ન્યુઝ કન્ટિન્યુઝ બ્યુરો
મુંબઈ, 4 ડિસેમ્બર 2021
શનિવાર
વર્ષ 2021માં ઘણા સ્ટાર્સ એક યા બીજા કારણોસર ચર્ચામાં રહ્યા છે. જ્યારે ઘણા સ્ટાર્સના મૃત્યુના સમાચાર આવ્યા, ત્યારે ઘણા સેલેબ્સ અન્ય કારણોસર પણ હેડલાઇન્સમાં રહ્યા. દરમિયાન, યાહૂએ સૌથી વધુ સર્ચ કરાયેલા સેલેબ્સની યાદી જાહેર કરી છે, જેમાં કહેવામાં આવ્યું છે કે ઈન્ટરનેટ પર સર્ચ પ્રમાણે સેલેબ્સને ક્યુ સ્થાન આપવામાં આવ્યું છે.ખાસ વાત એ છે કે આ લિસ્ટમાં શાહરૂખ ખાનના પુત્ર આર્યન ખાનનું નામ પણ સામેલ છે. આ યાદીમાં સૌથી વધુ સર્ચ કરવામાં આવેલા વ્યક્તિઓમાં દેશના વડાપ્રધાન નરેન્દ્ર મોદી ટોપ પર છે. ક્રિકેટર વિરાટ કોહલી બીજા નંબરે અને પશ્ચિમ બંગાળના મુખ્યમંત્રી મમતા બેનર્જી ત્રીજા નંબરે છે.
યાહૂની આ યાદીની ટોપ ન્યૂઝમેકર કેટેગરીમાં 'ઇન્ડિયન ફાર્મર્સ પ્રોટેસ્ટ' ટોપ પર છે. તેમજ, શાહરૂખ ખાનનો પુત્ર આર્યન ખાન બીજા સ્થાને છે. આર્યન ખાન ડ્રગ્સ કેસમાં નામ આવ્યા બાદ ખૂબ જ ચર્ચામાં હતો. હાલમાં જ કોર્ટે તેને જેલમાંથી જામીન પર મુક્ત કર્યો છે.સૌથી વધુ સર્ચ કરાયેલા પુરૂષ કલાકારોની યાદીમાં નાના પડદાના મોટા ચહેરા અને બિગ બોસ 13ના વિજેતા સિદ્ધાર્થ શુક્લા નું નામ ટોચ પર છે. સિદ્ધાર્થનું 40 વર્ષની વયે હાર્ટ એટેકના કારણે નિધન થયું હતું, ત્યારપછી તે ઘણા દિવસો સુધી ચર્ચામાં રહ્યો હતો. આ યાદીમાં સલમાન ખાન બીજા, અલ્લુ અર્જુન ત્રીજા, સ્વર્ગસ્થ પુનીત રાજકુમાર ચોથા નંબરે અને દિલીપ કુમાર પાંચમા નંબરે છે.
ફીમેલ સ્ટાર્સની વાત કરીએ તો કરીના કપૂર વર્ષ 2021માં સૌથી વધુ સર્ચ કરવામાં આવેલી સેલિબ્રિટી બની ગઈ છે. બીજા નંબર પર કેટરિના કૈફ છે. બીજી તરફ પ્રિયંકા ચોપરા ત્રીજા, આલિયા ભટ્ટ ચોથા અને દીપિકા પાદુકોણ પાંચમા સ્થાને છે. તમને જણાવી દઈએ કે દર વર્ષના અંતમાં યાહૂ સૌથી વધુ સર્ચ કરાયેલા લોકોની યાદી જાહેર કરે છે.
