News Continuous Bureau | Mumbai
India vs Pakistan ટી-20 વર્લ્ડ કપ 2026 માં જેની આખી દુનિયા રાહ જોઈ રહી છે તે ભારત અને પાકિસ્તાન (IND vs PAK) વચ્ચેનો મુકાબલો હવે ગણતરીના કલાકો દૂર છે. આ મોટા જંગ માટે સૂર્યકુમાર યાદવની આગેવાની હેઠળની ભારતીય ટીમ કોલંબો પહોંચી હતી. એરપોર્ટ પર ટીમ ઇન્ડિયાનું પરંપરાગત રીતે ભવ્ય સ્વાગત કરવામાં આવ્યું હતું, જ્યાં ફાસ્ટ બોલર અર્શદીપ સિંહે પોતાના અંદાજથી સૌના દિલ જીતી લીધા હતા. એરપોર્ટ પર શ્રીલંકન કલાકારો પરંપરાગત નૃત્ય અને ઢોલ-નગારા સાથે ખેલાડીઓને આવકારી રહ્યા હતા. આ દરમિયાન જ્યારે અર્શદીપ સિંહ ત્યાંથી પસાર થયો, ત્યારે તે પણ કલાકારોની સ્ટાઈલમાં ડાન્સ કરતા કરતા આગળ વધ્યો હતો. હાર્દિક પંડ્યા પણ આ દરમિયાન ટીમ સાથે જોવા મળ્યો હતો. ટીમ ઇન્ડિયા અત્યારે પોઈન્ટ ટેબલમાં ટોપ પર છે અને પાકિસ્તાન બીજા સ્થાને છે.
પ્રતિષ્ઠાનો જંગ: કોણ મારશે બાજી?
ભારત અને પાકિસ્તાન બંને અત્યાર સુધીની પોતાની બંને મેચો જીતીને આવી રહ્યા છે. કાગળ પર ભલે ભારતીય ટીમ મજબૂત દેખાતી હોય, પરંતુ આ મેચ માત્ર પોઈન્ટ્સ માટે નહીં પણ પ્રતિષ્ઠાની લડાઈ છે. બંને દેશોના ચાહકો આ મેચને લઈને અત્યંત ઉત્સાહિત છે. કોલંબોના આર. પ્રેમદાસા સ્ટેડિયમમાં આ હાઈ-વોલ્ટેજ ડ્રામા જોવા મળશે, જ્યાં દબાણ બંને ટીમો પર સમાન હશે.
અભિષેક શર્માના રમવા પર હજુ પણ પ્રશ્નાર્થ
ભારતીય ચાહકો માટે સૌથી મોટો સવાલ એ છે કે શું વિસ્ફોટક ઓપનર અભિષેક શર્મા આ મેચમાં રમશે? પેટમાં ઇન્ફેક્શનના કારણે તેને બે દિવસ હોસ્પિટલમાં દાખલ કરવો પડ્યો હતો. જોકે તે ટીમની સાથે કોલંબો પહોંચી ગયો છે, પરંતુ તે 100% ફિટ છે કે નહીં તે હજુ સ્પષ્ટ થયું નથી. જો તે નહીં રમે તો ભારતની બેટિંગ લાઇનઅપમાં ફેરફાર જોવા મળી શકે છે.
VIDEO | Sri Lanka: Pacer Arshdeep Singh joins Sri Lankan dancers stationed to welcome the team in a traditional fashion. Team India arrived in Colombo ahead of the India–Pakistan T20 World Cup clash. Head coach Gautam Gambhir led the contingent out of the airport, while batter… pic.twitter.com/w8HxsReuF2
— Press Trust of India (@PTI_News) February 13, 2026
આ સમાચાર પણ વાંચો : Snake in Vande Bharat: વંદે ભારતમાં સાપ! મુસાફરોમાં મચ્યો હાહાકાર, શૌચાલયમાં સાપ છોડી ભાગી જનાર યુવક જેલ ભેગો.
ક્યાં અને ક્યારે જોશો લાઈવ મેચ?
ભારત અને પાકિસ્તાન વચ્ચેની આ મેચ 15 ફેબ્રુઆરીએ ભારતીય સમય અનુસાર સાંજે 7:00 વાગ્યે શરૂ થશે. આ મેચનું લાઈવ પ્રસારણ સ્ટાર સ્પોર્ટ્સ નેટવર્ક પર થશે, જ્યારે ચાહકો ‘જિયો હોટસ્ટાર’ એપ પર લાઈવ સ્ટ્રીમિંગ માણી શકશે. કોલંબોમાં વરસાદની આગાહી હોવાથી ચાહકો પ્રાર્થના કરી રહ્યા છે કે મેચમાં કોઈ વિઘ્ન ન આવે.
