News Continuous Bureau | Mumbai
Ghoomar Song Padmavat| બોલિવૂડ ફિલ્મોમાં ગીતોને ભવ્ય અને યાદગાર બનાવવા માટે નિર્માતાઓ અવારનવાર કરોડો રૂપિયાના આંધણ કરીને વિશાળ સેટ તૈયાર કરતા હોય છે. પરંતુ જ્યારે પણ હિન્દી સિનેમાના સૌથી મોંઘા અને ભવ્ય સેટની વાત આવે, ત્યારે લોકોના મનમાં સૌથી પહેલું નામ દિગ્દર્શક સંજય લીલા ભણસાલીનું આવે છે. તેમણે થોડા વર્ષો પહેલાં પોતાની એક કલ્ટ ફિલ્મ માટે એક એવું ગીત બનાવ્યું હતું, જેનું કુલ બજેટ જ અધધ ૧૨ કરોડ રૂપિયા હતું. મનોરંજન જગતના અહેવાલો મુજબ, આ ગીતમાં કલાકારોના દાગીના અને સજાવટ માટે આશરે ૪૦૦ કિલો સોનાનો ઉપયોગ કરાયો હતો અને રાજસ્થાનના ઐતિહાસિક જયગઢ કિલ્લામાં તેનું શૂટિંગ કરવામાં આવ્યું હતું.
દીપિકા પાદુકોણ પર ફિલ્માવાયું હતું ‘ઘૂમર’ ગીત
અમે જે ભવ્ય ગીતની વાત કરી રહ્યા છીએ તે બીજું કોઈ નહીં પરંતુ સુપરહિટ ફિલ્મ ‘પદ્માવત’ નું પ્રખ્યાત લોકગીત ‘ઘૂમર’ (Ghoomar) છે, જેને અભિનેત્રી દીપિકા પાદુકોણ પર અત્યંત રોયલ અંદાજમાં ફિલ્માવવામાં આવ્યું હતું. આ ગીત માટે રાજસ્થાની સંસ્કૃતિને અનુરૂપ હૂબહૂ સેટ તૈયાર કરવામાં મોટો આર્થિક ખર્ચ થયો હતો, જેના લીધે તે બોલિવૂડના ઇતિહાસના સૌથી મોંઘા ગીતોની યાદીમાં સામેલ થઈ ગયું હતું. ગીતમાં રાણી પદ્માવતી બનેલી દીપિકા પાદુકોણના શાહી લહેંગાનું વજન આશરે ૩૦ કિલો હતું, જેની કિંમત તે સમયે ૩૦ લાખ રૂપિયા હોવાનું કહેવાય છે. આ લહેંગાને જાણીતા ફેશન ડિઝાઈનર રિમ્પલ નરુલાએ ડિઝાઈન કર્યો હતો અને અભિનેત્રીએ આટલા ભારે વજન સાથે કેમેરા સામે ૬૦ થી વધુ વાર ગોળ ચક્કર લગાવીને પ્રોફેશનલ ડાન્સ કર્યો હતો.
ગીતના કપડાં અને ઇતિહાસની રજૂઆત બદલ કરણી સેનાએ નોંધાવ્યો હતો આકરો વિરોધ
આ ગીત જેટલું ભવ્ય હતું, તેની રિલીઝ સાથે જ તેટલો જ મોટો રાષ્ટ્રીય વિવાદ પણ સર્જાયો હતો. ‘ઘૂમર’ ગીત રિલીઝ થતાંની સાથે જ રાજપૂત સંગઠન ‘કરણી સેના’ એ દીપિકાના લહેંગામાં તેની કમર (પેટ) દેખાવા પર સખત વાંધો ઉઠાવ્યો હતો. સંગઠનનું કહેવું હતું કે રાજપૂત રાણીઓ ક્યારેય આ પ્રકારના ટૂંકા કે ખુલ્લા કપડાં પહેરતી નહોતી અને તેઓ ક્યારેય સજા જાહેર દરબારમાં પુરુષો સામે નૃત્ય કરતી નહોતી, પરંતુ માત્ર મહિલાઓની હાજરીમાં જ ડાન્સ કરતી હતી. સંગઠનોએ મેકર્સ પર ઇતિહાસને ખોટી રીતે રજૂ કરવાનો ગંભીર આરોપ લગાવ્યો હતો. ત્યારબાદ વિવાદ શાંત કરવા માટે ટેકનિકલ એડિટિંગ (VFX) ની મદદથી દીપિકાની ડ્રેસને કમ્પ્યુટર દ્વારા સુધારીને ગીતને ફરીથી રિલીઝ કરવામાં આવ્યું હતું, જેને સોશિયલ મીડિયા પર ‘ઘૂમર ૨.૦’ નામ અપાયું હતું.
વિવાદ છતાં યુટ્યુબ પર ૨૫૦ મિલિયનથી વધુ વ્યુઝ
આટલા મોટા વિવાદ અને હોબાળા છતાં, જ્યારે ફિલ્મ અને ગીત સિનેમાઘરોમાં રિલીઝ થયા, ત્યારે દર્શકોએ તેને દેશ-વિદેશમાં ખૂબ જ પ્રેમ આપ્યો હતો. સોશિયલ મીડિયા પર લાખો લોકોએ દીપિકાના આ ડાન્સ સ્ટેપ્સને રીક્રિએટ કરીને રીલ્સ બનાવી હતી અને યુટ્યુબ પર અત્યાર સુધીમાં આ વીડિયો ગીતને ૨૫૩ મિલિયનથી (૨૫ કરોડથી વધુ) વધુ વ્યુઝ મળી ચૂક્યા છે. ઉલ્લેખનીય છે કે, ‘પદ્માવત’ ફિલ્મમાં દીપિકા પાદુકોણની સાથે રણવીર સિંહે ક્રૂર શાસક અલાઉદ્દીન ખીલજીનું આઇકોનિક પાત્ર ભજવ્યું હતું, જ્યારે શાહિદ કપૂરે મહારાજા રાવલ રતન સિંહની ભૂમિકા અદા કરી હતી. સંજય લીલા ભણસાલીના દિગ્દર્શનમાં બનેલી આ ફિલ્મે બોક્સ ઓફિસ પર કમાણીના તમામ રેકોર્ડ તોડી નાખ્યા હતા.
👉 આ સમાચાર વાચો:
Ludhiana Railway Accident મુસાફરોની સુરક્ષા ભગવાન ભરોસે? લુધિયાણામાં મુસાફરી ટ્રેનના ડબ્બામાંથી ટોયલેટનો ભાગ જ ઉખડીને નીચે પડ્યો! જુઓ વિડીયો
