET કૌભાંડમાં CBI એ મુખ્ય આરોપીને દબોચ્યો; વિદ્યાર્થીઓના ભવિષ્ય સાથે રમનાર આખી ગેંગનો પર્દાફાશ