News Continuous Bureau | Mumbai
Chhattisgarh છત્તીસગઢના નક્સલ પ્રભાવિત જિલ્લાઓમાં સુરક્ષા દળોએ શનિવાર વહેલી સવારથી જ મોટું ઓપરેશન હાથ ધર્યું છે. સુકમા જિલ્લાના દક્ષિણ વિસ્તારના જંગલોમાં એન્ટી-નક્સલ ઓપરેશન દરમિયાન સુરક્ષા દળો અને નક્સલીઓ વચ્ચે સામસામે ગોળીબાર થયો હતો, જેમાં અત્યાર સુધીમાં ૧૨ નક્સલીઓ માર્યા ગયા છે. બીજી તરફ બીજાપુર જિલ્લામાં પણ સવારે ૫ વાગ્યાથી ચાલી રહેલી અથડામણમાં ૨ નક્સલીઓના શબ મળી આવ્યા છે. પોલીસ અધિકારીઓના જણાવ્યા અનુસાર હજુ પણ જંગલમાં રોકાઈ-રોકાઈને ફાયરિંગ ચાલુ છે.
સુકમામાં સુરક્ષા દળોની મોટી કાર્યવાહી
સુકમા પોલીસના જણાવ્યા અનુસાર, સુરક્ષાકર્મીઓની એક ટુકડી દક્ષિણ સુકમાના ગાઢ જંગલોમાં નક્સલ વિરોધી અભિયાન પર નીકળી હતી. સવારે અચાનક નક્સલીઓએ હુમલો કરતા સુરક્ષા દળોએ વળતો પ્રહાર કર્યો હતો. આ કાર્યવાહીમાં ૧૨ નક્સલીઓ ઠાર થયા છે. માર્યા ગયેલા નક્સલીઓની સંખ્યા હજુ વધી શકે છે.
બીજાપુરમાં સવારે ૫ વાગ્યાથી એન્કાઉન્ટર
બીજાપુર જિલ્લામાં ડિસ્ટ્રિક્ટ રિઝર્વ ગાર્ડ (DRG) ની ટીમે વહેલી સવારે ૫ વાગ્યે ઓપરેશન શરૂ કર્યું હતું. અધિકારીઓએ જણાવ્યું કે બીજાપુરના દક્ષિણ ક્ષેત્રના જંગલોમાં થયેલી અથડામણ બાદ ઘટનાસ્થળેથી બે નક્સલીઓના શબ અને હથિયારો જપ્ત કરવામાં આવ્યા છે.
આ સમાચાર પણ વાંચો : Copper: સોના-ચાંદીને ભૂલી જાવ, હવે આ ધાતુ તમને બનાવશે માલામાલ! 2009 પછીની સૌથી મોટી તેજી; હજુ 35% ભાવ વધવાની આગાહી.
નક્સલવાદ પર સતત શિકંજો
ગયા વર્ષે એટલે કે ૨૦૨૫માં છત્તીસગઢમાં સુરક્ષા દળોએ કુલ ૨૮૫ નક્સલીઓને ઠાર કર્યા હતા. ૨૦૨૬ના પહેલા જ સપ્તાહમાં આટલી મોટી સંખ્યામાં નક્સલીઓનો સફાયો કરીને સેનાએ સ્પષ્ટ સંકેત આપ્યો છે કે નક્સલવાદ વિરુદ્ધનું અભિયાન હવે વધુ આક્રમક બનશે.
