News Continuous Bureau | Mumbai
Monsoon Update 2026। દેશભરમાં અસહ્ય ગરમી અને બફારાથી પરેશાન નાગરિકો જેની આતુરતાથી રાહ જોઈ રહ્યા છે, તે નૈઋત્યના ચોમાસાને લઈને હવામાન વિભાગે (IMD) નવો અંદાજ જાહેર કર્યો છે. અગાઉ હવામાન વિભાગ દ્વારા કેરળમાં ૨૬ મેના રોજ જ ચોમાસું દસ્તક દેશે તેવી શક્યતા વ્યક્ત કરવામાં આવી હતી, પરંતુ તાજેતરના અહેવાલો મુજબ કેરળમાં મુસળધાર વરસાદની ગતિ થોડી ધીમી પડી છે. હવે કેરળમાં ચોમાસું બે દિવસ મોડું એટલે કે ૨૮ મે થી ૩ જૂનની વચ્ચે ગમે ત્યારે સત્તાવાર રીતે એન્ટ્રી કરે તેવી પ્રબળ શક્યતા છે. કેરળમાં વિલંબ થવાને કારણે મહારાષ્ટ્ર અને ગુજરાત સહિતના અન્ય રાજ્યોમાં પણ ચોમાસા માટે જૂન મહિનાના પ્રથમ અઠવાડિયા સુધી રાહ જોવી પડશે.
આંદામાનમાં ૧૬ મેના રોજ થયું હતું આગમન
હવામાન વિભાગના જણાવ્યા અનુસાર, આ વર્ષે ચોમાસું આંદામાન અને નિકોબાર ટાપુઓ પર ૧૬ મેના રોજ જ સમય કરતાં વહેલું પહોંચી ગયું હતું. આ સાનુકૂળ સ્થિતિને કારણે એવું માનવામાં આવતું હતું કે મુખ્ય ભૂમિ પર પણ તે વહેલું આવી જશે. જો કે, હાલમાં દક્ષિણ-પૂર્વ અરબી સમુદ્ર અને બંગાળની ખાડીમાંથી મોસમી પવનો આગળ વધવાની ગતિ થોડી મંદ પડી છે. આઈએમડીએ જણાવ્યું હતું કે, આગામી બે થી ત્રણ દિવસમાં અરબી સમુદ્રના કેટલાક ભાગો, કોમોરિન વિસ્તાર અને દક્ષિણ-પૂર્વ બંગાળની ખાડીમાં ચોમાસું આગળ વધવા માટે ફરીથી સાનુકૂળ વાતાવરણ સર્જાશે. કેરળમાં ચોમાસાની એન્ટ્રી સાથે જ દેશમાં સપ્ટેમ્બર સુધી ચાલનારી ચાર મહિનાની સત્તાવાર ચોમાસાની સિઝનની શરૂઆત થઈ જશે.
મુંબઈ-કોંકણમાં હળવા વરસાદની આશા
મહારાષ્ટ્રના હવામાનની વાત કરીએ તો, મુંબઈ અને આસપાસના ઉપનગરોમાં સોમવારે સવારથી જ વાદળછાયું વાતાવરણ જોવા મળી રહ્યું છે. હવામાન વિભાગે આગામી ૨૪ કલાકમાં મુંબઈમાં હળવા વરસાદની અને કોંકણ પટ્ટીમાં ગાજવીજ સાથે પ્રી-મોન્સૂન વરસાદની આગાહી કરી છે, જેનાથી લોકોને ગરમીથી થોડી રાહત મળશે. બીજી તરફ, રાજ્યના વિદર્ભ ક્ષેત્રમાં સ્થિતિ અત્યંત ગંભીર છે. વર્ધા, અમરાવતી અને અકોલા જિલ્લામાં સૂર્યદેવનો પ્રકોપ યથાવત છે અને ત્યાં તીવ્ર હીટવેવની આશંકાને પગલે હવામાન વિભાગ દ્વારા ‘રેડ એલર્ટ’ જાહેર કરવામાં આવ્યું છે.
ગરમીનો કહેર; સિરોંચામાં હીટસ્ટ્રોકના કારણે ૭૦૦ થી વધુ ચામાચીડિયાના મોત
મહારાષ્ટ્રના ગઢચિરોલી જિલ્લાના સિરોંચા તાલુકામાંથી ગરમીના પ્રકોપની એક અત્યંત ચોંકાવનારી અને દુઃખદ ઘટના સામે આવી છે. અહીં તાપમાનનો પારો સતત વધી રહ્યો હોવાના કારણે છેલ્લા બે દિવસમાં ૭૦૦ થી વધુ ચામાચીડિયાના મોત થયા છે. સિરોંચાની જિલ્લા પરિષદ શાળા પાછળ વન વિભાગના વિશ્રામ ગૃહ પરિસરમાં વર્ષોથી હજારોની સંખ્યામાં ચામાચીડિયા વસવાટ કરે છે. દિવસ દરમિયાન ઝાડની ડાળીઓ પર લટકી રહેતા આ અબોલ જીવો આ વર્ષની અસહ્ય ગરમી સહન ન કરી શક્યા અને એક પછી એક ઝાડ પરથી નીચે મરેલી હાલતમાં મળી આવ્યા હતા. વન વિભાગના અધિકારીઓએ ઘટનાસ્થળે પહોંચીને મૃત ચામાચીડિયાના સેમ્પલ લેબોરેટરી ટેસ્ટિંગ માટે મોકલી આપ્યા છે.
👉 આ સમાચાર વાચો:
Gold Silver Rates Today। ચાંદીના ભાવમાં ભયાનક ઉછાળો, સોનાના રેટ પણ વધ્યા; જાણી લો તમારા શહેરમાં ૧ તોલા સોનાની કિંમત
