News Continuous Bureau | Mumbai
Rahul Gandhi Savarkar Row લોકસભામાં વિરોધ પક્ષના નેતા અને કોંગ્રેસ સાંસદ રાહુલ ગાંધીને (Rahul Gandhi) વીર સાવરકર પર આપેલા કથિત વિવાદાસ્પદ નિવેદન કેસમાં સુપ્રીમ કોર્ટમાંથી (Supreme Court of India) મોટી રાહત મળી છે. સુપ્રીમ કોર્ટે લખનૌની નીચલી અદાલત દ્વારા રાહુલ ગાંધી વિરુદ્ધ જારી કરાયેલા સમન્સને સંપૂર્ણપણે રદ કરી દીધું છે. ઉત્તર પ્રદેશ સરકારે જ્યારે અદાલતમાં જણાવ્યું કે રાહુલ ગાંધી સામે કેસ ચલાવવા માટે જરૂરી કાયદેસર મંજૂરી (Prosecution Sanction) આપવામાં આવી નથી, ત્યારે કોર્ટે આ નિર્ણય આપ્યો હતો.
Rahul Gandhi Savarkar Row – શું હતો સમગ્ર મામલો અને ક્યાંથી શરૂ થયો વિવાદ?
આ સમગ્ર મામલો લખનૌના એડવોકેટ નૃપેન્દ્ર પાંડે દ્વારા દાખલ કરવામાં આવેલી ફરિયાદ બાદ સામે આવ્યો હતો. ફરિયાદમાં આરોપ મૂકવામાં આવ્યો હતો કે ૧૭ ડિસેમ્બર ૨૦૨૨ના રોજ મહારાષ્ટ્રના અકોલામાં ભારત જોડો યાત્રા દરમિયાન પત્રકાર પરિષદમાં રાહુલ ગાંધીએ વીર સાવરકર અંગે વાંધાજનક ટિપ્પણી કરી હતી અને તેમને અંગ્રેજો પાસેથી પેન્શન લેનારા કહ્યા હતા. આ મામલે IPC ની કલમ 153A અને 505 હેઠળ કાર્યવાહી કરવાની માગ કરવામાં આવી હતી અને લખનૌની ACJM કોર્ટે રાહુલ ગાંધીને સમન્સ પાઠવ્યું હતું.
Rahul Gandhi Savarkar Row – હાઇકોર્ટથી સુપ્રીમ કોર્ટ સુધીની કાનૂની લડાઈ અને વચગાળાની રાહત
લખનૌ કોર્ટના સમન્સ સામે રાહુલ ગાંધીએ અલ્હાબાદ હાઇકોર્ટના દ્વાર ખખડાવ્યા હતા, પરંતુ હાઇકોર્ટની લખનૌ બેન્ચે સમન્સ રદ કરવાનો ઇનકાર કર્યો હતો. ત્યારબાદ તેઓ સુપ્રીમ કોર્ટ પહોંચ્યા હતા. સુપ્રીમ કોર્ટે શરૂઆતમાં રાહુલ ગાંધીના નિવેદન સામે નારાજગી વ્યક્ત કરીને વચગાળાનો સ્ટે આપ્યો હતો. આખરે યુપી સરકાર દ્વારા કાયદેસર કાર્યવાહી માટે પૂર્વ મંજૂરી ન હોવાનું સ્પષ્ટ કરાતાં સુપ્રીમ કોર્ટે આ સમગ્ર સમન્સ પ્રક્રિયાને જ રદબાતલ ઠેરવી દીધી છે.
Rahul Gandhi Savarkar Row – સુનાવણી દરમિયાન કોર્ટે કરી હતી આકરી ટિપ્પણીઓ
અગાઉની સુનાવણી દરમિયાન સુપ્રીમ કોર્ટની બેન્ચે રાહુલ ગાંધીના નિવેદન પર કડક વલણ અપનાવ્યું હતું. કોર્ટે ટિપ્પણી કરતાં કહ્યું હતું કે રાજકીય નેતાઓએ દેશના સ્વાતંત્ર્ય સેનાનીઓના ઈતિહાસ અને યોગદાન વિશે યોગ્ય માહિતી રાખવી જોઈએ. કોર્ટે ઈન્દિરા ગાંધીના સાવરકર અંગેના ઐતિહાસિક પત્રોનો પણ ઉલ્લેખ કર્યો હતો. આ કાનૂની રાહત મળતાં રાહુલ ગાંધી સામે લખનૌની અદાલતમાં ચાલી રહેલી ફોજદારી કાર્યવાહીનો અંત આવ્યો છે.
👉 આ સમાચાર વાચો:
TMKOC Bagha Actor BMW X1 ‘તારક મહેતા…’ ના ‘બાઘા’ ઉર્ફે તન્મય વેકરિયાએ ખરીદી અધધ ૬૫ લાખની લક્ઝરી BMW X1 કાર..
