News Continuous Bureau | Mumbai
ભારત સરકારે TikTok પરથી પ્રતિબંધ હટાવ્યો નથી. શુક્રવારે સરકારી સૂત્રોએ આ સ્પષ્ટતા કરી. આ નિવેદન એવા સમયે આવ્યું છે જ્યારે કેટલાક યુઝર્સ દ્વારા TikTok ના વેબસાઇટને એક્સેસ કરી શકાતી હોવાના અહેવાલો આવ્યા હતા. જોકે, આ પ્લેટફોર્મ પર વીડિયો જોવા માટે તેઓ લોગ ઇન કરી શક્યા ન હતા. વીડિયો-સ્ટ્રીમિંગ પ્લેટફોર્મની એપ પણ એપ સ્ટોર્સ પર ઉપલબ્ધ ન હતી.
શા માટે TikTok પર પ્રતિબંધ મૂકવામાં આવ્યો હતો?
ભારતે ૨૦૨૦ માં ગલવાન ખીણના સંઘર્ષ પછી દેશની સાર્વભૌમત્વ અને સુરક્ષા માટે જોખમ જોતા ૫૯ ચીની મોબાઇલ એપ્લિકેશન્સ પર પ્રતિબંધ મૂક્યો હતો. જેમાં TikTok, WeChat અને Helo જેવી લોકપ્રિય સોશિયલ મીડિયા પ્લેટફોર્મનો સમાવેશ થાય છે. ગુપ્તચર એજન્સીઓએ ૨૯ જૂન, ૨૦૨૦ ના રોજ પ્રતિબંધિત કરાયેલી મોટાભાગની એપ્લિકેશન્સ વિશે લાલ ઝંડી બતાવી હતી. આ એપ્સ યુઝર ડેટા એકત્ર કરીને તેને દેશની બહાર મોકલી રહી હોવાની ચિંતા વ્યક્ત કરવામાં આવી હતી. સરકારે જણાવ્યું હતું કે આ એપ્લિકેશન્સ ‘ભારતની સાર્વભૌમત્વ અને અખંડિતતા, ભારતની સુરક્ષા, રાજ્યની સુરક્ષા અને જાહેર વ્યવસ્થા માટે પૂર્વગ્રહયુક્ત પ્રવૃત્તિઓમાં’ સામેલ હતી.
ભારત-ચીન સંબંધોમાં સુધારો
તાજેતરમાં, ભારત અને ચીને સંબંધો સુધારવા માટે કેટલાક રચનાત્મક પગલાં લીધા છે. જેમાં લિપુલેખ પાસ, શિપકી લા પાસ અને નાથુ લા પાસ જેવા ત્રણ નિયુક્ત ટ્રેડિંગ પોઈન્ટ્સ દ્વારા વેપાર ફરીથી શરૂ કરવામાં આવ્યો છે. બંને પક્ષોએ ચીન અને ભારત વચ્ચે સીધી ફ્લાઈટ કનેક્ટિવિટી ફરીથી શરૂ કરવા અને અપડેટેડ એર સર્વિસ એગ્રીમેન્ટને અંતિમ સ્વરૂપ આપવા પણ સંમતિ આપી છે. તેઓએ પ્રવાસીઓ, વેપારીઓ, મીડિયા અને અન્ય મુલાકાતીઓ માટે વિઝાની સુવિધા આપવા પર પણ સહમતિ વ્યક્ત કરી છે.
આ સમાચાર પણ વાંચો : Sergio Gor: ટ્રમ્પે ભારતમાં અમેરિકાના નવા રાજદૂત તરીકે કરી સેર્ગીઓ ગોરની નિમણૂક, જાણો વિશ્લેષકો નું શું કહેવું છે.
વડાપ્રધાન મોદીની ચીન મુલાકાત
વડાપ્રધાન નરેન્દ્ર મોદી ૩૧ ઓગસ્ટથી ૧ સપ્ટેમ્બર સુધી તિયાનજિનમાં યોજાનારી શાંઘાઈ કોઓપરેશન ઓર્ગેનાઈઝેશન સમિટમાં ભાગ લેવા માટે ચીનની મુલાકાત લેશે. આ સમિટની બાજુમાં, વડાપ્રધાન સમિટમાં હાજરી આપતા અન્ય કેટલાક નેતાઓ સાથે દ્વિપક્ષીય બેઠકો પણ યોજે તેવી અપેક્ષા છે.
