ન્યુઝ કન્ટિન્યુઝ બ્યુરો
મુંબઈ, 31 જાન્યુઆરી 2022
સોમવાર
ભારતીય અવકાશયાત્રી રાકેશ શર્મા પર એક બાયોપિક બનવા જઈ રહી છે, જેનું નિર્માણ સિદ્ધાર્થ રોય કપૂર કરી રહ્યા છે. આ ફિલ્મની કાસ્ટ અત્યાર સુધીમાં ઘણી વખત બદલાઈ છે. આ ફિલ્મ સાથે ઘણા મોટા નામ જોડાયેલા છે. શાહરૂખ ખાન અને વિકી કૌશલ બાદ હવે તેમાં વધુ એક નવું નામ ઉમેરાય તેમ લાગી રહ્યું છે.એક ન્યૂઝ પોર્ટલ ના અહેવાલ મુજબ, ફરહાન અખ્તર હવે રાકેશ શર્માની બાયોપિક સેલ્યુટઃ સારે જહાં સે અચ્છામાં મુખ્ય ભૂમિકા ભજવશે. તે રાકેશ શર્માની ભૂમિકામાં જોવા મળશે. ફિલ્મના નિર્માતા સિદ્ધાર્થ રોય કપૂરે પણ આ અંગે વાત કરી છે. પોર્ટલ સાથે વાત કરતાં તેણે કહ્યું હતું કે, જ્યારે અમે શૂટિંગ શરૂ કરીશું ત્યારે હું તેની જાહેરાત કરીશ.
સિદ્ધાર્થે તેની બાકીની ફિલ્મો વિશે પણ જણાવ્યું. “અમારી પાસે પાઇપલાઇનમાં પિપ્પા (ઇશાન ખટ્ટર અને મૃણાલ ઠાકુર) છે. તેનું હજુ 3 મહિનાનું શૂટિંગ બાકી છે અને તે આ વર્ષના અંતમાં રિલીઝ થશે. અમારી પાસે વો લડકી હૈ કહાં (તાપસી પન્નુ અને પ્રતીક ગાંધી) પણ છે જેનું શૂટિંગ અત્યારે ચાલી રહ્યું છે. તે પછી દેખીતી રીતે જ રોકેટ બોયઝની બીજી સીઝન અને આરણ્યકની બીજી સીઝન છે.
રાકેશ શર્માની બાયોપિકની વાત કરીએ તો આ ફિલ્મનું શૂટિંગ ગયા વર્ષે સપ્ટેમ્બરમાં શરૂ થવાનું હતું પરંતુ શાહરૂખ તેની તારીખો આપી શક્યો ન હતો. આ પહેલા આમિર ખાનનું નામ પણ તેની સાથે જોડાયું હતું. આટલું જ નહીં ફિલ્મમાં રાકેશ શર્માની પત્ની માટે પણ ઘણા નામ સામે આવ્યા છે.કરીના કપૂર, કેટરિના કૈફ અને અનુષ્કા શર્માથી લઈને ભૂમિ પેડનેકર સુધી રાકેશ શર્માની પત્નીના નામની ચર્ચા થઈ છે. એક સમયે એવું કહેવામાં આવી રહ્યું હતું કે ફિલ્મનું કામ બંધ થઈ ગયું છે અને તે કોલ્ડ સ્ટોરેજમાં ગઈ છે. પરંતુ 2022માં આ ફિલ્મથી ફરી આશા જાગી છે.
