News Continuous Bureau | Mumbai
Cocktail 2| શાહિદ કપૂર અને કૃતિ સેનનની આગામી ફિલ્મ ‘કૉકટેલ ૨’ ના પ્રથમ ગીત ‘જબ તલક’ ની સફળતા બાદ મેકર્સે તાજેતરમાં જ તેનું બીજું ગીત ‘માશૂકા’ રિલીઝ કર્યું છે. સોશિયલ મીડિયા પર આ ગીતમાં શાહિદ અને કૃતિ વચ્ચેની શાનદાર કેમિસ્ટ્રી અને રોમાન્સને ચાહકો ખૂબ પસંદ કરી રહ્યા છે. પરંતુ બીજી તરફ આ ગીત રિલીઝ થતાંની સાથે જ એક નવો વિવાદ શરૂ થઈ ગયો છે. કેટલાક સોશિયલ મીડિયા યુઝર્સ આ ગીતની ધૂનની સરખામણી એક પ્રખ્યાત ઇટાલિયન ગીત સાથે કરી રહ્યા છે, જેના કારણે સોશિયલ મીડિયા પર સંગીતકાર પ્રીતમ ફરી એકવાર ટ્રોલર્સના નિશાના પર આવ્યા છે.
વર્ષ ૧૯૯૩ ના ઇટાલિયન ગીતની કોપી હોવાનો લાગ્યો આરોપ
સોશિયલ મીડિયા પર યુઝર્સ દાવો કરી રહ્યા છે કે ફિલ્મ ‘કૉકટેલ ૨’ નું ગીત ‘માશૂકા’ વર્ષ ૧૯૯૩ માં રિલીઝ થયેલા ઇટાલિયન ગીત ‘સે સો અર્રુબાતે એ નોના’ ની ધૂન પરથી પ્રેરિત અથવા કોપી કરવામાં આવ્યું છે. આ ગીતનું મ્યુઝિક પ્રખ્યાત કમ્પોઝર પ્રીતમ દ્વારા તૈયાર કરવામાં આવ્યું છે. આ પહેલીવાર નથી જ્યારે પ્રીતમ પર ગીત કોપી કરવાનો આરોપ લાગ્યો હોય, આ પહેલા વર્ષ ૨૦૧૭ માં પણ ફિલ્મ ‘એ દિલ હૈ મુશ્કિલ’ ના એક ગીતને લઈને તેમના પર આવા જ આક્ષેપો થયા હતા, જેના કારણે આ વિવાદ વધુ ઘેરો બન્યો છે.
ચાહકોએ સોશિયલ મીડિયા પર પ્રીતમો બચાવ કર્યો
ગીતની સરખામણીને કારણે સોશિયલ મીડિયા પર શરૂ થયેલી ચર્ચા વચ્ચે પ્રીતમના સમર્થકો અને સંગીત પ્રેમીઓ તેમના બચાવમાં આવ્યા છે. એક યુઝરે આ બાબતને સ્પષ્ટ કરતા લખ્યું કે આ કોઈ મ્યુઝિક ચોરી નથી પરંતુ ‘સેમ્પલિંગ’ છે, જે સંગીતની દુનિયામાં એક ખૂબ જ જૂની અને સામાન્ય પ્રક્રિયા છે. આ ટેકનિકમાં મૂળ ગીતની મુખ્ય ધૂન લઈને તેના પર અન્ય વાદ્યોના સંગીત સાથે નવા ગીતના બોલ ઉમેરવામાં આવે છે. હોલીવુડના પ્રખ્યાત કલાકારો જેવા કે ટેલર સ્વિફ્ટ, પિટબુલ અને કાન્યે વેસ્ટ પણ પોતાના ગીતોમાં નિયમિતપણે સેમ્પલિંગનો ઉપયોગ કરે છે.
પ્રીતમ અને અમિતાભ ભટ્ટાચાર્યની જોડીએ તૈયાર કર્યું ગીત
મ્યુઝિકલ લવ સ્ટોરી આધારિત આ ગીત ‘માશૂકા’ ના સુંદર બોલ પ્રખ્યાત ગીતકાર અમિતાભ ભટ્ટાચાર્ય દ્વારા લખવામાં આવ્યા છે, જ્યારે રાઘવ ચૈતન્ય અને મહેમૂદ રુઆ કાયે તેને પોતાનો અવાજ આપ્યો છે. આ ગીત દ્વારા ફિલ્મમાં કૃતિ સેનન અને શાહિદ કપૂરના પાત્રોની સફર અને તેમની વચ્ચે વિકસતા પ્રેમને દર્શાવવામાં આવ્યો છે. ભલે ગીતને લઈને વિવાદ ચાલી રહ્યો હોય, પરંતુ દર્શકોમાં આ ગીતનો ક્રેઝ સતત વધી રહ્યો છે.
👉 આ સમાચાર વાચો:
Cannes 2026| કાન્સ ફેસ્ટિવલમાં ઐશ્વર્યા રાયના ફેન્સને લાગશે ઝટકો? જાણો અત્યાર સુધી બચ્ચન વહુએ કેમ ન આપી હાજરી
