ન્યુઝ કન્ટીન્યુઝ બ્યુરો
મુંબઈ
13 ઓક્ટોબર 2020
કોરોના રસીને લઈને મોટા સમાચાર સામે આવ્યા છે. અમેરિકાની પ્રખ્યાત જોન્સન એન્ડ જોન્સન કંપનીને કોરોના વાયરસની વેક્સીનની ત્રીજા તબક્કાની ટ્રાયલ રોકવી પડી છે. ટ્રાયલમાં શામેલ એક વોલિયેન્ટરમાં કેટલીક અજાણી બિમારી દેખાયા બાદ ટ્રાયલ રોકવાનો નિર્ણય લેવાયો છે. કંપનીએ કહ્યું કે, ટેસ્ટમાં સામેલ દરેક વ્યક્તિની સુરક્ષા અમારી પ્રથમ જવાબદારી છે માટે અમે થોડા દિવસ માટે ટ્રાયલ અટકાવી રહ્યા છીએ.
કંપનીએ એક નિવેદન બહાર પાડીને આ માહિતી આપી છે. જેમાં જણાવ્યુ કે, એક વોલિયેન્ટરમાં કેટલીક અજાણી બિમારીઓ દેખતા અમને હાલ પોતાની કોવિડ-વેકસીન કેન્ડિડેટનું ક્લિનિકલ ટ્રાયલ અટકાવી દીધુ છે. જેમાં ENSEMBLE ટ્રાયલનો ત્રીજો તબક્કો શામેલ છે. આ અવરોધની તપાસ કરવા માટે એક સ્વતંત્ર દર્દી સુરક્ષા સમિતિ બનાવાઇ છે. તેની સાથે જ કંપની સ્ટડીમાં 60 હજાર લોકોને સામેલ કરવા માટે ઓનલાઇન એનરોલમેન્ટ પણ બંધ કરાયુ છે.
કંપનીનું કહેવુ છે કે ગંભીર પ્રતિકુળ ઇવેસ્ટ સર્જાવી કોઇ પણ, ખાસ કરીને મોટી ક્લિનિકલ સ્ટડીમાં અપેક્ષિત હોય છે. તેની માર્ગદર્શિકાને પગલે ટ્રાયલ રોકવામાં આવ્યું છે. ઉલ્લેખનીય છે કે આ વેક્સીનનું ટ્રાયલ અમેરિકા ઉપરાંત દક્ષિણ આફ્રિકા, આર્જેન્ટીના, બ્રાઝિલ, ચિલી, કોલંબિયા, મેક્સિકો અને પેરુમાં પણ થઇ રહ્યુ છે.
દરમિયાન નિષ્ણાતોનું કહેવું છે કે ભલે કંપનીની વેક્સીન અન્ય કરતા પાછળ હોય પરંતુ તેના અન્ય ઘણા ફાયદા છે. આ વેક્સીનનો સૌથી મોટો ફાયદો તે છે કે તેને સબઝીરો તાપમાનમાં સ્ટોર કરવાની જરૂર નથી. આ ઉપરાંત આ રસીના બે નહીં પરંતુ ફક્ત એક ડોઝથી જ ઇમ્યુનિટી વિકસિત થઇ શકે છે. આ વેક્સીન એડેનોવાયરસમાં કોરોના વાયરસના સ્પાઇક પ્રોટીનના જિન માણસના શરીરમાં પહોંચાડે છે.
