News Continuous Bureau | Mumbai
‘Don 3’ Controversy| બોલિવૂડની મોસ્ટ અવેટેડ ફિલ્મ ‘ડોન 3’ ને લઈને શરૂ થયેલો વિવાદ હવે એક મોટા કાનૂની જંગમાં ફેરવાઈ ગયો છે. અભિનેતા રણવીર સિંહ દ્વારા આ ફિલ્મ છોડી દેવાના નિર્ણય બાદ બોલિવૂડમાં ભારે હલચલ મચી ગઈ છે. આ વિવાદમાં જ્યારે મોટાભાગના કલાકારોએ મૌન સેવ્યું છે, ત્યારે જાણીતા ફિલ્મમેકર ટીપી અગ્રવાલે ખુલ્લેઆમ રણવીર સિંહનો પક્ષ લીધો છે. તેમણે ‘ફેડરેશન ઓફ વેસ્ટર્ન ઇન્ડિયા સિને એમ્પ્લોઇઝ’ (FWICE) દ્વારા રણવીર વિરુદ્ધ જારી કરાયેલા નોનકોઓપરેશન આદેશને મુંબઈની ડિંડોશી સ્થિત બોમ્બે સિવિલ કોર્ટમાં પડકાર્યો છે.
રણવીર સિંહે અચાનક ફિલ્મ છોડતા પ્રોડક્શન હાઉસને 45 કરોડનું નુકસાન થયાનો આરોપ
કિંગ ખાન શાહરૂખ ખાન પછી રણવીર સિંહ ‘ડોન 3’ માં મુખ્ય ભૂમિકા ભજવવાનો હતો. પરંતુ ડિસેમ્બર 2025 માં અચાનક રણવીરે આ પ્રોજેક્ટમાંથી પીછેહઠ કરી લીધી હતી. ફિલ્મ ‘ધુરંધર’ ની ઐતિહાસિક સફળતા બાદ રણવીરે ‘ડોન 3’ કરવાની ના પાડી દીધી, જેનાથી નારાજ થઈને ડાયરેક્ટર ફરહાન અખ્તર અને રિતેશ સિધવાનીની કંપની એક્સેલ એન્ટરટેઈનમેન્ટે FWICE પાસે ફરિયાદ નોંધાવી હતી. ફરહાનનો આરોપ હતો કે રણવીરના અચાનક બહાર થવાથી તેમની કંપનીને 45 કરોડ રૂપિયાનું મોટું આર્થિક નુકસાન થયું છે, જેના આધારે એસોસિએશને રણવીર સામે નોન-કોઓપરેશનલ નોટિસ જાહેર કરી દીધી હતી.
આઈએમપીપીએ ના પૂર્વ અધ્યક્ષ ટીપી અગ્રવાલે એસોસિએશનના આદેશને ગેરબંધારણીય ગણાવ્યો
ઇન્ડિયન મોશન પિક્ચર પ્રોડ્યુસર્સ એસોસિએશન (IMPPA) ના પૂર્વ અધ્યક્ષ અને વરિષ્ઠ ફિલ્મ નિર્માતા ટીપી અગ્રવાલે FWICE અને IMPPA વિરુદ્ધ કોર્ટમાં દાખલ કરેલી અરજીમાં કડક વલણ અપનાવ્યું છે. તેમણે જણાવ્યું છે કે દેશમાં કોઈપણ વ્યક્તિ, એસોસિએશન કે ટ્રેડ બોડીને એવો કોઈ કાનૂની અધિકાર નથી કે તે કોઈ કલાકાર અથવા પ્રોફેશનલ પર પ્રતિબંધ મૂકે અથવા અન્ય લોકોને તેની સાથે કામ ન કરવાનો આદેશ આપે. આ પ્રકારના આદેશો કલાકારોની આજીવિકા અને કાનૂની અધિકારો પર તરાપ સમાન છે.
ફિલ્મ ઇન્ડસ્ટ્રી પરસ્પર સહયોગ પર ટકેલી છે, વિવાદો કાનૂની રીતે ઉકેલાવા જોઈએ
આ સમગ્ર વિવાદ પર મીડિયા સાથે વાતચીત કરતા ટીપી અગ્રવાલે જણાવ્યું હતું કે, “આખી ફિલ્મ ઇન્ડસ્ટ્રી એકબીજાના સહયોગ અને પરસ્પર વિશ્વાસ પર ટકેલી છે. તેથી, આવા સંવેદનશીલ વિષયોને કાનૂની અને વ્યાવસાયિક ચેનલો દ્વારા જ ઉકેલવા જોઈએ. કોઈપણ સંગઠન દ્વારા કોઈ વ્યક્તિને કામ કરવાથી રોકવાના પ્રયાસને હળવાશથી લઈ શકાય નહીં, કારણ કે આનાથી કલાકારની આર્થિક સ્થિતિ અને સર્જનાત્મક સ્વતંત્રતા પર સીધી અસર પડે છે.” હાલમાં કોર્ટના આ હસ્તક્ષેપ બાદ ‘ડોન 3’ અને રણવીર સિંહનો આ વિવાદ દેશભરમાં ટોક ઓફ ધ ટાઉન બન્યો છે.
👉 આ સમાચાર વાચો:
‘Hai Jawani To Ishq Hona Hai’| વરુણ ધવનની ‘હૈ જવાની તો ઇશ્ક હોના હૈ’ અડધા ભાવે જોવા મળશે! એડવાન્સ બુકિંગ કરાવતા જ મળશે આ મોટો ફાયદો
