News Continuous Bureau | Mumbai
IPL 2026 Prize Money। આઈપીએલ ૨૦૨૬ (IPL 2026) નો ભવ્ય ખિતાબ જીતતાની સાથે જ રોયલ ચેલેન્જર્સ બેંગલુરુ (RCB) ની ટીમ પર કરોડો રૂપિયાની ધનવર્ષા થઈ છે. ફાઇનલ મેચમાં ગુજરાત ટાઇટન્સને ૫ વિકેટે હરાવીને આરસીબીએ સતત બીજી વખત ટ્રોફી પર કબ્જો કર્યો છે. રવિવારે રમાયેલી આ રોમાંચક મેચમાં ભલે ગુજરાત ટાઇટન્સ (GT) ને હારનો સામનો કરવો પડ્યો હોય, પરંતુ રનરઅપ બનવા બદલ તેમના પર પણ મોટી રકમનો વરસાદ થયો છે. આ ઉપરાંત, પ્લેઓફમાં ત્રીજા અને ચોથા ક્રમે રહેલી ટીમોને પણ પ્રાઈઝ મની (Prize Money) તરીકે કરોડો રૂપિયા એનાયત કરવામાં આવ્યા છે.
ચેમ્પિયન આરસીબીને મળ્યા ૨૦ કરોડ, શુભમન ગિલની ગુજરાત ટાઇટન્સને ૧૨.૫૦ કરોડ
આઈપીએલ ૨૦૨૬ ની ફાઇનલ મેચ સમાપ્ત થયા બાદ જાહેર કરાયેલી સત્તાવાર વિગતો અનુસાર, વિજેતા બનેલી રોયલ ચેલેન્જર્સ બેંગલુરુની ટીમને ટ્રોફીની સાથે ૨૦ કરોડની તોતિંગ પ્રાઈઝ મની આપવામાં આવી છે. નોંધનીય છે કે વર્ષ ૨૦૨૫ માં જ્યારે ટીમે પહેલીવાર આ ખિતાબ જીત્યો હતો, ત્યારે પણ તેને આટલી જ રકમ મળી હતી. બીજી તરફ, શુભમન ગિલની (Shubman Gill) કેપ્ટનશીપ હેઠળ રનર-અપ રહેલી ગુજરાત ટાઇટન્સની ટીમને ૧૨.૫૦ કરોડનું ઈનામ મળ્યું છે. આ સિવાય ત્રીજા નંબરે રહેલી સંજુ સેમસનની રાજસ્થાન રોયલ્સ (RR) ને ૭ કરોડ અને ચોથા ક્રમે રહેલી સનરાઇઝર્સ હૈદરાબાદ (SRH) ની ટીમને ૬.૫ કરોડ મળ્યા છે.
રજત પાટીદારે કેપ્ટન બનતા જ બદલી આરસીબીની કિસ્મત, રચ્યો નવો ઈતિહાસ
રોયલ ચેલેન્જર્સ બેંગલુરુની ટીમ વર્ષ ૨૦૦૮ થી એટલે કે આઈપીએલની પ્રથમ સીઝનથી રમી રહી છે, પરંતુ શરૂઆતના ૧૭ વર્ષ સુધી આ ટીમ એક પણ આઈપીએલ ટ્રોફી જીતી શકી નહોતી. જોકે, ટીમની કિસ્મત ત્યારે ચમકી જ્યારે યુવા ખેલાડી રજત પાટીદારને (Rajat Patidar) ટીમનો નવો કેપ્ટન બનાવવામાં આવ્યો. પાટીદારે પોતાની શાનદાર કેપ્ટનશીપ હેઠળ પહેલા ૨૦૨૫ અને હવે ૨૦૨૬ નો ખિતાબ જીતાડીને ઇતિહાસ રચી દીધો છે. આ સાથે જ પોતાની કપ્તાનીની પ્રથમ બંને સીઝનમાં બેક-ટુ-બેક આઈપીએલ ટ્રોફી જીતનારો રજત પાટીદાર ક્રિકેટ જગતનો પ્રથમ કેપ્ટન બની ગયો છે.
કિંગ કોહલીની અણનમ ૭૫ રનની ઇનિંગ, ૧૮ ઓવરમાં આરસીબીએ મેળવ્યો લક્ષ્યાંક
ફાઇનલ મેચના અહેવાલ પર નજર કરીએ તો, પ્રથમ બેટિંગ કરતા ગુજરાત ટાઇટન્સની ટીમે ૮ વિકેટના નુકસાને ૧૫૫ રન બનાવ્યા હતા. આરસીબી સામે જીતવા માટે ૧૫૬ રનનો સામાન્ય સ્કોર હતો, જેને બેંગલુરુની ટીમે માત્ર ૧૮ ઓવરમાં જ ૫ વિકેટ ગુમાવીને સરળતાથી હાસિલ કરી લીધો હતો. આરસીબી તરફથી ઇનિંગની શરૂઆત કરવા ઉતરેલા રન મશીન વિરાટ કોહલીએ (Virat Kohli) છેલ્લી ઓવર સુધી ક્રિઝ પર ટકી રહીને અણનમ ઇનિંગ રમી હતી. કોહલીએ માત્ર ૪૨ બોલમાં ૯ ચોગ્ગા અને ૩ ગગનચુંબી છગ્ગાની મદદથી શાનદાર ૭૫ રન ફટકારીને ટીમને સતત બીજી વાર ચેમ્પિયન બનાવવામાં મુખ્ય ભૂમિકા ભજવી હતી.
👉 આ સમાચાર વાચો:
IPL 2026।ગુજરાત ટાઈટન્સની બસમાં અચાનક નીકળ્યા ધુમાડા IPL ફાઈનલ બાદ ખેલાડીઓ મુસાફરી કરી રહ્યા હતા ત્યારે જ બની આ ઘટના!
