News Continuous Bureau | Mumbai
ઈરાન અને અમેરિકા-ઈઝરાયેલ વચ્ચે ચાલી રહેલા યુદ્ધની અસર સમગ્ર વિશ્વ પર પડી રહી છે. આ યુદ્ધના કારણે ઉર્જા ક્ષેત્રે મોટું સંકટ ઊભું થયું છે. ખાસ કરીને વિશ્વના મહત્વપૂર્ણ એનર્જી કોરિડોર ગણાતા સ્ટ્રેટ ઓફ હોર્મુઝ માં અવરોધ આવતા પેટ્રોલ, ડીઝલ અને ગેસના પુરવઠા પર માઠી અસર પડી છે. જોકે, ભારત આ સંકટને પહોંચી વળવા માટે સજ્જ છે. આર્જેન્ટિના બાદ હવે ભારતનો વર્ષો જૂનો મિત્ર દેશ રશિયા ભારતની ઉર્જા જરૂરિયાતો પૂરી કરવા માટે આગળ આવ્યો છે.રશિયાની સમાચાર એજન્સી ના અહેવાલ મુજબ, નવી દિલ્હી અને મોસ્કો વચ્ચે LNG (લિક્વિફાઇડ નેચરલ ગેસ) અને LPG (લિક્વિફાઇડ પેટ્રોલિયમ ગેસ) નો પુરવઠો વધારવા માટે વાતચીત નિર્ણાયક તબક્કે પહોંચી છે. ભારતમાં રસોઈ ગેસ (LPG) ની વધતી જતી માંગને જોતા રશિયા એક મહત્વપૂર્ણ સપ્લાયર તરીકે ઉભરી શકે છે. નિષ્ણાતોનું માનવું છે કે આ સહયોગથી હોર્મુઝની નાકાબંધી છતાં ભારતના ઘરોમાં ચૂલા સળગતા રહેશે.
આર્જેન્ટિનાએ ભારતની વ્હારે આવી રચ્યો ઇતિહાસ
પશ્ચિમ એશિયામાં તણાવ વધતા ભારતને તેના 60% LPG આયાત માટે નવા માર્ગો શોધવાની ફરજ પડી હતી. આ સમયે 20,000 કિલોમીટર દૂર સ્થિત દક્ષિણ અમેરિકન દેશ આર્જેન્ટિનાએ ભારતની મદદ કરી છે. વર્ષ 2026 ના પ્રથમ ત્રણ મહિનામાં જ આર્જેન્ટિનાએ ભારતને 50,000 ટન LPG નિકાસ કરી છે, જે વર્ષ 2025 માં મોકલવામાં આવેલા 22,000 ટન કરતા બમણાથી પણ વધુ છે.
આ સમાચાર પણ વાંચો : Donald Trump: વેનેઝુએલા અને ઈરાન પછી હવે આ દેશ નો વારો! ટ્રમ્પની આક્રમક જાહેરાતથી દુનિયા ચોંકી ગઈ.
ઉર્જા સુરક્ષા માટે વૈકલ્પિક સ્રોતોની શોધ
ભારતમાં આર્જેન્ટિનાના રાજદૂત મેરિયાનો ઓગસ્ટીન કોસિનોએ જણાવ્યું છે કે તેમનો દેશ ભારતની ઉર્જા સુરક્ષામાં મોટી ભૂમિકા ભજવવા તૈયાર છે. આર્જેન્ટિનાના બહિયા બ્લાન્કા પોર્ટથી ભારત માટે સતત જહાજો રવાના થઈ રહ્યા છે. 2024 પહેલા આર્જેન્ટિના ભારતને ગેસ સપ્લાય કરતું નહોતું, પરંતુ બદલાતી ભૌગોલિક-રાજકીય પરિસ્થિતિઓએ બંને દેશોને નજીક લાવી દીધા છે.
ભારતની દૂરંદેશી ઉર્જા નીતિ
ભારત સરકાર અત્યારે માત્ર રશિયા કે આર્જેન્ટિના જ નહીં, પણ અન્ય તેલ અને ગેસ સમૃદ્ધ દેશો સાથે પણ લાંબા ગાળાના કરારો કરી રહી છે. આ રણનીતિનો મુખ્ય ઉદ્દેશ્ય ઉર્જાના સ્રોતોમાં વિવિધતા લાવવાનો છે, જેથી ભવિષ્યમાં હોર્મુઝ જેવા સંવેદનશીલ માર્ગો પરની નિર્ભરતા ઓછી કરી શકાય. આ સમજૂતીઓમાં ખાનગી અને જાહેર ક્ષેત્રની કંપનીઓની ભાગીદારી પણ વધારવામાં આવશે.
