News Continuous Bureau | Mumbai
Maa Behan Screening 2026| બોલિવૂડ ઈન્ડસ્ટ્રીમાં ૧૯૮૦ અને ૧૯૯૦ ના દાયકામાં સિલ્વર સ્ક્રીન પર એકહથ્થુ રાજ કરનારી અને દર્શકોની સૌથી લોકપ્રિય જોડી એટલે કે માધુરી દીક્ષિત અને અનિલ કપૂર . આ સુપરહિટ જોડીએ પોતાના સમયમાં ‘તેઝાબ’ અને ‘રામ લખન’ જેવી ઘણી યાદગાર અને બ્લોકબસ્ટર ફિલ્મો આપી છે. આ ચહેતી જોડી તાજેતરમાં જ માધુરી દીક્ષિતની નવી ફિલ્મ ‘માઁ બહેન’ ના એક ખાસ સ્ક્રીનિંગ દરમિયાન વર્ષો પછી ફરી એકસાથે કેમેરા સામે જોવા મળી છે. બંનેના ફોટા અને વીડિયો ઓનલાઈન વાયરલ થતાં જ ફેન્સે આ જોડીને ફરીથી કોઈ ફિલ્મમાં મુખ્ય ભૂમિકામાં સાથે જોવા માટે સોશિયલ મીડિયા પર અપીલ શરૂ કરી દીધી છે.
કાળા આઉટફિટમાં અનિલ કપૂર અને અનારકલી સૂટમાં માધુરી દીક્ષિતનો રોયલ લુક
મુંબઈમાં ‘માઁ બહેન’ ફિલ્મના નિર્માતાઓ દ્વારા સિનેમા જગતના કલાકારો માટે એક વિશેષ સ્ક્રીનિંગનું આયોજન કરવામાં આવ્યું હતું. આ ખાસ કાર્યક્રમમાં ફિલ્મની સ્ટારકાસ્ટ ઉપરાંત માધુરીના જૂના મિત્ર અને અભિનેતા અનિલ કપૂર ખાસ હાજરી આપી હતી. રેડ કાર્પેટ પર અનિલ કપૂર બ્લેક કલરના સ્ટાઇલિશ આઉટફિટમાં હંમેશની જેમ એકદમ યંગ અને હેન્ડસમ દેખાતા હતા, જ્યારે માધુરી દીક્ષિત વાદળી અને પીળા રંગના અનારકલી સૂટમાં ખૂબ જ સુંદર અને શાહી અંદાજમાં નજરે પડ્યા હતા. પેપરાઝી સામે બંનેએ એકબીજાને ગળે લગાડીને પોઝ આપ્યા હતા, જેને જોઈને ફેન્સે કમેન્ટ કરી કે, “આ જોડી આજે પણ બોલિવૂડમાં બેજોડ છે, પ્લીઝ તેમને કોઈ રોમેન્ટિક ફિલ્મમાં ફરી સાથે લો.”
‘તેઝાબ’ થી શરૂ થઈ હતી સફર, છેલ્લે ૨૦૧૯ માં ‘ટોટલ ધમાલ’ માં આવ્યા હતા નજરે
માધુરી દીક્ષિત અને અનિલ કપૂરે પહેલીવાર વર્ષ ૧૯૮૮ માં આવેલી ફિલ્મ ‘તેઝાબ’ માં સાથે કામ કર્યું હતું. આ ફિલ્મ બોક્સ ઓફિસ પર સુપર-ડુપર હિટ સાબિત થઈ હતી અને આ ફિલ્મના ‘એક દો તીન’ ગીતથી માધુરીને ઘર-ઘરમાં ઓળખ મળી હતી. ‘તેઝાબ’ ની ઐતિહાસિક સફળતા બાદ આ જોડીએ ‘કિશન કન્હૈયા’, ‘બેટા’, ‘પરિંદા’, ‘પુકાર’ અને ‘લજ્જા’ સહિત અસંખ્ય હિટ ફિલ્મોમાં સાથે અભિનય કરીને બોલિવૂડની સૌથી સફળ જોડીઓમાંથી એક બનવાનું ગૌરવ મેળવ્યું હતું. બંને કલાકારો છેલ્લે વર્ષ ૨૦૧૯ માં આવેલી ડાયરેક્ટર ઇન્દ્ર કુમારની એડવેન્ચર કોમેડી ફિલ્મ ‘ટોટલ ધમાલ’ માં સાથે જોવા મળ્યા હતા, જેણે વૈશ્વિક સ્તરે ૨૩૨ કરોડ રૂપિયાથી વધુની કમાણી કરી હતી.
નેટફ્લિક્સ પર સ્ટ્રીમ થઈ રહી છે ‘માઁ બહેન’, અનિલ કપૂર ‘આલ્ફા’ ની તૈયારીમાં વ્યસ્ત
સુરેશ ત્રિવેણીના દિગ્દર્શનમાં બનેલી બ્લેક કોમેડી થ્રિલર ફિલ્મ ‘માઁ બહેન’ માં માધુરી દીક્ષિતની સાથે તૃપ્તિ ડિમરી , ધારણા દુર્ગા અને રવિ કિશન મુખ્ય ભૂમિકામાં છે. આ ફિલ્મ ૪ જૂનના રોજ રીલીઝ થઈ છે અને હાલમાં તે ઓટીટી પ્લેટફોર્મ નેટફ્લિક્સ પર ધૂમ મચાવી રહી છે. વાર્તા એક માતા અને તેની દીકરીઓની આસપાસ ફરે છે, જેઓ એક ગલીમાં થયેલા ગુનાને છુપાવવાનો પ્રયાસ કરે છે. બીજી તરફ, અનિલ કપૂર પોતાની આગામી હાઈ-બજેટ વાયઆરએફ (YRF) સ્પાય યુનિવર્સની ફિલ્મ ‘આલ્ફા’ (Alpha) ની રિલીઝની રાહ જોઈ રહ્યા છે, જેમાં તેમની સાથે આલિયા ભટ્ટ, શરવરી અને બોબી દેઓલ મુખ્ય ભૂમિકામાં જોવા મળશે.
👉 આ સમાચાર વાચો:
Kangana Ranaut New Movie| ‘ભારત ભાગ્ય વિધાતા’ કોણ છે અંજલિ કુલથે? કસાબ સામે અડીખમ ઊભા રહેનારા એ નર્સ, જેમનું પાત્ર ભજવી રહી છે કંગના રનૌત
