News Continuous Bureau | Mumbai
Red Fort Blast લાલ કિલ્લા બ્લાસ્ટ કેસની તપાસમાં સુરક્ષા એજન્સીઓનો એક ચોંકાવનારો ખુલાસો થયો છે. તપાસ એજન્સીઓની કેસ ડાયરીમાં નોંધાયેલા રિપોર્ટ મુજબ, વિસ્ફોટક બનાવવામાં એસિટોન (જે નેલ પોલિશ રીમુવર છે) અને પીસેલી ખાંડનો ઉપયોગ કરવામાં આવ્યો હતો. ફરીદાબાદમાંથી જપ્ત કરાયેલા વિસ્ફોટકનો અને આ બ્લાસ્ટનો માસ્ટરમાઇન્ડ ડોક્ટર ઉમર મોહમ્મદ હતો, જેનું મૃત્યુ થઈ ચૂક્યું છે. તપાસમાં જાણવા મળ્યું છે કે ડોક્ટર ઉમર મોહમ્મદ જૈશ-એ-મોહમ્મદનો ટ્રેન્ડ આતંકી હતો અને તેણે દેશમાં અત્યાર સુધીના સૌથી મોટા આતંકી હુમલાનું ષડયંત્ર રચ્યું હતું.
‘ડોક્ટર ઉમરને ૯ થી વધુ ભાષાઓનું જ્ઞાન હતું’
પકડાયેલા આતંકી મુઝમ્મિલના કબૂલાતનામા અનુસાર, ડોક્ટર ઉમર પોતાને ‘આમિર’ કહેતો હતો, જેનો અર્થ ‘રાજકુમાર’, ‘સેનાપતિ’ અથવા ‘શાસક’ થાય છે. મુઝમ્મિલે જણાવ્યું, ‘તે પોતાની જાતને એક શાસક-એક રાજકુમાર માનતો હતો, જે હંમેશા દીન ની વાતો કરતો હતો. પોતાની જાત કરતા વધુ કાબિલ અને ભણેલો-ગણેલો તે કોઈને સમજતો ન હતો. ડોક્ટર ઉમરને ૯ થી વધુ ભાષાઓનું જ્ઞાન હતું, જેમાં હિન્દી, ઉર્દૂ, ઇંગ્લિશ, પર્શિયન, અરબી, ચાઇનીઝ, ફ્રેન્ચ નો સમાવેશ થાય છે. ઉમરની નજરમાં ડોક્ટર અદીલ એક ખજાનચી હતો. તે એટલો ભણેલો-ગણેલો અને તેજસ્વી મગજનો હતો કે તે એક સાઇન્ટિસ્ટ બની શકતો હતો.’
‘વિસ્ફોટક બનાવવા માટે ટેસ્ટિંગ પોતે જ કરતો હતો’
તપાસમાં એ પણ જાણવા મળ્યું છે કે જુલાઈ ૨૦૨૩ ની મેવાતના નૂંહમાં થયેલી હિંસા અને માર્ચ ૨૦૨૩ ના નાસિર-જુનૈદ ભિવાની હત્યાકાંડે ડોક્ટર ઉમર મોહમ્મદને આ ભયાનક ષડયંત્ર માટે પ્રેરિત કર્યો. મુઝમ્મિલે કબૂલ્યું, ‘જમ્મુ-કાશ્મીરમાંથી કલમ 370 હટાવ્યા પછી તેના દિલ અને દિમાગમાં સુરક્ષા દળો માટે ખૂબ નફરત હતી. ફરીદાબાદમાં સ્ટોર કરીને રાખવામાં આવેલો વિસ્ફોટક લઈને અમને બધાને જમ્મુ-કાશ્મીર પણ જવાનું હતું, ઉમર ત્યાં કંઈક મોટું કરવાનું વિચારી રહ્યો હતો.’ મુઝમ્મિલે જણાવ્યું કે ઉમર તેમની સાથે નૂંહ મેવાતમાંથી યુરિયા લઈને આવતો હતો અને તેનાથી વિસ્ફોટક બનાવવાની ટેસ્ટિંગ પોતે જ અલ ફલાહ યુનિવર્સિટીના પોતાના રૂમ નંબર ૪ માં કરતો હતો.
‘અમે ૫ લોકો મળીને એક મોટી સાજિશ રચી રહ્યા હતા’
ષડયંત્રમાં સામેલ લોકોમાં મુઝમ્મિલ, ઉમર, અદીલ, શાહીન અને મુફ્તી ઇરફાન હતા. મુઝમ્મિલે કહ્યું, ‘અમે ૫ લોકો મળીને એક મોટી સાજિશ તૈયાર કરી રહ્યા હતા. આ બધાનો હેડ ઉમર જ હતો, કારણ કે તે અમારા બધામાં સૌથી તેજ અને ખૂબ જ વધુ એક્ટિવ હતો. અમે એક ગ્રુપ બનાવ્યું હતું, જેનો એડમિન ઉમર હતો અને આ ગ્રુપ ઉમરે ચાઇનીઝ ભાષામાં બનાવ્યું હતું. તેમાં માત્ર ચાઇનીઝ ભાષામાં જ વાત થતી હતી અને ગ્રુપનું નામ પણ ચાઇનીઝ ભાષામાં હતું. ઉમરે માત્ર ૬ મહિનામાં ચીની ભાષા શીખી લીધી હતી અને અમે બધા એક ચાઇનીઝ કોર ગ્રુપમાં જ વાત કરતા હતા.’
અંગત જીવન અને વિસ્ફોટકની તૈયારી
મુઝમ્મિલે પોતાની અંગત જિંદગી વિશે જણાવતા કહ્યું કે, ‘મારી શાહીન સાથે મુલાકાત અલ ફલાહમાં થઈ હતી. તે મારા કરતા ઘણી મોટી હતી અને તેનો પગાર પણ મારા કરતા વધુ હતો અને હું તેની સાથે લગ્ન કરવા માંગતો હતો.’ ડોક્ટર શાહીન સાઉદી અરેબિયામાં પણ રહીને આવી છે, ત્યાં પણ તે એસિસ્ટન્ટ પ્રોફેસર હતી. તેણે આતંકી મોડ્યુલ માટે પોતાના બેન્ક ખાતામાંથી લગભગ ૨૫ લાખ રૂપિયા અમને બધાને આપ્યા હતા. મુઝમ્મિલે કબૂલ્યું કે તેઓ TATP વિસ્ફોટક પણ તૈયાર કરી રહ્યા હતા અને ACETONE પણ તેમની પાસે હતું.
આ સમાચાર પણ વાંચો : Imran Khan Death: પાક રાજકારણ: ઇમરાન ખાનના મૃત્યુના સમાચારો પર મોટો ખુલાસો, જાણો જેલના સૂત્રોએ શું માહિતી આપી?
‘મુફ્તી ઇરફાનના પકડાઈ જવાથી પ્લાન ફેલ થયો’
મુઝમ્મિલે જણાવ્યું, ‘વિસ્ફોટકનો એક મોટો જથ્થો અમે સુરક્ષાબળો વિરુદ્ધ ઉપયોગ કરવા માટે જમ્મુ-કાશ્મીર લઈ જવાના હતા, પરંતુ પ્લાન ફેલ થઈ ગયો. ૧૫ ઓક્ટોબરની આસપાસ જમ્મુ-કાશ્મીર પોલીસે ૩ લોકોને પકડ્યા, જેમાં એક પ્રિન્ટિંગ પ્રેસવાળો હતો અને બે પોસ્ટર લગાવનારા છોકરાઓ હતા. પૂછપરછમાં છોકરાઓએ મુફ્તી ઇરફાનનું નામ લીધું અને ૧૮ તારીખે તે પકડાઈ ગયો. આની સાથે જ અમારા પ્લાનનો પર્દાફાશ થઈ ગયો, કારણ કે મુફ્તીના મોબાઇલ ફોનમાં પણ અમારા બધાનું એક ગ્રુપ બનેલું હતું, જેના પછી ફરીદાબાદમાંથી મારી ધરપકડ થાય છે.’
